ZEKARIA 5
5
Tsemi Ki Lesü Swü nme le Nyekehü Kehyu
1Ale nri nishü laryü, lesü swü nme le tsangneki nye kebin hyu shü. 2Lilo gü le ale nyu hyuyo tse aketso shü: Tsontsin ale a-jokenishü, “Lesü swü nme le tsangneki nye bin, a-kethon le miter tekü lo keda le miter pezi-o peha tse le.”
3Tsüselo a-le aka zoshü, “Tsüge--kazü apentha nyu gun nrün shochün dan thu binnle. Peha zin le kazü nyu kerühu nyu aphu khila ti tse zobin; lo kechazin zo kenjü le nkü-o swe kehü nyu ko aphu sentin lati tse njü. 4Kekvutsin Npugü le zobin, a-le shochün higü nishwi shüti, lo tsüle kerühu nyu lo nku-o swe kehünyu aphu kanyu yüti. Tsüle anyugun kanyu bin ti, tson-o anyugun nke lati.”
Tsemi Ki Rokhu Nme nyu Tenugi Kehyu
5Lilo gü le nichwiryüo, “Shwishü! Tha peha le niryü jü nle!” tse zoshü.
6“Nyula?” tse ale ketsoshü.
A-le a jokenishü, “Tsüle rokhu nme, lo tsüle kazü apentha kemu sunka bin nle.”
7Rokhu gü le gin pe a-kesen thyü. Ale nribin laryü a-kesen gü penso shü ntsin tenu nyu nme le rokhu tsügü nyu dun bin!
8Lilo gü le zoshü, “Tenunyu higü hile serikemvu zansü le.” Tson-o a-le tsügi chwenketo pe rokhu günyu shüo a-kesen pe sen nila. 9Ale ngiso shü laryü zügü hontse a-sekin kvusa kepfü tenunyu mihvu le nyeo akipon ryü kejü hyulo. Au le rokhu gü ndu pen-o tinla. 10Ale lilo gü ketsoshü, “Au le tsü sen-o dikipon gü jü nla?”
11A-le a jokenishü, “Sen-o Babilon ki gü, anyugun le tsü genyu kershvuka thyüti. Kershvuka gü thyüpen lalo, rokhu gü rüshvu nrün genyu pe tsünyu bin lati.”
Currently Selected:
ZEKARIA 5: REGSBSI
Highlight
Share
Copy
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
