BVÜKESHHU 35

Sabbath ghena Ayenthu

1Mosa na Israel nyi azitenti maben cighu chinu mathu kiza, “Nthu na ha salo kesa Apvüwa na ahza khuchitheng. 2#Bvü 20.8-11; 23.12; 31.15; 34.21; Lev 23.3; Aye 5.12-14. Nthu na ghanan tugho jüwi nthu kekuli saya, isala tagü ghananwa tsü samethaya, tsüna kemnan tsathang satemetha pi hi Apvüwa wi chidha. Anyi thowa na tsü ghanan wi kekuli sa khe ma pi shü thsülo. 3Sabbath tsathang wi nthu jjen wi anni la nsala.”

Kemetha Nithsüjjen ghena Kekinyi kesa

(Bvü 25.1-9)

4Mosa na Israel nyithu tsüdila kiza, “Anyiza na ahza ha khuchitheng: 5Kekinyi kesü sapi Apvüwa cülo. Anyi kesü le kesü lela tsüti samvu kebenwa hathu sengho kekinyi saben: suna, rükatssü, nyelela lezza; 6linen kemehai; atsena, nmiepheü, aneni ssenthsü kede; 7aneni süpon hyu ghang pi nmieni sa ketheng; asahyu kemehai; akakia chan; 8ahula ghena deli; kenyenji deli nu hankedemvu ghena cüdemvuthu; 9keqhaikedi ntsawa deshi keqhan nu depfü kewhengthsü wi kechi ghena karnelian nu alon men kedhu kepathu.

Apvüwa Ketenpen Nithsüjjen wi Atsanqaithu

(Bvü 39.32-43)

10“Nthu jawi sapichü nyi tsüdi gho nu Apvüwa na salo ahza khukechi tsüdila salo: 11Anithsüjjen, ma kemeju nu ma kemeju ameiwa, ma dhasü nu ma chanthu, ma kenthsü, ma zenza nu ma donbvüthu, 12Cenkethenjüh Khitson, ma chan nu ma keshan, nu ma keshonthsü; 13miz, ma chan nu ma tsanqai tsüdi; amesa pi Anyiza cü kesawa; 14kewegü ghena ahula kedonpen nu ma tsanqai; ahula nu ma deli; 15hankedemvu kemecang ghena kekinyipen nu ma chan; kenyenji deli; hankedemvu; Nithsüjjen jenka keshonthsü; 16ma miwi mecang pi kinyi keten penwa, lezza pi anyagha kesa, ma chan, nu ma tsanqai tsüdi; akwenkemetsikhu nu ma kedonpen; 17keshondhi keshonthsü, ma zenza nu ma donbvüthu; shonkevüli jenka keshonthsü; 18Nithsüjjen kejetenji nu ma thsü nu ma shonkevüli; 19nu keqhaikedithu na Kemetha Pen wi kekuli kesa wi kepvü thsümenithu —Aaron nu ma tsathu ghena thsümenithu kemetha.”

Anyithu na Mathu Kekinyithu Senkegho

20Israel nyithu tsüdila Mosa tuwi na bvüa, 21nu tsüti samvu kebenthu tsüdila Apvüwa ketenpen Nithsüjjen sale kesa ghena kekinyi sapi Apvüwa cü. Mathu na kekinyi ghena nu keqhaikedi thsümeni kesa ghena nsenthu keyishü tsüdila sengho. 22Tsüti samvu kebenthu npvüzale nza lela tsüdila akhwesa, akhuna thighi, kwenzza keqhan, ayanthu, suna nu alon menkedhu tsanqai tsüdi sengho satemetha pi Apvüwa wi chi. 23Linen kemehai; atsena, nmiepheü, nyelela ssenthsü kenmie, aneni ssenthsü kede, aneni süpon hyu ghang pi kenmie, nyelela asahyu kemehai, anyi hathu ha kebenthu tsüdila sengho. 24Anyi rükatssü nyelela lezza khuchi ya kemehaithu tsüdi mathu kekinyi sengho Apvüwa wi chi, nu akakia chan pi kekuli katsüha kesa wi senya kemehai kebenthu na tsü sengho. 25Nza ajikujuthu tsüdila mathu sa ketheng linen kemehai nan nu atsena, nmiepheü, nu ssenthsü kenmie nan sengho. 26Mathu na aneni ssen pi anan la sa. 27Accülikesathu na pi depfü kewhengthsü nu deshi keqhan miwi chile kesalina karnelian nu alon menkedhu kepathu la sengho, 28nu cüdemvuthu nu ahula ghena deli, kenyenji deli, nu hankedemvu ghena. 29Israel nyithu na tsüdila Apvüwa na Mosa wi salo kekiza kekuli tsü samvu kesalina mathu kekinyi sen nu Apvüwa wi gho.

Apvüwa Ketenpen Nithsüjjen ghena Sapichüthu

(Bvü 31.1-11)

30Mosa na Israel nyithu kiza, “Apvüwa na Judah mizza wi Hur tsawa Uri tsa Bezalel kessiyadha. 31Anyiza na kekhang pi ma pong cü nu sapichü, saya kemehai, nu kekuli tsikemehai tsüdila chüshikeya kekhang pi ma cüdha. 32Sapichü ntsa nu ma tsisa, nu suna, rükatssü, nu lezza sen nu kuliya kemehai ghena; 33alon menkedhu ha, achan kuho ghena; nu kekuli tsikemehai tsüdila saya kemehai ghena. 34Apvüwa na sapichü cho pi nyu kepa wi sansiya kemehai pi ma nu Dan mizza wi Ahisamakh tsa Oholiab manyi cüdha. 35Ma anyonsu kepvüthu, ayakekhuchüthu, nu kedechüthu na linen kemehai; atsena, nmiepheü, ssenthsü kenmie, nu athsü kepathu deya kemehai cho tsüdi pi manyi cüdha. Manyi na kekuli tsüdi wi lela sapichü ntsa nu ayakekhuchü nyi.”

Currently Selected:

BVÜKESHHU 35: RENGNBSI

Highlight

Copy