APOSTELNYU THO 21

Paul Le Metita Nyu Bin-o Jerusalem Nyu Kegun

1Tson-o anyugun zen kekhola ntsin run ge gungü Kos tilo-o tsüsinyü Rhodes nyu gunlo, lo tsünyu Patara nyu gunryülo. 2Lo tsünyu tsü Fonikia nyu kegun run nme hyulo-o agun le run ge küo tsonchü shü. 3Tson-o gungü Kupra kazü ngwenzin kebin hyushü njüo Siria kazü nyu ryüo Tur rünyi nyu chwiryülo. Kechamvule run nyu tha pvü kehü dan khipe rünyi tsü nyu shüla titse kehü genyu. 4Lo rünyi tsünyu senthyükelonyu dan me le bin-o hyulo, tsügenyu agun le jon tsenyü tsünyu bin tinla. Lo tsükatsü anyugun le Kenshün Kapu nyu shalo-o Paul no Jerusalem nyu gun nyalo tse zo sola. 5Lo jon tsükho pen kela siki we agun le tsonchü nishü; lo tsükatsü anyugun le anyugun nunyu lo anyugun nyenyu aphu zen sin tseo agun zen chwiryüo chwida ngwenki shü. 6Tson-o agun le kengüo züda seka khosen-o kehithyü shüo tsüsika kekho la, tson-o agun le run ge külo, lo anyugun le anyugun rünyi ki gunla.

7Lo tsüsika agun le Tur nyu tsonchü shüo, Tolemai tikelo siki we zü nyu tsonchü sin mvula; lo agun le gungü tsünyu npvünyu hyulo-o anyugun kelushü, tson-o khenyü me anyugun zen bin tinla. 8Lo tsüsinyü agun le Kaisaria nyu ryülo; tson-o anyugun mi tsenyü dan nyu jolokegwa sen-o me senthyü kehü gü, Filip ka nyu yüo a-ka nyu binlo. 9Lo temi tsügü le anyenyu sidyükesha jo zokehü lünyu mizi le bin hü. 10Lo anyugun le jon keshanyu tsünyu kebin ka, Agaba tsekethyü sidyükeshanyu nme le Judia nyu nshyeryü. 11A-le agun ki gunryüo Paul senkephin khipe a-npvü a-pha a-ben phinlo-o zo, “Jerusalem nyu kebin Judanyu dan le hihontseo senkephin higü khipe senkephin higü senkehügü phinlo-o a-khipe Juda kemvunyu ben nyu shüla titseo Kenshün Kapugü le zo hü nle nye.”

12Lo tsükatsü agun le jo tsü shalo-o, agun-e lo rünyi nyu kebin nyue a-no Jerusalem nyu nsin nyalo tse zo tenge tse so. 13Ai a-le, “Hagun le nyuthyüo chü pe anyun thyü nshvu hü nla? ale Npugü Jisu zan nyu we me no aphin kethyü ntimvule si-e titse kethyü ndo sen hünyo.”

14Ai a-le anyugun jo nyü mvula ntsin anyugun le, “Npugü no a-kenyü gü thyülo chi,” tsonshüo anyugun le jozo sin mvula.

15Tson-o jon tsüsiki we agun kanyü khilo-o Jerusalem nyu nsinla. 16Lo tsükatsü senthyükelonyu dan me le Kaisaria nyu, agun le a-ka nyu bin titse kehü a-zan le Mnason tsekethyü Kupra nyu, nduka nyu senthyükelo thyü tinkela nyu nme-e sin tseo agun zen gunryü.

Paul Le Jakob Ki Kegun

17Tson-o agun le Jerusalem tilo ntsin agun pvünyu ju le anyugun sherhün sa tseo agun zenlo. 18Lo tsüsinyü Paul le agun zen-o Jakob ka nyu yü; lo tsükatsü kehun ketsen kehünyu aphu tsünyu bin. 19Lo a-le anyugun kelushüo a-le Juda kemvunyu dan nyu lotho kethyü ka Sunggigü le a-zen-o thathyü keshün rüla nmeme tse aphu zo pe anyugun hishü. Tsontsin anyugun le jo tsü shashüo Sunggigü shwen sa shü. 20Lo anyugun le a-ka, “Sikezen gü, nko shabin ti, Judanyu dan nyue jolokegwa tenyenlo kela temi yie yie le bin laso; lo tsüdan tsü aphu Mosa tejvü gü tsü tenyen sa hü nyo. 21Lo anyugun le, nle me rünyi ki kehü Judanyu aphu no a-nyenyu dan girü nyalo tse lo anyugun jvü gü zen nyalo tsekethyü zo-o anyugun no Mosa jvü gü tsü khela lotse anyugun senthyü hü nle tse kethyü nrüla zo-o sha bin laso. 22Tsügenyu dihontselo gwa tila? Nle gunryü kela anyugun le shalo la tsentsü tiso. 23Tsügenyu agun le nka tha nme zoshü ti, lo nle tsü thyülo nye. Temi mizi le tha nme genyu anyugun pe thula titse zoshwi pe bin kenjü le bin nyo. 24Tsügenyu nle tsüdan zen gungü anyugun zen-o n npvüe nthyü kenshünlo, lo anyugun no anyugun pe thulo nrün genyu anyugun chün tsü aphu thyü küla. Lo nle tsü hontsela yatselo temi aphu nle Mosa jvü zen hü tse kethyü shalo-o himhundyü nrüla zo kehü tsüle ketsin kemvu letse kethyü sha loti. 25Ai Juda kemvunyu dan nyu jolokegwa tenyenlo kelanyu genyu we, himhundyü ki anyugun no tha khipe teromen kezü rüshvu kela dan, lo tezi ketyü, lo nyukhu kecheshvu ketyü, lo keyüla serikemvu nyu anyugun kekhenilo lotseo zo tsentsü shüo thushü laso.”

26Tsüselo Paul le temi tsüdan zenlo-o tsüsinyü a-ko anyugun zen-o a-thyü kenshünlo. Tsüsiki a-le Kershvuka nyu yüo anyugun nme me genyu kerüshvu thyü nrün le jon dikho yatselo anyugun thyü nshünlo tiyo tsekethyü khipe me tesha shü.

Kershvuka Nyu Paul Tenkelo

27Ai jon tsenyü tsü penlo gü kezhü ka Asia nyu gunkeryü Judanyu dan le Kershvuka nyu a-hyulo ntsin, temi aphu thukeyhun shüo gungü a-tenlo-o nra sen-o, 28“Hire, Israel nyu dan, gunryüo kechelo gwünlo! Liki hiki ho-o nrünyi lo Mosa jvü lo n Kershvuka higü nkhin-o temi aphu senthyü kehü gü tsüle temi higü hile. Lo tsüntimvule a-le Griknyu ko zen-o ngun Kershvuka nyu yüryüo nkenshün ka higü hi nrhu laso!” 29(Kechamvule anyugun le himhundyü ki Trofima tsekethyü Efesanyu nme zen-o anyugun rünyi nyu nda kehü hyushüo, anyugun le Paul no tsügü zen-o anyugun Kershvuka nyu yü letse kethyü rüchün kela genyu.)

30Lo tsükatsü anyugun rünyi nyu aphu ntun nbün sola. Tson-o temi dan tsüle nton kehü gungü Paul nrhisülo-o a-sü zen-o Kershvuka ngwenki chwila; tson-o kechokelo tse kakhinla. 31Lo temi tsüdan le a-dushvula titse sola ntsin Jerusalem aphu ntun nbün bin kela jo tsü zo nsin gü shüpahü yie so kedagü tilo. 32Tsüselo a-le shüpahü nyu dan lo tsiso kedanyu dan zenlo njüo temi dan nyu tsü. Tsüselo temi tsüdan le yie so kedagü lo shüpahü nyu dan hyushüo anyugun le Paul vü sin mvuo khela. Lo Tsükatsü yie so kedagü le a-khonni npha gü Paul tenlo la. 33Tson-o meno tegiron kenyhun pe a-khenlo lotse zoshü. Tson-o a-le, “Temi higü hile segü yo, lo a-le nyuthyü shüyo?” tse kethyü a-ketso so. 34Tsükatsü temi dan peha le tha nme zo lo kechanyu le tha peha zo tseo nra sen sola; tson-o temi le kevükeben ri kela genyu tha gwünsha petsülo mvu kela genyu a-le hukum khishüo meno Paul zen-o shüpahünyu bin ki gunla lotse zoshü. 35Lo a-le phanyu kedo ge nsin kezhü ka, temi dan le a-ta mimi tselo kela genyu shüpahünyu dan no a-khipen nsin mvulo shvula. 36Kechamvule temi tsüdan aphu a-sithen-o nra sen-o, “A-boshvula lo, boshvula lo!” tse kethyü zolo kela genyu.

Paul Le Yieso Kedagü Mhundyü Ka A-rüla Keso

37Lo tsükatsü Paul zen-o shüpahünyu bin ki yüla titse so ntsin a-le yieso kedagü ka, “Ano nka jo nme zolo gwa ti mon?” tson-o ketsoshü.

Tsüselo yieso kedagü le a-ka, 38“Nle Griknyu khwen sha le? Kha, tsonlo nle kethonkemvu ka me dukeshvu yiezi so keda thyüo tsüdan zen-o tehen ki gunkela gü Ijiptnyu gü tsü le mvula?”

39Tsontsin Paul le a-ka, “Ale Judanyu, Kilikia kazü nyu Tarsnyu nme, rünyi keshvunyu kemvu. Ano temi dan ka jo nme zoshü tanye.”

40Lo yie so kedagü le a-no zoshü lo tseshü ntsin, Paul le tso lope kethyü phanyu ge solo njüo a-ben shwen penlo lo tsükatsü temi dan le nma tse tinla. Tsontsin a-le Ibrinyu khwen ki anyugun ka jozo titse so:

Currently Selected:

APOSTELNYU THO 21: REGSBSI

Highlight

Copy