HAGGAI 2

Kershvuka Keshün gü Kezegwa

1Chen tsügü shye tsenyü gü jon nkipvün nyü Npugü le sidyükesha gü nthon nishü. 2A-le Haggai no Juda Ahng gü Zerubbabel, peshü kengun gü Joshua lo temi dan ka zoshü lotse shü. 3“Hagun dan nyu temi nme-e Kershvuka gü le dihontse zegwa hüyo rüchün bin le nmvula? Ntsoka hagun le tsü nri keshü le dihontse la? Tsüle tha lihi kemvu. 4Ai hagun nme shese nya. Thatho gü thyülo, ale hagun zen kehü genyu. 5Hagun le Ijipt nyu chwikeryü ka, ale hagun zenzin hüti tse zoshwishü njü nyo. Ale hagun zen hüzun, tsügenyu nshvu nya.

6“Thon mvu tse ale tsang, kazü, lo züda sükenu shüti. 7Ale senye aphu süshe lati, lo anyugun kenya sen hika ryü ti, tson-o kenya pe Kershvuka gü kesü thyü shüti. 8Kazünyu suna rüka aphu ahon. 9Kershvuka keshün gü le a-when gü nye zegwa kvuti, lo ale tsünyu gwakenye kelo lo nyunkebwe pe a temi tsüti.” Kekvutsin Npugü le zoshü.

Sidyükesha gü le Peshükeda gü Zen Kegwensha Kethyü

10Darius le raja thyü kelo chenhvu gü shye tekü jon nkipezi nyü, Kekvutsin Npugü le sidyükesha gü Haggai ka zonishü. 11A-le zoshü, “Peshükeda gü ka ketso kebin higü shün shülo: 12Temi peha le rora thyüo thyünshün kela thyü sime khipe a-bola ketseyho hensin shü senhü. Tson-o a-bola phi le tensü, chvü, vainzu, oliv ter, nmvue ketyüketsü lihi-e kesü lalo tsü le chvü tsügü ko thyünshün lo gwa ole?”

Tson ketso keshü ka Peshükedanyu le zoshü, “Nmvule.”

13Tsüselo Haggai le ketsoshü, “Keshanyu laka temi nme le simin kesü kela genyu rhula. Tson-o a-le ketyüketsü lihi-e kesüshü yatselo, tsüle anyugun ko nrhu la tile mvula?”

Peshükedanyu dan le zoshü, “Ele.”

14Tsüselo Haggai ale zoshü, “Npugü le zokebin le, temi hidan lo anyugun le thyü keshü lihi-e tsü a-kenme; tsügenyu anyugun le pe kershvubin ge keshü lihi-e nrhu laso.”

Npugü Le Jochü Shüti Tse Zoshwikeshü

15Npugü le zohü, “Hagun ge nyuthyü shüyo hagun le shamvu ole? Hagun le Kershvuka gü thyüni keso mhundyü, 16shye thunme le kilogram tsihvu ndo lati ado tse ndo gülo tsime nti hyulo, hagun le tsun nme nyu vainzu liter tsime run loti ado tse binlo henzi nti le bin. 17Ale keyün kenhi lo tegwen nishüo hagun le no yhun soryü titse kebin dan nke lahü, ai hagun le nyun kelu lomvu. 18Nthu hile shye tekü gü jon nkipezi, Kershvuka phasin pe shüpen kela jon, Nthu gerho dihontse shütiyo shwi binlo. 19Shye ndi layatse-e, lo vainsha, kherobin, kheratyü lo oliv bin le nshamvu zun yatse-e, ntsoka gerho ale jochü pe hagun tsüti.”

Npugü le Zerubbabel Ka Johokeshü

20Tsünyü shye jon nki pezi nyü Npugü le jolo kenyhun gü pe Haggai tsüshü 21Zerubbabel, Juda Ahng gü genyu: “Ale tsang lo kazü sükenu shü tiya bin nle 22lo rajaphen dan khishela lo anyugun kekvu no kenithyü lati. Ale kerugari lo tsü keranyu dan bokekhün lati; keru dan le si lati lo tsüge kedun dan le khinyu nyu dushvu lati. 23Tsünyü ale nkhi loti, a gogü, Zerubbabel, lo ale nno azan nyu keda thyü ti. Ale kejükelo gü tsü le nle.” Kekvutsin Npugü le zoshü le.

Currently Selected:

HAGGAI 2: REGSBSI

Highlight

Copy