ZEKARIA 6
6
Tsemi Ki Kerugari Pezi Kehyu
1Ale tsemi kecha nme hyu. Terigari pezi le lazo kazüthun kenyhun janyu chwiryü. 2Terigari keri gü le Keru kenhon le süpfü, lo kenyhun gü le keru kemetsen, 3Kenshan gü le keru kechon lo pezi gü le keru kemeren. 4Tsüselo ale lilo gü ketsoshü, “Kedagü, terigari hidan hile a-kon le nyu la?”
5A-le a jokenishü, “Hile tsangkenbu pezi dan le; anyugun le kazü aphu Npugü mhundyü nyu hütseo ntsoka ryü bin nle.”
6Keru kemetsen le süpfü kehü Terigari gü le tesozin Babilon ki güjü, keru kechon gü le nkhünzin güjü lo keru kemeren le tesinzin kazü dan ki güjü nle. 7Keru kemeren dan le chwiryüo, kazü gü rhi titseo khwelo ho bin. Tsangge lo gü le zoshü, “Gü kazü gü rhi shülo!” - tsontsin anyugun le tsü thyüshü. 8Tsüsika Tsangge lo gü le nrao akoshü, “Tesozin Babilon ki nsin kela keru dan le Npugü nyunkenta thyü nbwe shü laso.”
Raja Perün Pe Joshua Npfü Lotse Johokeshü
9Npugü le jolo hi pe atsüshü. 10A-le zoshü, “Me kazü ki dothyü tinkela Heldai, Tobijah, lo Jedaiah tsele jwe khikeshü sen whütse Zephaniah nyu gü Josiah kaki gülo. Temi hidan aphu Babilon ki dothyü tseo raniryü laso. 11Anyugun le khikeshü rakagi lo suna pe raja perün nme thyülo-o pe Püshükengun gü Jehozadak nyu gü Joshua perün shülo. 12Kekvutsin Npugü le zobin nle, ‘A-ro gü tse kokelo temi gü le a-le kebin bin nyu gwa loti tson-o Npugü Kershvuka gü thyüni ti. 13Tsü thyüni shü nrün gü tsüle a-le lo raja nyu hontse kerühvu hyulo-o a-temi so keda thyüti. Püshükeda nyu nme le a-rajakhen khoka soti, lo au le nyunbwe lo kengü gwao thatho thyüti.’ 14Raja perün gü le Heldia, Tobijah, Jedaiah lo Josiah dan keruhvu genyu Npugü Kershvuka nyu rüchün hü nrün nme thyüti.”
15Nithen ki yhun kehü temi le ryü kecheo Npugü Kershvuka gü thyüni ti. Lo tsü thyüpen lolo, Kekvutsin Npugü le anipe hagun kishü letse hagun le sha loti. Hagunle Npugü hagun Sunggigü le johokeshü zen pen shüya tselo hi aphu thyü loti.
Currently Selected:
ZEKARIA 6: REGSBSI
Highlight
Share
Copy
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
