BVÜKESHHU 36

1“Bezalel, Oholiab, nu sapichü kepathu Apvüwa na saya kemehai, chüshikeya pi cü kethengthu, Nithsüjjen kemethawa kesa wi nsenthu keyishü tsüdila chü kebenthu na Apvüwa khi kechi tsüdi nieti nu saden.”

Anyithu na Ajuthu Kejon Sengho

2Bezalel, Oholiab, nu sapichü kepathu Apvüwa na saya kemehai pi cü nu nyu kiqa mvu ketenthu tsüdi cichi nu mathu kekuli sa shhu yilo kizachi. 3Mathu na Mosa wi Israel nyithu na Nithsüjjen kemethawa kesa ghena khukechi kekinyi tsanqaithu tsüdila muya. Isala Israel nyithu na ghanan kaghapengla mathu kekinyi tsanqaithu sen nu Mosa wi ghoben. 4Tsaseng wi sapichü kekuli sa kebenthu na 5Mosa kiza, “Anyithu na Apvüwa na salo khi kechi kekuliwa tsü sa keminni sengho bendhale.”

6Tsalina Mosa na anyi thola Nithsüjjen kemethawa kesa ghena atsanqai nkhuchila yilo kesa ahza kesun pi kemnanpen tsüdi wi chi, isanu anyithu na atsanqaithu nsengho la. 7Atsanqai saghu ketheng tsüna kekuli tsüdila sa keminni sadha.

Apvüwa na Ketenpen Nithsüjjen Kesa

(Bvü 26.1-37)

8Kekuli sa kebenthu jawi sapichü ntsathu na Apvüwa ketenpen Nithsüjjen tsü sa. Mathu na linen kemehai atsena, nmiepheü, nu ssenthsü kenmie pi de ketheng abe tagha, cherubim tsikezhü ma miwi degüki pi tsü sa. 9Kesüsü ma ketikesie meceqe, kesie meter taghakeni nu kemeza meter keni salo. 10Mathu na tsüthu manga degüghu pi kesü sa nu kepa wi manga tsü la pi makesü saya. 11Mathu na athsü keshen kesüsü wi atsena katen meiwa na tsü shenghu pi degüya. 12Mathu na kesüwa wi tsü athsü atuwa miwi keshenghu deni saya nu tsü makesü keniwa wi athsü asakhenwa miwi keshen deni saya. 13Mathu na suna pi adhasü deni saya nu tsüpi keni tsü ceghu pi kesütan sa thsü.

14Tsaseng wi mathu na aneni ssenthsü abe taghakhen pi Nithsüjjen tsü keshon ghena kesü saya. 15Mathu na tsüthu tsüdila ketikesie meceqe, kesie meter tagha kecheng nu kemeza meter keni saya. 16Mathu na tsüthu manga degüghu pi kesütan sa, nu kepawa tugho tsü la pi kesü saya. 17Mathu na kesüwa wi athsü asakhenwa katen miwi keshenghu deni saya, nu kepawa katen miwi la keshenghu deni saya. 18Mathu na lezza pi adhasü saya nu tsüthu pi athsü keni tsü ceghu pi keshonthsü kesü saya thsü. 19Mathu na keshanji keni, kesü na aneni süpon hyu ghang pi kenmie nu kepawa asahyu kemehai pi sa nu pi ameiwa keshan saya.

20Mathu na akakia chan pi Nithsüjjen chan-güthu meshonqhe saya. 21Ajjen chan kesüsü kesie meter mejü nu kemeza senti- meter achentugho nu tugho saya. 22Ajjen chanthu tsüdila zanghuyale kesalina akhuki kenini meceqe zankiya, ajjen chan-gü mabenla tsüti saya. 23Mathu na acülawa ghena achan-gü ngwe saya, 24nu rükatssü pi ma donbvü kesheng ghena jügha sapi tsüthu ccü wi chi, ma donbvü keni pi achan kesü wi ma khuki kewenphi kesüsü tsükiya. 25Mathu na Nithsüjjen na aghawa ghena achan-gü ngwe saya, 26nu rükatssü pi ma donbvü kesheng ghena jügha saya, achan kesü wi ma donbvü kenini. 27Nithsüjjen sengwa niduwa ghena achan-gü tugho saya, 28nu achan-gü keni na ma ccügwenthu ghena. 29Accügwen chan-güthu ha ma ccü wi bhenghu nu tsüti sa senshu ma li cu. Ma ccügwen keni wi achan-gü keni tsü makesü sa. 30Tsalina ciwi achan-gü tazen wi tsü rükatssü pi kesa ma donbvüthu tagha nu tugho na ben, ma donbvü keni na achan-gü kesü ghena.

31Mathu na akakia chan pi kenthsü ghena tagha manga saya, manga na Nithsüjjen katen wi achan-gü manga ghena, 32manga na ma katen pahanwa ghena, nu manga na niduwa asengwa chan-gü ghena. 33Kenthsüchan anonwa tsüna gishü pahan ketan pi achan wi chi, Nithsüjjen katen pahanwa na wa pahan kecu tsüti saya. 34Mathu na suna pi achan-güthu tsü mejuya nu tsüthu pi suna qei wina suna pi meju ketheng kenthsüchan tsü gheya.

35Mathu na linen kemehai atsena, nmiepheü, nu ssenthsü kenmie pi de ketheng pi keshonthsü kesü sa, nu cherubim tsikezhü pi tsü miwi degükiya. 36Keshonthsü tsüpi hagile kesalina mathu akakia chan pi zenza mejü sa nu suna pi mejuya, nu suna dhasüthu la pi chiya. Tsaseng wi rükatssü pi ma donbvü mejü saya nu azenzathu zantenya. 37Nithsüjjen wi kedulen ghena mathu na linen kemehai atsena, nmiepheü, ssenthsü kenmie pi de nu ayakhu ketheng pi keshonthsü kesü saya. 38Keshonthsü ha ghena mathu na azenza manga sa nu adhasüthu pi chiya, nu suna pi tsüthu mabenla mejuya, nu lezza pi azenzathu ghena ma donbvü manga saya.

Currently Selected:

BVÜKESHHU 36: RENGNBSI

Highlight

Copy