HAGGAI 1
1
Kershvuka thyünilo lotse Npugü le johokeshü
1Darius le Persia raja thyü kelo chenhvu ka shyetsero gü jon kerinyü, Npugü le Haggai münnyu zoshü. Jo gü pe Juda Ahng gü, Zerubbabel, Shealtiel nyugü lo Peshü kengun gü Joshua, Jehozadak nyugü au tsü shü.
2Kekvutsin Npugü le Haggai ka sozhü, “Temi hidan le hile Kershvuka thyünikethyü gwenkho mvule tse zo.” 3Tsüselo Npugü le sidyükesha gü Haggai münnyu jolo higü khishü: 4“A temi dan, a Kershvuka le nrho pe tson bin lo nyuthyüo hagun le ka kegwagwa nyu yhun bin nla? 5Hagun ge dihontse bin yo hagun le hyumvu ole? 6Hagun le ntsi kechon shüshü, ai keshanyu nti gvülo. Hagun le tyü, ai hagun ginnyü lomvu. Hagun le vain zu tsü, ai nzeü lomvu! Hagun le phiben ai yün lomvu. Lo thatho kethyü nyu le sen mvulo keshvu chün lomvu. 7Nyuthyüo hihontse bin yo hagun le shamvu ole? 8Ntsoka rincho ki nsin gü tesen bosen ryüo Kershvuka gü thyünilo; tson yatselo ale akenyü ti lo a kendo hontse arüshvu loti.
9“Hagun le kechon gvü kelo rüchün bin, ai keshanyu nti gvülo. Lo hagun le gvü pfü kaki ryülo, ale nmhü pe shwela. Nyugenyu ale tson shüla? A Kershvuka le nrhobin lo hagun nmeme tse a-npvü a-ka thyüo ra kebin genyu le. 10Tsügenyu tsangsri shümvuo thame tsüyhun lomvu. 11Ale tsangken senryü- rincho ge, lonyu, vain low, oliv low, lo kazünyu yhun soryü nshashü kehü aphu ge, temi ge, senru ge lo hagun le no tsüyhun titse kehü aphu ge shü laso.”
Temi dan le Npugü Johokeshü Zenkelo
12Tsontsin Zerubbabel, Joshua lo Babilon ki medothyü hüo rani keryü nyu aphu Npugü anyugun Sunggigü le anyu no nyuthyülo tseyo tsü thyülo. Anyugun le nshvuo sidyükesha gü Haggai, Npugü jolo senkeryü gü jozen lo. 13Tson-o Haggai le Npugü jo pe temi dan ka zoshü: “Ale hagun zen hüti- ale tsü zoshwishü bin nle.” 14Npugü le anyugun nmeme tse thukeyhun pe Kershvuka tha thyü nyülo: Zerubbabel, Juda Ahng gü, Joshua peshü kengun gü, lo medothyü hüo ranikeryü nyu aphu. Anyugun le Kekvutsin Npugü, anyugun Sunggigü Kershvuka gü thyü so, 15Darius le raja thyükelo chen hvuo shyetsero gü jon nkipezi nyü.
Currently Selected:
HAGGAI 1: REGSBSI
Highlight
Share
Copy
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
