ZEKARIA 7
7
Ketsin nyu Nyen Kemvu Genyu Npugü Le Nmukethyü
1Darius le raja thyü kelo chen zi ka shye tekü gü (Kislev shye) jon zinyü Npugü le jolo nme pe atsü shü. 2Bethel temi le Sharezer lo Regemmelek au lo anyugun temi nipe Kekvutsin Npugü Kershvuka ki Npugü jochü hi lotse, 3lo Püshükeda nyu lo sidyükesha nyu ka johi ketso lotse shü: “Kershvuka nke kela genyu agun le chen kethon thyü ryü kela hontse, Shyepvün gü ka nyen-o chechü kehü tsüno bin tile nmvu la?”
4Npugü jolo le aka keryü le hi gü hi: 5A-le zoshü, “Kazü günyu temi lo püshükedanyu dan ka zoshülo, anyugun le chen hentsenyü jaka shyepvün lo shyetsenyü ka nyen lo chechü kehü tsüle akerühvu genyu mvu le. 6Lo anyugun le tyütsü kehü tsü le anyugun npvü ketegvü kehü nti le.”
7Keriki Npugü le sidyükeshanyu mün nyu Jerusalem le gwakenyeo temi le kesü thyü, lo nyida gü kehun rünyi dan ka nti mvule tesin kipon lojvü lo nkhünzin rincho pha ki-e temi kechon le kebin gwünkho ka hizo shü.
Jozenkemvu Genyu Medothyü Tinkela
8Npugü le jolo higü pe Zekaria tsüshü: 9“Ale nduka nyu johokeshü hidan hi pe atemi tsüshü. ‘Hagun le kenjü gü thyü lo, lo khinyunyu so lo njün lo mvu loshvu. 10Maginyu, tegonyu, hagun dan nyu yhun kebin tesin dan, nmvue rhokedyü nyu ligü higü nshwe nya. Lo khinyunyu nthyü nnyü titse ndo nyalo,’ tsonshü.
11“Ai atemi dan le anyugun nyunrüo nyümvu. Anyugun le anyunyun khin lola 12anyunyun thyü pe tso kenko hontse la. Anyugun le nduka ale sidyükeshanyu mün nyu zokeshü senkethyü jo nyümvu kela genyu ale anyunta sala. 13Ale zo ketse ka anyugun le nyükemvu genyu anyugun le hi keshü ale kenishü mvula. 14Tsangkenbu terhi hontse ale anyugun whün sen gü no sinrünyi kecha kazü nyu yhun tinla. Kazü kegwa higü khe pe bin kenrun nme thyüla, tsünyu temi nme no yhun mvu lati.”
Currently Selected:
ZEKARIA 7: REGSBSI
Highlight
Share
Copy
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
