MATHI 5

Jisu le Kazüthun ge Me Senkethyü Binzen Jo

1Lo Jisu le temi danda dan hyushü njüo rincho ge gunla. Lo gungü binlo ntsin a-sithen kehünyu dan le a-ki ryü, 2tsüselo a-le a-mün khope anyugun senthyü keshü le hihontse:

Jochü Kepvü Tsinnyu

(Lk 6:20-23)

3“Kapu kipon rhokedyü nyu le

jochü kepvü tsin;

kechamvule tsangge keda le

anyugun hon genyu!

4“A-nyun kenjünkethyü ju le jochü kepvü tsin;

kechamvule tsüdan le a-nyun bwenlo nrün genyu!

5“Ketekho kemvunyu le jochü kepvü tsin;

kechamvule kazü pe anyugun hon thyülo

nrün genyu!

6“Kentsen füo kenyoketeri thyü kehünyu le

jochü kepvü tsin;

kechamvule anyugun ginnyülo nrün genyu!

7“Me shwinjün kehünyu le jochü kepvü tsin;

kechamvule tsüdan shwikenjün hyulo nrün genyu!

8“A-nyun Kenshün nyu le jochü kepvü tsin;

kechamvule tsüdan le Sunggigü hyulo

nrün genyu!

9“Gwaketho füshü kehünyu le jochü kepvü tsin;

kechamvule tsüdan le Sunggigü nyu,

tse kolo nrün genyu!

10“Ketsin jo genyu me no nshwen nyhün kehünyu le

jochü kepvü tsin;

kechamvule tsangge keda le anyugun hon genyu!

11“A genyu me no hagun nkhin, lo hagun nshwen lo nkuo hagun ge jogwakemvu aphu zolo, hagun le jochü kepvütsin. 12Hagun sherhünlo, lo hagun kenyü rilo, kechamvule tsangge hagun chün gwasa nrün genyu; tsühontse me le nduka hagun mhundyü kehü sidyükeshanyue nshwen nyhün sa ryü.

Tsip Lo Keben

(Mk 9:50; Lk 14:34-35)

13“Lo hagun le kazü tsin so, ai tsi-e a-keyhün ndila yatselo, nyu lope thyü nyhün lo mon? tsüselo thalihi mvulao shwen pe me no kedüla hünyo.

14“Hagun le kazü keben gü. Rincho ge kebin rünyi le me le a-hyu mvula hümvu. 15Nmvue me le mah nben pe tha hensin ki mvule makenben bin ge shü njü hünyo; tsonyatselo ka nyukebin nyu aphu gwün nbenlo hünyo. 16Tsühontse me no hagun tho kegwa hyuo tsangge kebin hagun Pvü zankechwi thyülo nrün genyu hagun keben pe me gwün nben lochi.

Jisu Le Tejvü Senkethyü

17“Hagun Ale sidyükeshanyu ju jo lo tejvü gü bokemhenla titse gunryü letse kethyü rüchün nya nye. Ale tsü bokemhenla titse mvule thyü penshü titse gunryü. 18Lo ale hagun ka zo tsentsüshü ti, tsang lo kazü ndila kemvuthen lo tha hi aphu thyüla kemvuthen tejvü nyu i nme lo kethu jvü nme-e thame thyüo ndila loho. 19Tsügenyu temi ligü higüe johokeshü keshen tsin dan nyu jo nme gwünrho, lo tsü zope me senthyü yatselo, tsangge keda nyu a-no keshentsin thyü ti; ai temi ligü higüe tsü thyü zenlo zope me senthyü shülo, tsangge keda nyu keda thyü ti. 20Tsüntimvule ale hagun ka zoshü ti, hagun le lesükesha tsinnyu lo Farisinyu kegwa nyeki gwakvu mvu yatselo, hagun le thame thyüo tsangge keda nyu yülo nrün ndi.

Nyunkenta Rüla Senkethyü

(Lk 12:57-59)

21“Nduka zo kenjü tsü hagun le nyülo laso, ‘Me dushvu nya; temi ligü higüe me dushvulo, jokera nyu kenshvu le bin nyo.’ 22Ai ale hagun ka zoshü ti: temi ligü higüe a-kon a-ni kendi ka a-tsasikezen nyu ge a-nyuntalo jokera bin nyu kenshvu le bin ti, lo temi ligü higüe a-tsasikezen nyu rholo pelü ju kehun ka kenshvu le bin ti, lo temi ligü higüe, ‘Nle kennunyu,’ tsonlo Gehena mah nyu kenshvu le bin nyo. 23Tsügenyu nle tha sen-o kershvubin ge kegun ka, n tsasikezen nyu ge kenyokenyü kethyü nsi rüchünlo; 24tson-o nle tha sen kegun gü khipe kershvubin mhundyü nyu binla njüo, gun gü n tsasikezen nyu zen-o kegwa thyüla rio, tsüsiki nyu gunryüo tha tsü hoshü chi.

25“Lo nle nge kenyo kebin gü zen-o tsonne nyu kengügwa whütselo chi; nmvu yatselo nge kenyo kebin gü le nten pe jokera kehü güben nyu shüla ti, lo jokera kehü gü le nten pe kedagü ben nyu shüla ti, tson-o nten pe doka nyu shülae shamvu. 26Ale nka zo tsentsüshü ti, nle gungü pisa nme-e tho penla kemvuthen we thame thyüo tsünyu chwilo nrün ndi.

Keyüla Rüla Senkethyü

27“ ‘Nle keyüla loshvu,’ tson kenjü hagun le shalo semon? 28Ai ale hagun ka zo tsentsüshü ti, temi ligü higüe keyüla nyüo tenunyu nri yatselo, a-nyun ki tsügi zen-o keyüla laso. 29Lo nyhütyü njüzin le nthyü nshvulo nge tsü tseritho pe shwenla chi: kechamvule nmin aphu pe Gehena mah nyu shüla nrün we nthyü jünme ndi kela gü le nkechwi genyu. 30Tsüntimvule nben njüzin le nthyü pe nshvulo, nge tsü duthü pe shwenla chi: kechamvule nmin aphu pe Gehena nyu rola nrün we nthyü peha ndi kela we nkechwi genyu.

Kami Kenrho Rüla Senkethyü

(Mt 19:9; Mk 10:11-12; Lk 16:18)

31“ ‘Lo temi ligü higüe a-nu khela titselo a-khekela lesü pe tsünye,’ tsonkethyü thu njü. 32Ai ale hagun ka zoshü ti, temi ligü higü keyüla genyu kemvu we a-nunyu khela yatselo, a-no keyülanyu thyüla hünyo; lo temi ligü higüe me le khekelagi lo yatselo, a-ko keyüla laso.

Keswe Rüla Senkethyü

33“ ‘Tsüntimvule nle nkuo swe nya, ai Sunggigü kipon swe-o zope bin kenjügü thyü penlo nye,’ tson-o ndukanyu le zokenjü hagun le shalo laso. 34Ai ale hagun ka zoshü ti, thame zo-o swe nya; tsangge zo nya, tsüle Sunggigü Raja bin. 35Kazüe zo nya, tsü le a-pha bin genyu; Jerusalem ko zo nya; tsüle Rajagü rünyi genyu. 36Tsüntimvule nle npe-e zo-o swe nya, kechamvule nle shüntsü nme-e thyü pe chon nmvue metsen loho kethyü genyu. 37Ai njo no ‘Ele’ tselo ele, ‘Nmvu’ letselo nmvu letselo; nmvuo tsünyeki chonla yatselo tsüle gwakemvu gü kanyu chwikeryü laso.

Khün Zoni Nyalo Tsekethyü

(Lk 6:29-30)

38“ ‘Yhütyü nme lo yhütyü nme, hü nme lo hü nme tsonti; ’ tson kethyü zo kenjü hagun le shalo laso. 39Ai ale hagun ka zoshü ti, gwakemvu nyu hontse nya; tsonkethyü mvule me le njon njüzin vüshülo kecha kipon-e kerüni pe tsü nye. 40Lo me le nmirün lonyüo nzen gun gü jokera titselo, nphi-e sin pe tsü nye. 41Lo temi ligü higüe n kemvuthyüo nzen-o mail ja nme güti tselo, zen-o mail kenyhun-e gü nye. 42Me le nka tha hilo, pe tsüshü nye; lo me le nka tha tepu kenyü nyu nrhila nya.

Nshwikerüchünnyu Keso

(Lk 6:27-28,32-36)

43“ ‘Nle n kazonkazin solo, lo n shwikerüchün nyu shwirüchünlo,’ tson kezo hagun le shalo laso. 44Ai ale hagun ka zoshü ti, hagun rinyu solo, jochü pe hagun swetsü kehünyu tsülo, lo hagun nshwen kehünyu genyu hilo. 45Tsonlo yatselo hagun le tsangge kebin hagun Pvügü nyenyu thyülo ti; kechamvule a-le a-yhüko gü no kegwanyue gwakemvunyue benshü hünyo, lo tsangri pe kenjünyue lo njü kemvunyue tsüshü kehü genyu. 46Tsonmvuo me le hagun so kehünyu nti so kehü gwünzin yatselo hagun le nyu hyulo mon? Khajana keshvunyue tsühontse hü mvu ole? 47Lo hagun le hagun tsasikezen nyu nti rühvu kehü gwünzin yatselo, tsü le tha ole? Sunggigü shakemvunyue tsühontse thyülo hü mvu ole? 48Tsügenyu tsangge kebin hagun Pvü le gwati kethyü hontse hagun ko gwatilo nye.

Currently Selected:

MATHI 5: REGSBSI

Highlight

Copy