LUK 19

Jisu nu Zakhia Manyi

1Jisu na Jerikho wi du nu pvüdhi waden. 2Ciwi khajana kekhü kedi ntsa kesü ma nyan Zakhia na ben, ma keban kesü. 3Ma Jisu tsü ghangchi mvu sa, isala ma kizza-kemelu nyi kesü nu anyitenti ghena ma Jisu mu meya. 4Tsalina ma anyitenti tu wina bvü wa Jisu na wa keten len wi ambaton kesü wi ki nu ghang ben. 5Jisu na ciwi ghola yaki Zakhia ghang chi nu khi, “Zakhia, wan dugholo! Hi nansü njjen wi nbenthu yishüben.”

6Zakhia na kaghaji dugho ma nonghe ntsa sa nu ma ssiya. 7Anyi tsü kemuthu tsüdila nbvümugho wa, “Anyi hawa ha kesami nyi kesü kejjen sala ma jjen wi ben wadha!” 8Zakhia na shagha nu Apvüwa wi kiza, “Kinachilo, Apvüwa! Hi keben gishü pahan pi ketha-u cüaden, nu keujüla hi anyi pahan mechu nu nyu ji khuya theng lethu, hi tsümiwi keshen mejü pi ma cüaten le!”

9Jisu na ma wi kiza, “Nansü hangshakeya na ajjen ha wi ghodha, kepaghenanye anyi ha la Abraham shicü kesü. 10#Mat 18.11 Anyi Tsawa tsüna anyi bhatagha kesathu bha nu hangsha yale gho.”

Rükatssü pi Ajühkaghape

(Mat 25.14-30)

11Tsaseng wi Jisu na ajühkaghape kepa wi la khi pi ma jühkina kebenthu kiza. Ma Jerusalem tetsaki wa tendha, nu mathu na Anyiza Kadiyyi tsüna wan gho tendhale sa. 12Tsalina ma khi, “Kedi nyi kesü diyyi kelensie wi kadimi saya nu kheneng ajjen wi ghole sa. 13Ma npi kewa wi ma maghathu tagha cichi nu rükatssü kesüsü pi mathu gishü cü nu khi, ‘Hi npi kegho neng chu ha pi asensa benlalo.’ 14Isala ma nyithu na ma nanmeghü nu ma seng wi nyilothu kesun pi hati khi thsü, ‘Ikhang na anyi hawa pi ikhang kadimiwa sa thsü mvu nben.’ 15“Anyi tsüwa na kadimi saya nu ghoneng. Ma apisa pi cü ketheng ma maghathu na khajuju kiyiya khe chüyale kesalina ma tuwi gholo kesa ahza khuchi. 16Atuwa na gho nu khi, ‘Kediwa, no rükatssü kesü pi hi kecü tsü pi tagha kiyidha.’ 17Ma pvüwa na ma wi kiza, ‘Mehaidha, no amagha kemehaiwa. No pala kizzakeu wi jühtsentsa kesalina hi no pi anyunutithu tagha kenonccawa sa thsüden.’ 18Amagha keniwa na gho nu khi, ‘Kediwa, no rükatssü kesü pi hi kecü tsü pi manga kiyiyadha.’ 19Ma pvüwa na ma wi la khi, ‘No anyunutithu manga kenonccawa saben.’ 20Amagha kepawa na gho nu khi, ‘Kediwa, nrükatssü tsüna he wi ben, hi athsü pi meju pi theng le! 21No kecügü nyi ghena hi no messi, kepaghenanye no nji nkenye lela yaden, nu no pi nkeyangchi wi lela wwiden.’ 22Kediwa na ma wi khi, ‘No amagha nkemehaiwa! Hi njüh tsü sen nu no meshensa den. No hi kecügü nyi nu iji nkenye lela yaten nu hi pi nkeyangchi wi lela wwiden kesa chüben. 23Isathu, mangkesa na ipisa tsü pi apisajjen wi chi nsa nu? Isalethu hi kegho neng wi ma kekiyi muya kesa le!’ 24Tsaseng wi ma anyi ciwi ngan kebenthu wi kiza, ‘Ma wi rükatssü tsü khuya nu pila amagha ma kwen wi tagha kebenwa tsü wwa cülo.’ 25Isala mathu na ma wi khi, ‘Ma rükatssü tagha bendha le!’ 26#Mat 13.12; Mrk 4.25; Luk 8.18 Ma khineng, ‘Hi nthu kizaden, anyi kesü le kesü lela pala pahan kebenwa pi wwa neng cüben, isala thowa na mangla nmi khe ma keu kebenwa tsü lela sen bvüaben. 27#Mat 25.14-30 Khili hi nankemeghüthu, hi mathu miwi kadimi nkesa thsü mvuthu tsü ssi gho ituwi na mathu pathilo.’ ”

Khang Ntsanu Jerusalem wi Kedu

(Mat 21.1-11; Mrk 11.1-11; Jhn 12.12-19)

28Jisu na hati khi nu mathu tuwi na Jerusalem wi wa. 29Ma Oliv Yikha wi Bethfage nu Bethani manyi kete wi kegho wi ma sansikeyathu meshu keni kesun pi ma tuwi wa thsü, 30nu hati khi, “Nshinyi tuwi anyu wi tsü walo, nshinyi ciwi du lethu gada zza kesü nyu ma miwi npi keben pi hugi ketheng muya benna tsü lisha sen nu he wi gholo. 31Keujüla nyu na nshinyi wi mangkesa na nshinyi tsü lisha ben nu keü lethu, nshinyi na Apvüwa na ha nsenthu yishü benle ma kizalo.”

32Tsalina manyi na wa nan Jisu na manyi kekiza ti muya. 33Manyi wala gada zza tsü lisha keben wi ma pvüwa na manyi wi keü, “Nshinyi mangkesa na tsü lishaben nu?”

34Manyi na luneng, “Apvüwa na ha nsenthu yishüben.” 35Isanu manyi na tsü ssinu Jisu wi gho. Tsaseng wi mathu na athsü pi gada zza miwi shi nu Jisu yala ma miwi donki thsü. 36Ma tsü miwi na wa keten wi anyithu na mathu thsü pi alen wi shi.

37Ma wa Oliv Yikha wina kedugho len Jerusalem kete wi wa keten wi ma sansikeyathu anyitenti na jisha sen nu Anyiza seng nu mathu na amankesa keti mukeya ghena ma seng. 38#Zak 118.26 Mathu na hati khi: “Anyiza na sawegü pi Apvüwa nyan wina gho ketenwa Kadimi kecüwa salo! Tang wi kecca na ben nu Anyiza nyanthang keyawa salo.”

39Farisithu pahan na anyitenti jawi na Jisu kiza, “Kesansiwa, no sansikeyathu ya ccen benlo kizalo!”

40Jisu na luneng, “Hi nthu kizaden, keujüla mathu na ccen ben wa lela alon hathu ketanla magha shagha ben.”

Jisu na Jerusalem Ghena Kiqai

41Ma anyunutiwa tsü tetsaki gho nu mukeya wi tsü ghena qai, 42nu khi, “Keujüla no nansü mangwa na kecca ghena nsenthu yishü khe tsü chüshiyathu mehai kesanan! Isala no khili tsü nmudha! 43Kepaghenanye nghena matsü na ghoden, ciwi nghinyithu na akhweti sa pi no vüya nu alen tsüdi wi no khenyaben. 44Mathu na anyi nkhweti non wi kebenthu nu no la yasatha saben; nu alon kesütanla ma pen wi nben laben, kepaghenanye no Anyiza na no hangshayale kegho tsüwa tsü nchüla.”

Jisu na Kekinyijjen wi kewa

(Mat 21.12-17; Mrk 11.15-19; Jhn 2.13-22)

45Tsaseng wi Jisu na Kekinyijjen wi dula asenkesathu jügüshi, 46#Isa 56.7; Jer 7.11 nu mathu wi khi, “Ntsawajüh wi Anyiza na kekhi hati khi theng, ‘Hi Kekinyijjen pi kekhie jjen kesü saden,’ isala nthu na tsü pi kaghanfüthu keben pen saben le!” 47#Luk 21.37 Jisu na atsathangla Kekinyijjen wi nyu sansi. Keqhaikedi ntsathu, Ayenkesansithu, nu anyi ccülikesathu na ma pathi mvu sa, 48isala mathu na tsüti kesa len mu meya, kepaghenanye anyithu tsüdila ma jühkekhi tsü kesütanla nteshi mvula kinaben.

Currently Selected:

LUK 19: RENGNBSI

Highlight

Copy