LUK 2

Jisu Kepvügha

(Mat 1.18-25)

1Tsü tsüwi Kadimi Augusta na Rom kadiyyi maben wi nyanzhüghu yalo kesa ahza khuchia. 2Quirinia na Siriya yyi wi ahng sa keben ha nyanzhüghu atuwa sa. 3Tsalina anyi tsüdila anyan zhüyale papa kepvügha nyu wi washan.

4Josef la Galilee yyi wi Nazareth wina Judea wi David nyutiwa Bethlehem wi wa, kepaghenanye ma David shicübvügha nyi kesü. 5Ma wa anyan zhüyale kesalina ma ssiben le ajühcen kethengwa Maria ssinu wa. Maria na atsa-npvüden, 6manyi na ciwi keben wi Maria na atsa kepvügha matsü na gho cua. 7Nu ma atsa tssütsewa pvüghaya, nu athsü pi ma meju pi amesü khu kesü wi jen thsü theng, kepaghenanye ciwi kijünyi jjen wi manyi keben pen nmila.

Anenikehiethu nu Tangnyilothu

8Diyyi ciwi anenikehiethu na aghaja alli wi ben nu mathu khaghanenithu hieden. 9Apvüwa nyilo kesü na gho mathu kete wi nganya nu Apvüwa nyankethang na mathu wegüya. Mathu na messi ntsa saya, 10isala nyilowa na mathu wi kiza, “Nmessi lalo! Kepaghenanye hi nthu ghena Ajühkemehaiwa senghoben, nu tsüna ayyi nyi tsüdila anongheya thsüden. 11Nansü nthu Hangshawa, Apvüwa Khrista tsüna David Nyunutiwa wi pvüghayadha! 12Ha nthu ghena azensu kesü saden, nthu na atsawa tsü meju pi amesü khu kesü wi jen thsü ketheng muyaben.”

13Tsümeyi tangnyilo süpahizi akhang keti kesü na nyilowa tsü gweghe hati nu Anyiza seng shagha:

14“Tang kemisi ntsa wi kebenwa Anyiza

nyanthangkeyawa salo!

nu kecca ya ayyi wi anyi ma nen

ketenthu miwi kebenwa salo!”

15Tangnyilothu na mathu teshi nu tang wi kewa seng wi anenikehiethu na hati khokho wi khi, “Ikhang Bethlehem wi wa nu Apvüwa na pi ikhang kekiza hathu ha kesa tsü ghangchi na!”

16Tsalina mathu na kaghaji wala Josef nu Maria manyi nu atsawa pi amesü khu wi jen thsü ketheng tsü muya. 17Anenikehiethu na wa ma muya, nu tangnyilowa na atsawa cüki pi mathu kiza ketheng tsü khi pi mathu kiza. 18Anenikehiethu na kekhi tsü za keyathu tsüdila amansa. 19Maria na tsüthu tsüdi pi ma leben wi chipvü nu meshendhu ntsa sa wa. 20Anenikehiethu na tangnyilowa na mathu kekiza ti tsüdila zaya nu mutiya kesalina akhwi sa pi Anyiza seng sen nu wha neng.

Jisu Nyan Keci

21 # Lev 12.3; Luk 1.31 Tazen ghanan wi atsawa hyukahan matsü na gho, nu ma nyan pi Jisu ciya; anyan tsüna tangnyilowa na ma npi npvükeya wina keci.

Jisu pi Kekinyijjen wi Satekemetha

22Mosa Yenwa kenie wina satekemetha matsüwa tsüna gho Josef nu Maria manyi cuya. Tsalina manyi na atsawa tsü pi Apvüwa tuwi chile ssinu Jerusalem wi shu. 23#Bvü 13.2,12 Apvüwa yen wi hati zhü pi theng: “Atsa tssütsewa pvüghakeya tsüdila satemetha pi Apvüwa wi chiden.” 24#Lev 12.6-8 Mathu na Apvüwa yen nienu ahhansha sale kesalina nkhetsü nyelela tuktur keni sen nu shu.

25Tsü tsüwi anyi kesü ma nyan Simon kesa tsüna Jerusalem wi hangben. Ma tsatan nu Apvüwa messikü keten nyi. Ma Israel hangshaya keten tsüwa tsü hieben, nu Kemetha Ghamu na ma ssiden, 26nu ma Apvüwa na khishi ketheng Messiya tsü npi kemu chu shü nbenle kesa Kemetha Ghamu na ma kiza theng. 27Aghamu na Simon ssinu Kekinyijjen wi wha, nu atsawa bajja la Jisu pi Ayenwa kenie wina sachile ssinu Kekinyijjen wi gho. 28Simon na atsawa tsü pieya nu hati Anyiza seng:

29“Apvüwa, no khishikechi tsü sacen chidha,

nu no nmaghawa yala cca bvü thsü yilo.

30Kepaghenanye hi inyon pi no hangshakeya

tsü muyadha,

31tsüna no anyi tsüdi tuwi na kiden ketheng:

32Kewegü kesü na no kenenwa tsü pi

Judah nyi nkenyethu ccüca chi,

nu anyankethang sen nu n-nyi Israel miwi gho.”

33Atsawa bajja na Simon na ma cüki kekhi tsü kina pi amansa. 34Simon na sawegü pi mathu miwi chi nu hati ma jja Maria kiza, “Anyiza na atsawa ha kessi pi Israel nyi kejonla qanca nu shaghaya thsüben. Ma Anyiza wina kegho zensu kesü nyu na meya mvula kesa kesü saben, 35nu mathu kekuthi kemeshen sa pi nyu ccücaaben. Nu ahathakina na njünnu nleben kecun keben ti saben.”

36-37Ciwi Asher mizza nyi Fanuel nga denyile keqhai kesü ma nyan Anna atusenjüh-kechü na ben. Ma n-nuwa nu ma wuba manyi amapi tagü ketan hang, nu khili ma kahang mapi achentazen nu mejü sa wadha. Ma ghaja ghanan lela Kekinyijjen nteshila Anyiza kekuli sala zi nu kekhie sa benden. 38Tsü tsüwi ma ghola Anyiza seng nu atsawa cüki khi pila Anyiza na Jerusalem hangshaya keten hie kebenthu tsüdila kiza.

Nazareth wi Kughoneng

39 # Mat 2.23 Josef nu Maria manyi Apvüwa Yenwa kenie wina kekuli tsüdi sacenya nu Galilee wi mathu nyuti Nazareth wi ghoneng. 40Atsawa na qhai shagha züya nu Anyiza wi kemetsa nu nanketizen pi ma pong pvüya.

Jisu Pvüzanyi Kekinyijjen wi Keben

41 # Bvü 12.1-27; Aye 16.1-8 Jisu bajja na amapi kaghapenla Shhukeya Kho tsü ghena Jerusalem wi shuden. 42Jisu kahang mapi taghakeni wi pi mathu yen sa keten ti akho ghena Jerusalem wi shu. 43Mathu na akho kesacen seng wi ajjen wi kheneng gho, isala pvüzanyiwa Jisu na Jerusalem wi ben wa. Ma bajja na tsü nchü; 44manyi kemeshen ma mathu jawi tenle sala ghanan thangthang lenketsen wi kewa seng wi mathu shilithu nu pvüshangthu jawi ma bha wa. 45Manyi ma mu meyala kesalina Jerusalem wi ma bha neng wa. 46Kecheng ghanan wi manyi na ma Kekinyijjen wi Judah nyi kesansithu jawi donki nu mathu jühkina nu mathu wi pala keü keben muya. 47Ma jühkina kebenthu tsüdila ma pala kechü nu keluneng tsü za pi amansa. 48Ma bajja na ma mukeya wi amansa nu ma jja na ma kiza, “Itsawa, no mangkesa na hati sa pi ishinyi cüben nu? Nba ishinyi na qhethiketen nu leben güccüla no bhaden.”

49Ma manyi luneng, “Nshinyi mangkesa na hi bhaten nu? Nshinyi hi iBa jjen wi benden kesa tsü nchü kwe?”

50Isala manyi na ma keluneng tsü jjügi chüshi meyala. 51Isanu mathu gweghe sen nu Nazareth wi wha neng nu ciwi ma manyi jühkina nu hang. Ma jja na hathu tsüdi pi ma leben wi chipvü nu ben wa. 52#1 Sam 2.26; Kem 3.4 Jisu na qhai shagha metsa kayi, Anyiza nu anyi kaghali pvüya.

Currently Selected:

LUK 2: RENGNBSI

Highlight

Copy