ADECHHÜ 11

Babilon Ducükezhü

1Adechhü wi ayyi nyi mabenla ajühjja kesü nu ajüh la kesütan. 2Mathu nishu wina kegoe sen nu Babylonia deshentijü kesü wi ghoya nu ciwi hang wa. 3Mathu khokho wi khi, “Ghalo, ithu na yimecanglon sa nu mecang kemehai saa na.” Isanu mathu na yimecanglon saya nu zententssü pi tsüthu zenghuya. 4Mathu khi, “Ithu anyunuti kesü sa nu ciwi aducü zhü senki akulu cu cü na, isanu tsüpi ithu nyan kemehai sa nu ithu ayyi tsüdi wi bvüzighe nwala na.”

5Tsaseng wi Apvüwa na dughola anyithu na sa ketheng anyunuti nu aducü tsü ghang, 6nu ma khi, “Khili anyi hathu ha tsüdila kesü nu mathu ajühjja la kesütan khiben; hawa ha mathu mangwa samvu ben khe tsü ketegü bendha. Mathu wan nu mangwa samvu ben khe tsü saya mehaidha. 7Tsalina ikhang cüla mathu jüh tsü pakivvü pi nu mathu ya khokho jühjja kekhi tsü nchü thsüla na.” 8Tsalina Apvüwa na mathu jügü zighe pi ayyi tsüdi wi chi nu mathu anyunuti tsü nsa thsüla. 9Anyunuti tsüwa nyan na Babilon,#11.9: Babilon: Anyan hawa ha Ibri jüh wina ‘saghukea’, kepaghenanye Apvüwa na ciwi anyithu ajühjja pakivvü pi nu anyithu ya ayyi tsüdi wi bvüzighe wa thsüa.

Shem Shicüthu

(1 Kc 1.24-27)

10Hathu hana Shem shicübvüghathu. Atssükedon seng amapi keni Shem kahang mapi 100 wi ma atsa kesü Arpakshad muya. 11Tsaseng wi ma amapi 500 hang nu atsanga kepa wi la muya.

12Arpakshad na amapi 35 wi atsa kesü Shela muya, 13ma tsaseng wi amapi 403 hang nu atsanga kepa wi la ben.

14Shela na amapi 30 wi atsa kesü Eber muya, 15ma tsaseng wi amapi 403 hang nu atsanga kepa wi la ben.

16Eber na amapi 34 wi atsa kesü Peleg muya, 17ma tsaseng wi amapi 430 hang nu atsanga kepa wi la ben.

18Peleg na amapi 30 wi atsa kesü Reu muya, 19ma tsaseng wi amapi 209 hang nu atsanga kepa wi la ben.

20Reu na amapi 32 wi atsa kesü Serug muya, 21ma tsaseng wi amapi 207 hang nu atsanga kepa wi la ben.

22Serug na amapi 30 wi atsa kesü Nahor muya, 23ma tsaseng wi amapi 200 hang nu atsanga kepa wi la ben.

24Nahor na amapi 29 wi atsa kesü Tera muya, 25ma tsaseng wi amapi 119 hang nu atsanga kepa wi la ben.

26Tera na ma kahang amapi 70 seng wi Abram, Nahor, nu Haran ma kecheng ba saya.

Tera Shicübvüghathu

27Hathu hana Abram, Nahor, nu Haran mathu ba Tera shicübvüghathu. Haram na Lot ba, 28Haran na ma ba hang keben tsüwi ma nyu Ur, Babilon yyi wi shüa. 29Abram na Sarai yaya, nu Nahor na Milka yaya. Haran na Milka nu Iska manyi ba. 30Sarai na atsanga nmi.

31Tera na ma tsa Abram, Haran tsa Lot, nu ma cünyiewa Abram wubvü Sarai ssiya nu mathu Babylonia wi Ur nyunuti tsü teshi theng nu Kanaan yyi wi wa. Mathu Haran yyi kecu wa nu ciwi hang wa. 32Tera na ciwi ma kahang amapi 205 wi shüa.

Currently Selected:

ADECHHÜ 11: RENGNBSI

Highlight

Copy