LEVIYEN 9

Aaron na Ahhansha sa kechi

1Tazen ghanan wi Mosa na Aaron nu ma tsathu, nu Israel nyi ccülikesathu cichi. 2Ma Aaron kiza, “Amesü zza süpon kesü nu aneni süpon kesü nyu ghojünkeya mangla nkemi khuya nu tsü keni pi Apvüwa cülo, amesü süpon tsüna kesami ghena kekinyi nu aneni süpon na mecang pi kekinyi ghena. 3Israel nyithu wi kesami ghena kekinyi aneni süpon kesü, mecang pi kekinyi ghena amesü zza amapi kesü ji kesü, nu khaghaneni zza amapi kesü ji kesü manyi qho nyu ghojünkeya mangla nkemi khuyalo kizalo, 4nu kecca ghena kekinyi ji amesü süpon kesü nu aneni süpon kesü. Mathu na tsü keni pi ahhansha sa nu asu pi kekinyi adeli saghu ketheng tsü gweghe pi Apvüwa cü. Mathu hati nsathu yishü, kepaghenanye Apvüwa na nansü mathu tuwi ghoden.”

5Mosa na kekhi ti mathu na tsüdi sen nu Nithsüjjen tuwi gho, nu anyi mabenla gho ciwi saghu nu Apvüwa kinyi. 6Mosa khi, “Apvüwa na nthu ha tsüdi salo khi, isa lethu ma keten kewegü yala nthu tuwi gho thsüle kesalina.” 7#Ibr 7.27. Tsaseng wi ma Aaron kiza, “Wala kekinyipen wi no nu n-nyithu kesami sen bvü thsüale kesalina kesami ghena kekinyi nu mecang pi kekinyi sa chilo. Apvüwa na kekhi ti anyithu kesami sen bvü thsüale kesalina kekinyi ha sa chilo.”

8Aaron na kekinyipen wi wa ma ketanla ma kesami ghena kekinyi ji amesü zza süponwa tsü pathi. 9Ma tsathu na ajjü sengho ma cü, nu ma kwenzza pi tsü non wi ten chiya nu pahan pi kekinyipen ccügwen ghacüthu miwi chi, nu ma gilli tsüpi kekinyipen donbvü ccü wi keshu chia. 10Apvüwa na Mosa kekiza ti ma asa kethu, ma megen, nu ma mechen kemehai ntsa tsüpi kekinyipen miwi mecang. 11Isala ma asa nu ma hyu tsü sen wa kemnanpen na ameiwa mecang.

12Ma ma ghena mecang pi kekinyi sahangwa tsü pathi. Ma tsathu na ajjü sengho ma cü, nu ma tsüpi kekinyipen ccügwen mejü tsüdi wi keghü chia. 13Mathu na asahang tsü li nu ma sa kepathu la pi ma cü, nu ma tsüthu pi kekinyipen miwi mecang. 14Ma ma pvüsheng nu ma ccüthu bhuya, nu pi mecang pi kekinyi kepathu miwi chi nu pi kekinyipen miwi mecang. 15Tsaseng wi ma anyithu ghena kekinyi sachi. Ma pi anyithu kesami ghena kekinyi sa ketenwa aneni tsü khuya, nu tsü pathi pi ma ketanla ma kesami ghena kekinyi kesa tsü makesü sachi. 16Ma mecang pi kekinyi ghena la asahang sengho nu tsüpi ayenthu kenie wina sachi. 17Ma asu pi kekinyi sachi nu awheng awha kesü khuya nu tsüpi kekinyipen miwi mecang chi. (Hana atsathangla mecang pi kekinyi tsümi gilli.) 18#Lev 3.1-11. Ma anyithu ghena kecca ghena kekinyi ji amesü süpon nu aneni süpon tsü pathi. Ma tsathu na ajjü sen gho ma cü, nu ma tsüpi kekinyipen ccügwen mejü tsüdi wi keghü chi. 19Aaron na amesü süpon nu aneni süpon gwo wi ma kethu tsüdi pi 20ma nnukhu-kisü tsü wwaya nu tsüdi sen nu kekinyipen wi wa. Ma ma kethu pi kekinyipen miwi mecang 21nu ma nnukhu-kisü nu ma ccüthu tsüpi aju kemehai ntsa sala keqhaikedithu ghena pi Apvüwa cü, tsüna Mosa na kekhi ti sa.

22 # Scs 6.22-26. Aaron na ahhansha tsüdi kesacen seng wi ma kwen zanki pi anyithu miwi chi nu sawegü pi mathu cü, nu ma dugho. 23Mosa nu Aaron manyi na Apvüwa ketenpen Nithsüjjen non wi du nu shhugho sawegü pi anyithu cü, nu Apvüwa keten kewegü na anyi tsüdi tuwi gho. 24Apvüwa na zuli anni kesun chi pi mecang pi kekinyi nu kekinyipen miwi asa kethu tsü mecang. Anyithu na tsü kemu wi mathu tsüdi magha nu ayyi wi nkhwendu shan.

Currently Selected:

LEVIYEN 9: RENGNBSI

Highlight

Copy