LUK 16

Kenonccawa Achoghe nkemehai

1Jisu na ma sansikeyathu wi khi, “Ciwi keban kesü ma keben kenonccawa amagha kesü ben. Nyu na kebanwa wi ma maghawa na ma pisa pi yasa benle kiza. 2Tsalina ma maghawa cichi nu khi, ‘Hi ncüki zaya keben ha khati saben nu? No hi keben kenoncca cüki kezhü tsüdila sengholo, kepaghenanye no pi itsanqai kenonccawa sa thsü ntendha.’ 3Amaghawa na ma ketanla ma ccüneng, ‘Ipvüwa na hi pi kenonccawa nsa thsüdhale khiben. Hi khati sa nu? Hi ayyi chhü lela kezü nmi, nu kuwhe wa nan nyu tujüghe. 4Khili hi khati saten khe chüyadha! Ipvüwa na hi pi kenonccawa nsa thsü la lethu, ipvüshangthu yala mathu jjen wi hi ssiya thsüden.’ 5Tsalina ma anyi ma pvüwa menpvü kebenthu tsüdila cighu chi. Ma atuwa wi keü, ‘No ipvüwa men khaju pvüben nu?’ 6Ma khineng, ‘Adeli apfü meza pvü benle.’ Kenonccawa na ma wi kiza, ‘Nmen kepvü cüki kezhü na he wi ben na, wan gho donki nu deni zhü chilo.’ 7Tsaseng wi ma kepawa keü, ‘No khaju pvüben nu?’ Ma luneng, ‘Asu akhhide hazar kesü pvü benle.’ Kenonccawa na ma wi kiza, ‘Nmen kepvü cüki kezhü na he wi ben na, wan gho donki nu meza tazen zhü chilo.’ 8Achoghe nkemehai kenonccawa hawa pvüwa na ma hati kekuli ghena ma seng; kepaghenanye ayyi ha wi anyithu na anyi kewegü wi kebenthu miwi mathu choghe nmehaila atsanqai kenoncca cho chü kayiben.”

9Nu Jisu na khi, “Tsalina hi nthu kizaden: ayyi keben ha sen nu nthu pvüshangthu bhayalo, isanu nthu keben nmila lethu, mathu na nthu ssi pi anuphan jjen wi chiya ben na. 10Anyi kesü le kesü lela pala kezeng-u wi noncca pi mehai meya lethu, kejon wi la noncca pi mehaiya nben. 11Isathu keujüla nthu na ayyi wi keben ha kenoncca wi jühtsentsa sa meya lethu, khatinu atsentsawa kenoncca tsü pi nthu nondi chiya mehai nu? 12Nu keujüla nthu na nyu ji kenoncca wi jühtsentsa sa meya lethu, thowa na nthu ji tsü pi nthu cüya mehai nu?”

13 # Mat 6.24 “Amagha kesü na apvüwa keni nssümagha saya nben; ma kesü nanmeghü nu kepawa ghali; ma kesü jühya nu kepawa nkhichi saben. Nthu na Anyiza nu apisa keni qho kekuli saya nben.”

Jisu na Kekhi jüh Pahan

(Mat 11.12-13; 5.31-32; Mrk 10.11-12)

14Farisithu tsüdila ma jüh ha zakeya wi Jisu nankeqhe, kepaghenanye mathu na apisa tepaghaden. 15Jisu na mathu wi kiza, “Nthu ketanla nthu sa pi anyithu tuwi meshonle saden, isala Anyiza na nthu leben chüben. Kepaghenanye anyi na mangwa meshen pi ketikesie saten khe tsüna Anyiza tuwi mang men la nmi.

16 # Mat 11.12-13 Johan Baptizwa tsü kecu Mosa Yenwa nu atusenjüh-kechüthu na kezhüchi tsüna ben gho; tsü nten na Anyiza Kadiyyi cüki Ajühkemehaiwa pi anyithu sansi kechi wi tsüdila ciwi dule apiketsü sa. 17#Mat 5.18 Ayenwa wi keshenki kesüla yasale kesa na atssan nu ayyi bhatagha kesawa la lekete. 18#Mat 5.32; 1 Kor 7.10-11 “Npvüza kesü na ma wubvü teshi nu nza kepawa yaya lethu, ma keqheza saben; nu anyi thowa na keyishawa kinyibvü tsü yaya khe keqheza saben.

Kebanwa nu Lazar

19“Ciwi keban kesü na athsümeni ma men kedhu ketan sen nu atsathangla ma nonkwenthi hang. 20Ciwi ketha-u nyi la kesü ma nyan Lazar kesa na ma gwoben khuma-khujü pvü ketenwa tsüna nyu na ma pie nu kebanwa jenka wi ghoden, 21ma kebanwa miz wi anün keqanca tsü dsaya benle meshenden. Affüthu na gho ma kekhuma tsü menniden. 22Ketha-uwa na shü wa nu tangnyilothu na ma ssi wa tang kemishu wi Abraham kete wi donki thsü. Kebanwa la shü nu pi vhüa, 23ma keshü yyi (Hades) wi ben nu ketizen sa ntsa nu ghangchi nan kelensie wi Lazar na Abraham kete wi keben muya. 24Tsalina ma jisha, ‘Iba, Abraham! Hi tizenthu Lazar kesun pi ma kwenzza pi atssü tsütson sengho imili zügü decca cülo, kepaghenanye hi he anni wi ketizen sa ntsa ben le!’ 25Isala Abraham na khi, ‘Itsawa, meshenchilo, no kahang tsüwi pala kemehai tsüdi pi no cüdha, isala Lazar tsü nkemehai tsüdi muya. Isala ma khili tsü ma he wi ccawadha, nu no ketizen saben. 26Tsümiwi la ithu jüwi ayyiku kedhu kesü ben, tsalina he wina nthu wi kimvu kebenthu lela tsü pvüdhiya nben, nu thola nthu wina ikhang wi keghoya nbenle.’ 27Kebanwa na khi, ‘Isalethu iba Abraham, hi no wi khieben, Lazar kesun pi iba jjen wi wha thsülo, 28ciwi icünyuthu ma manga ben. Mathu la ketizen kesa pen wi ha n-gha thsüle kesalina ma ya whala mathu kitsanchi thsülo.’ 29Abraham na khi, ‘Mosa nu atusenjüh-kechüthu na mathu kitsanben, ncünyuthu na mathu kekhi jüh tsü kina keya-ule.’ 30Kebanwa na khineng, ‘Tsü ketan na cen nbenle, iba Abraham! Isala keujüla anyi pahan keshü wina hangshagha mathu wi wha lethu, mathu na mathu kesami wina khapegheya benle.’ 31Isala Abraham na khi, ‘Keujüla mathu na Mosa nu atusenjüh-kechüthu jüh nkina lethu, anyi pahan na keshü wina hangshagha wha lela mathu juya nben.’ ”

Currently Selected:

LUK 16: RENGNBSI

Highlight

Copy