LEVIYEN 10

Nadab Nu Abihu Manyi Kesami

1Aaron tsa keni Nadab nu Abihu manyi na annikhu khuya nu amihi, nu hankedemvu pi chiya, nu tsüpi Apvüwa kinyi. Isala anni tsüna nmetha, kepaghenanye Apvüwa na manyi tsüpi kinyilo nkhi. 2Zuli Apvüwa na anni kesun shachi nu tsüna ciwi Apvüwa tuwi na manyi mecangthia. 3Tsaseng wi Mosa na Aaron wi khi, “Apvüwa na hati kekhi ha ma jjügi na hale, ‘Hi kekuli kesathu tsüdila hi kemethawa nkinyiküthu yishü; hi inyankethang pi inyithu ccücaben.’ ” Isala Aaron na ceen ben wa.

4Mosa na Aaron bizawa Uzziel tsa keni Mishael nu Elzafan cichi nu manyi wi khi, “Hewi ghola Nithsüjjen kemethawa wi nshinyi cünyu kamangthu pieshhu kemnanpen na ameiwa chilo.” 5Tsalina manyi na Mosa kekhi ti athsü sengho akamang keni tsü meju pie shhula kemnanpen na ameiwa chia.

6Tsaseng wi Mosa na Aaron nu ma tsa keni Eleazar nu Ithamar wi khi, “Nthu li nhhe nyelela athsümeni mezüqhe pvü nu nthu na anongü benle kesa pi nyu nccücala. Keujüla nthu na tsüti sa lethu, nthu na shüaben, nu Apvüwa na azitenti maben miwi ma leben minu ben. Isala nthu Israel nyithu tsüdila Apvüwa na anni kesun chi pi mecangthi thsü kesa keshü ha ghena anongüya mehai. 7Nithsüjjen wi kedulen tsü nteshila nyelethu nthu na shüaben, kepaghenanye Apvüwa wi kenyenji deli tsüpi nthu satemetha theng.” Tsalina mathu na Mosa kekhi tsüti sa.

Keqhaikedithu Ghena Ayenthu

8Apvüwa na Aaron wi khi, 9“No nu ntsathu na kisengtssü nyelela azü kekhang kejjü seng wi hi ketenpen Nithsüjjen witsü ndula; keujüla nthu na tsüti sa lethu, nthu na shüaben. Ayen hawa ha nthu shicübvüghathu tsüdila nieben. 10Nthu na mangwa na Anyiza ji nu mangwa na anyi ghuzzaghuti kesen ji, khawa na keccüna wi metha nu khawa na nmetha khe chü kepapa nsathu yishü. 11Hi Mosa wina ayenthu pi nthu kecü tsü nthu na pi Israel nyithu tsüdi sansi ncüthu yishü.”

12 # Lev 6.14-18. Mosa na Aaron nu ma tsa keni Eleazar nu Ithamar wi khi, “Atsse pi Apvüwa kekinyi wi kesentu asu pi kekinyiwa tsü khuya, tsüpi azimi pi nkechi mesa güya nu kekinyipen kete wi tsü dsalo, kepaghenanye kekinyi hana metha ntsawa. 13Kemetha pen kesü wi tsü dsalo; ha atsse pi Apvüwa kekinyi wi pahan pi no nu ntsathu shei kesa tsüle. Apvüwa na tsüti hi kizale. 14#Lev 7.30-34.Isala no nu ntheghithu na aju kemehai sapi Apvüwa wi keqhaikedithu ghena khukechi nnukhu-kisü nu ma ccü tsü dsaya mehai. Nthu na keccüna wi kemetha pen kahe wila tsüthu dsaya mehai. Israel nyithu na kecca ghena kekinyi kesa wi nthu shei khukechi hathu hana no nu ntsathu jile. 15Mathu na asakethu pi atsse pi kekinyi sala Apvüwa cü keben wi ma ccü nu nnukhu-kisü tsü sengho ben. Apvüwa na kekhi ti hathu hana anuphanla no nu ntsathu shei saben.”

16Mosa na kesami ghena kekinyi aneni tsü cüki keüchi nu tsüpi mecangdha le kesa chüya. Ha ghena ma Eleazar nu Ithamar miwi aghepvü nu khi, 17#Lev 6.24-26. “Mangkesa na nshinyi kemetha pen wi kesami ghena kekinyiwa tsü ndsa nu? Tsüna metha ntsawa, nu azitentiwa kesami sen nu bvü thsüale kesalina Apvüwa na tsüpi nthu cüdha. 18Ma jjü tsü sen nu Nithsüjjen kemethawa non wi nghole kesa ghena, hi kekhi ti, nthu na ciwi ahhansha tsü dsa kesaule.”

19Aaron na luneng, “Keujüla hi nansü tsü dsale keathu, Apvüwa na tsü ya kesala nu? Anyithu na nansü mathu kesami ghena kekinyi sa, nu mecang pi kekinyi sengho Apvüwa cüdha, isala khilila imiwi qhethiketen hathu ha sabenle!” 20Mosa na ha zakeya seng wi ma leben ghashu sa.

Currently Selected:

LEVIYEN 10: RENGNBSI

Highlight

Copy