LUK 18
18
Denyile Nu Pendhewa Pi Ajühkaghape
1Jisu na ajühkaghape kesü pi mathu kiza nu mathu na keshüthangla khieben nu accükwen-nshü lalo kesa mathu sansi. 2Ma khi, “Anyuti kesü wi Anyiza nmessi nyelela anyithu nyuwakü nketen pendhenyi kesü ben. 3Anyuti tsüwa wi denyile kesü na gho ma kemeshon shei khi cülo kesa ma wi ‘Hi nankemeghüwa tuwi ishei khi cülo,’ khie khie saden. 4Matsü kesie pendhewa na male khi, isani asakhen wi ma ketanla ma wi khi, ‘Hi Anyiza nmessi nu anyithu n-nyuwakü lela 5denyile hawa ha hi pondeja wadha nu hi ma jühkaghaten pi cüaden, nyelethu ma ghoneng-ghoja nu hi ilidhamang waben.’ ”
6Apvüwa na khi, “Nketsatan pendhewa na kekhi tsü kina yalo. 7Anyiza na ma nyithu aghanan le aghaja lela ma wi khie ketenthu shei khi cü nben kwe? 8Hi nthu kizaden, ma wan nu mathu shei khi cüben. Isala Anyi Tsawa na kegho wi ma ayyi wi kenondi muyaben ma?”
Farisi nu Ayenkesansiwa pi Ajühkaghape
9Jisu na ajühkaghape ha pi anyi mathu na tsatanle nu kepathu meshensa ketenthu wi kiza. 10“Kuti tsüwi meshu keni gweghe Kekinyijjen wi kekhie sa wa: kesü na Farisi nu kepawa na khajana kekhü. 11Farisiwa na ma kepa ngan nu khie: ‘Anyiza, hi no sengle, kepaghenanye hi anyi kepathu ti pala tepagha, ntsatan, nyelela keqheza nyi nye. Hi no seng, kepaghenanye hi khajana kekhüwa katsü ti nye. 12Hi hapta kesü jüwi keni tughu ziden, nu hi mukeya tsüdi wi gishü tagha wi kesü pi no cüden.’ 13Isala khajana kekhüwa tsü temeja wi ngan nu ma mmi la pieki pi tang wi n-ghang, isala ma leben wheng nu khi, ‘Anyiza, hi kesami nyi kesü ha nantizen chicülo!’ 14#Mat 23.12; Luk 14.11 Jisu na khi, ‘Hi nthu kizaden, Farisiwa tsü nyela khajana kekhüwa tsüna Anyiza ssinu meshonya nu ma jjen wi whadha. Kepaghenanye anyi kesü le kesü lela ma pi dithang ketenwa satemeni cüden, nu ma satemeni ketenwa sa pi di cüden.’ ”
Jisu Na Sawegü pi Ghanyithu Kecü
(Mat 19.13-15; Mrk 10.13-16)
15Anyi pahan na Jisu yala ma kwen chang pi mathu tsangathu miwi chi thsüle kesalina ssinu gho. Sansikeyathu na tsü muya nu mathu ssi kitagha. 16Isala Jisu na ghanyithu cichi nu khi, “Ghanyithu yala hi wi gho thsülo, mathu nkhenla, kepaghenanye Anyiza Kadiyyi na hathu hati kesa ji. 17Ha meshenyalo! Anyi kesü le kesü lela ghanyi kesü ti Anyiza Kadiyyi tsü ya nkeya tsü khiela ciwi duya nben.”
Kebanwa
(Mat 19.16-30; Mrk 10.17-31)
18Judah nyi ccülikesa kesü na Jisu keü, “Kesansi kemehaiwa, hi anuphan kahang muya le kesa ghena khati nsathu yishü nu?”
19Jisu na ma keü, “No mangkesa na hi pi kemehaiwa le citen nu? Anyiza ketan khe anyi thola kemehai nmi. 20#Bvü 20.12-16; Aye 5.16-20 No ayenkhukechithu tsü chüben: ‘Keqheza nsala; nyu npathila; n-ghanfüla; milikemesa wi thola nkimennila; nba njja kinyikü yalo.’ ”
21Anyi tsüwa na luneng, “Hi ghanyi keben tsü wina ayenkhukechi hathu tsüdi nie yadha.”
22Jisu na ha zakeya wi ma wi khi, “Ciwi la no pala kesü nkulithu yishüben. No keben tsüdi pi jeü nu apisa pi ketha-u cülo, isathu tang wi no keben benya ben; Tsaseng wi ghala hi nie yalo.” 23Isala anyi tsüwa na ajüh ha zaya theng nu ma hathana wa, kepaghenanye ma keban ntsa kesü.
24Jisu na anyi tsüwa hathana keben tsü muya nu khi, “Keban na Anyiza Kadiyyi wi dule kesa na khatila dhu nu! 25Keban kesü Anyiza Kadiyyi wi dule kesa na sunsiesa kesü na aghaceng ku wi keshhuwa la lekete.”
26Anyi ma jüh ha kizathu na keü, “Isathu thowa hangshaya mehai nu?”
27Jisu na khineng, “Anyi na sa nkeyawa tsü Anyiza na saya mehai.”
28Tsaseng wi Pitor na khi, “Ghangchilo, ikhang na ikhang jjenthu teshi nu no nieden.”
29Jisu na mathu wi khi, “Anle, hi nthu kizaden, anyi thowa na Anyiza Kadiyyi ghena ajjen, awubvü, acünyuthu, abajjathu, nyelela atsangathu teshi khe 30ma khili kahang wi tsü miwi mu nengya nu kahang gho keten wi anuphan kahang muyaben.”
Jisu na kecheng tughuwa Ma Keshü Cüki Kekhi
(Mat 20.17-19; Mrk 10.32-34)
31Jisu na sansikeyathu Taghakeni ssi wa mathu kiza, “Kinalo! Ikhang na Jerusalem wi shu tendha, nu ciwi atusenjüh-kechüthu na Anyi Tsawa ghena zhü ketheng tsüdila sacen yaben. 32Ma ghan pila Judah nyi nkenyethu kwen wi chiaben, mathu na ma nankeqhe, ma metsimeni, nu ma meshuki saben. 33Mathu na ma kihhe nu ma pathiaben, isala ghanan kecheng seng wi ma hangneng shagha ben.” 34Isala sansikeyathu na hathu ha mangla nchü; ajüh jjügi tsüna mathu tuwi kuthi kesalina mathu na Jisu khi kebenwa tsü nchü la.
Jisu na Anyon Nkemu Kekuwhe Kesü sa pi Mehaikecü
(Mat 20.29-34; Mrk 10.46-52)
35Jisu na Jerikho tetsaki gho keten alen wi anyon nkemu nyi kesü na donki nu kuwhe ben. 36Ma anyitenti na wa keten hhai zakeya wi “Mangwa saben nu?” keü.
37Mathu na luneng, “Nazareth nyiwa Jisu na waden le!”
38Ma maghala, “Jisu, David tsawa! Hi nantizen chicülo!” isa khi.
39Anyi ma tuwi ketenthu na ma ssi kitagha nu ma ccen benlo khi. Isala ma tsü miwi misiki jisha, “David tsawa, hi nantizen chicülo!”
40Tsalina Jisu ngan wa nu anyi anyon nkemuwa tsü ssinu ma wi gholo khi. Ma tetsaki kegho wi Jisu na ma wi keü, 41“Hi nghena mangwa sachi thsü mvuben nu?” Ma luneng, “Kesansiwa, hi ya pala mu nengya mvuben.”
42Jisu na ma wi khi, “Ghangchilo, no kenondi na no sa pi mehai cüdha.”
43Tsümeyi ma nyon na pala muya, nu Anyiza seng nu Jisu nie wa. Anyitenti na tsü kemu wi mathu tsüdila Anyiza seng.
Currently Selected:
LUK 18: RENGNBSI
Highlight
Share
Copy
Want to have your highlights saved across all your devices? Sign up or sign in
Rengma (N) (Re-editing) Bible - Kemethajüh (N)
Copyright © 2016 by The Bible Society of India
Used by permission. All rights reserved worldwide.
