ADECHHÜ 20

Abraham nu Abimelek

1Abraham na Mamre wina apen ketsen sen nu Kanaan yyi acülawa Kadesh nu Shur manyi jüwi hang wa. Matsü keu seng wi ma wa Gerar wi hang keben wi 2#Ade 12.13; 26.7.ma wubvü Sarah tsüna ma tsüggüwale khi. Tsalina Gerar wi kadimiwa Abimelek na nyu kesun chi nu wa Sarah ssigho ma cü thsü. 3Ghaja kesü Anyiza na aman wina ma wi gho nu khi, “No shüa tendha; kepaghenanye no nza ha ssiyadha, ma nyu wubvü sadha le.”

4Isala Abimelek na nzawa kete wi nwa, nu ma khi, “Apvüwa, hi tsatan ben le! No hi nu inyithu yasaten kwe? 5Abraham ma ketanla ‘ma itssüggüwale’ khi, nu nzawa la ‘ma ibaghawale’ khi. Hi ileben methasi nu ha kuli, nu hi mangla nsazzile.”

6Anyiza na aman wina ma luneng “Anle, no nleben methasi tsü kuli kesa hi chüben, tsalina hi no ya ma nkidhen thsü nu no sami pi hi nshun thsü. 7Khili nzawa tsü pi ma wuba cü nenglo. Ma atusenjüh-kechü nyi kesü, ma nghena khie chithu no shü nben. Isala keujüla no nzawa pi ma ncü neng lethu chüyalo, no nu n-nyithu tsüdi shüaben.”

8Ghanenwa mitu na Abimelek na ma cakhu wi kedithu tsüdi cighuchi nu khati sa khe tsüdi khipi mathu kiza, nu mathu na messi ntsa sa. 9Tsaseng wi Abimelek na Abraham cichi nu ma keü, “No ithu miwi mangwa sadha nu? Hi ntuwi mangwa sazzi nu no agükeccü ha sengho imiwi nu hi kadiyyi wi chi ben nu? No imiwi sa kechiwa ha thola hati sa nben. 10No mangkesa na hati ha sa nu?”

11Abraham na luneng “Hi kemeshen hewi thola Anyiza kemessi nyi nmi nu mathu hi pathi nu iwubvü ssiya benshe sa. 12Ma ntsakhiwa itssüggüwa le. Ma iba nga, isala ijja nga nyele, nu ma iwubvü sa wadha. 13Tsalina Anyiza na iba jjen wina hi kesun pi asang yyi kechi wi hi ma wi, ‘No ijühkeya pi nyu ccücaya kemehai tsüna anyi tsüdi wi hi nbaghawale khilo,’ kiza.”

14Tsaseng wi Abimelek na Sarah pi Abraham cü neng nu aneni, amesüsi, nu amaghathu la pi ma cü. 15Ma Abraham wi kiza, “Ha maben iyyi! No khiewa no nen khe ciwi hanglo.” 16Ma Sarah wi kiza, “Hi rükatssü hazar kesü pi nbaghawa cü keben ma jjügi no gweghe kebenthu tsüdila no tsatan ben nu no nsazzi le kesa chüyaben.”

17-18Abraham wubvü Sarah ghena Apvüwa na Abimelek kadijjen wi nza kesüla atsanga mu meya thsüla. Isala Abraham na Abimelek ghena khie chi nu Anyiza na ma sapi mehai cü, ma wubvü nu ma maghalethu la sapi mehai cü nu mathu ya atsanga muya thsüa.

Currently Selected:

ADECHHÜ 20: RENGNBSI

Highlight

Copy