ADECHHÜ 21

Isak Kepvügha

1Apvüwa na khichi ketheng ti ma sawegü pi Sarah cü, 2Abraham na keqhai seng wi Sarah na atsa-npvüya nu pvügha pi ma cü. Anyiza na khi kechi ti matsü wi atsawa tsü pvüghaya. 3Abraham na ma tsawa nyan pi Isak ciya. 4Anyiza yenkhukechi ti Abraham na tazen ghanan wi Isak hyuhan. 5Abraham ma kahang amapi meza wi Isak pvüghaya. 6Sarah na khi, “Anyiza na nonkeghe nu kekiqhe #21.6: kekiqhe; Ibri jüh wina Isak majjügi ‘ma kiqhe’ (17.17-19 wi ghangchi) sengho hi cüdha. Ha cüki zakeyathu tsüdila hi nankeqhe ben.” 7Ma kheneng khi, “Thowa na Sarah na atsa ssitenle tsüti Abraham kizaya mehai nu? Isala ma keqhai seng wi hi atsa pvügha pi ma cüdha.”

8Ghanyiwa na qhai shagha, nu ma qhai keshagha wi Abraham na kemishu keti kesü sachi.

Hagar Nu Ishmael Manyi Kesun Pi Bvü thsükesa

9Ghanan kesü wi Ejipt nyiwa Hagar na pvügha pi Abraham kecüwa Ishmael na Sarah tsawa Isak nkhichi saben. #21.9: nkhichi saben; nyelela ssinu kiponli ben 10#Gal 4.29,30. Sarah na manyi muya nu Abraham wi kiza, “Maghalewa ha nu ma tsa manyi kesun pi bvü thsülo. Kepaghenanye maghale hawa tsa na khiela itsa Isak gweghe nu no keben tsü ghongya nben.” 11Abraham na ha ghena ma leben güccü ntsa sa, kepaghena- nye Ishmael ha la ma tsa. 12#Rom 9.7; Ibr 11.18. Isala Anyiza na Abraham wi kiza, “N-maghalewa Hagar nu ma tsawa ghena nleben güccü nsala, Sarah na khatile no kiza lakhe tsüti salo, kepaghenanye hi khi ketheng ti Isak miwi na no ashicübvüghathu ben waden. 13Hi ashicü kejon pi maghale tsawa la cüden, isanu mathu ya mizzatenti kesü saya thsüden. Ma la ntsa kesü ghena.”

14Ghanenwa wi mitu na Abraham na kedsakejjü pahan nu atssü pi asahyu khüti wi chi pi Hagar cü. Ma atsawa pi ma ghatsü wi cügi cü nu kesun pi bvü thsüa. Hagar na bvü wa Beersheba ghansha wi kegoedeja wa. 15Akhüti wi atssü nmila kesa seng wi ma tsawa pi aghangbhon kesü cakhu wi teshi theng nu 16ma wa meter mezau wi tsü donki wa. Ma ketanla ma ccüneng nu khi, “Hi itsawa keshü ghangya nten.” Ma atsawa kaghapi wi donki nu ma qai wa.

17Anyiza na ghanyiwa kiqai hhai zaya, nu Anyiza nyilowa tang wina Hagar ccüneng “Hagar, mang ghena nleben güccü ben nu? Nmessi lalo. Anyiza na ghanyiwa kiqai hhai zayadha. 18Shagha nu wa ma pieya nu ma kecükeni yalo. Hi ma shicübvüghathu wina mizzatenti keti kesü saya thsüden.” 19Tsaseng wi Anyiza na ma nyon shachi nu atssükhang kesü muya thsü. Ma asahyu khüti tsü sen wa atssü yiya nu sengho pahan pi ghanyiwa jjüya thsüa. 20Anyiza na ma ssiketen ti ghanyiwa na pvüza shagha. Ma Paran ghansha wi hang nu asakejügü kemehai nyi kesü sa. 21Ma jja na Ejipt nza kesü ya pi ma cü.

Abraham nu Abimelek Manyi Ajühcenkeya

22 # Ade 26.26. Tsü tsüwi Abimelek na ma süpahizi miwi kediwa Fikol ssiya nu wa Abraham wi kiza, “No kekuli tsüdi wi Anyiza na no ssiden. 23No khiela hi, itsangathu, nu ishicübvüghathu mechu nbenle khi Anyiza tuwi na kishenlo. Hi njühkina kegho ti no la hi nu no hang keben diyyiwa ha jühkina benle khishi chilo.”

24Abraham na khi, “Hi kishenben.”

25Abimelek maghathu na atssükhang kesü nkaya kesalina Abraham na tsü khipi Abimelek kiza. 26Abimelek na khi, “Thowa tsüti sa khe hi nchüle. No tsü cüki pi hi nkiza, nu hi khili ha atuwa tsü zayaben.” 27Tsaseng wi Abraham na khaghaneni nu mesüsi pahan pi Abimelek cü, nu manyi jüwi ajühcenya. 28Abraham na ma neni jawi ma zza tagü kupi ma kepa saya, 29nu Abimelek na ma keü, “No mangkesa na tsüti saben nu?”

30Abraham na khineng “Aneni zza tagü ha khuyalo. No ha yalethu majjügi hi atssükhang ha chhüle.” 31Tsalina apen tsüpi Beersheba#21.31: Beersheba: Anyan hawa ha Ibri jüh wina “Kekishen Tssükhang” nyelela “Tssükhang Tagü” (26.33 wi la ghangchi). le khi, kepaghenanye apen ciwi manyi qho kekishen sa.

32Manyi Beersheba wi kekishen kesa seng wi Abimelek nu Fikol manyi Filistia wi wa neng. 33Tsaseng wi Abraham na Tamarisk ton kesü pi Beersheba wi sheng nu anuphan Nyiza Apvüwa kinyi. 34Abraham na matsü kesie Filistia wi hang.

Currently Selected:

ADECHHÜ 21: RENGNBSI

Highlight

Copy