APOSTELNYU THO 22

1“Apepvünyu dan, lo apvünyu dan, ale ntsoka hagun ka akenjü zoshü titse kebin hi nyülo re,” tsonshü.

2Tson-o a-le anyugun ka Ibrinyu khwen ki jozo keso shalo ntsin ngüka nyeki nramvu kvula. Tsüselo a-le anyugun ka:

3“Ale Kilikia kazü Tars rünyi nyu nnyukelo nyu Judanyu nme; lo ale rünyi hinyu hi Gamaliel no asenthyüo npepvünyu jvü ketsin gü tsü swüo peshülo. Lo ale nduka we nthu hagun hihontseo Sunggigü lothyü hü nle tseo ayhen thyü soryü. 4Lo ale Kenikelo Tson nshwen-o boshvula titse sole, tson-o tenu-e peche-e ten pe phinlo-o khipe doka nyu shüla titse hü. 5Lo tsügü tsüle peshükeda ju, lo pelü ju kehun aphu tsü sha bin ti. Lo ale tsüdan no lesü thu pe aben nyu shüo ale tsü sen-o Damaska nyu kebin npvünyu ju ki gun-o rünyi tsünyue temi peha le bin yatselo ten zen-o Jerusalem nyu gungü anyugun lope doka nyu shüla titse kethyü tsüle akendo thyü sola.

Paul le A-nyunkelukelo Rüla Kezo

(Apo 9:1-19; 26:12-18)

6“Lo tsükatsü ale Damaska khonni gun zhü ntsin, nhenyu luka tsangge keben nme le whütse tsüryüo aje pvülo. 7Tsontsin a-le chetsüla; lo tsükatsü, ‘Hire, Saul, Saul, nle nyuthyüo a nshwen hü nla?’ tson kethyü thakhwen nme sha. 8Tsontsin ako a-ka, “Npugü nle següla?’ tson-o ketso shü. Lo a-le aka, “Ale Nazaretnyu Jisu, nle a-nshwen kehü gü tsüle!” tsonshü. 9Lo tsükatsü azen kehünyu dan ko keben tsü we hyu, ai a nthon kebinkhwen gü tsü we nyülo mvu. 10Lo tsükatsü ale a-ka, ‘Npugü, ano nyuthyülo mvulo shvula?’ tsonshü ntsin a-le aka, ‘Nle so-o Damaska nyu yülo, tsonlo yatselo nno thyü titseo ndo kebin dan tsünyu tsü aphu zokü pe nhishü ti.’ 11Lo tsükatsü keben kekvu gü genyu ayhütyü le tha hyulomvu lao azen kehünyu dan no aben sülo-o azen-o Damaska nyu yü.

12“Lo tsükatsü tejvü kipon nshün kehünyu nme Anania tsekethyü Judanyu nme, rünyi tsünyu teshwen kepvünyu nme le ryüo akhoka binlo-o aka, 13‘Asikezen gü Saul, n yhütyü no tha hyunilo,’ tsonshü. Tsonshü ntsin ayhütyü le tha hyulo njüo a-hyulo. 14Tsüselo a-le aka, ‘Npepvünyu Sunggigü le nno a-kendo shalo lotse kethyü lo Kenshün Kapu hyulo lotse kethyü, lo a-mün nyu chwikeryü a-khwen gü tsü nyülo lotse kethyü ndo sen hü laso. 15Kechamvule a-le nno temi aphu mhundyü nyu nle kesha kehyu tsü aphu zo pe a-rüla zoshwishü nrün genyu. 16Lo nle nyuthyüo ntsoka-e sun bin nla? Solo-o baptaiz thyülo, tson-o a-zan nyu nkapu rüshvuo nkemu dan tsü sükü la.’

Judakemvu nyu Genyu Paul Kokelo

17“Lo Tsükatsü ale Jerusalem nyu nigun gü Kershvuka nyu hi kebin ka, ale pesilo la; lo tsükatsü ale A-hyu, lo A-le aka, 18‘Nle whütse Jerusalem nken chwilo; kechamvule anyugun le nle ajün zoshwi keshü gü tenyenlo keho genyu,’ tsonshü. 19Tsontsin ale a-ka, ‘Npugü anyugun ko shabin ti, ale sinagog ka aphu nyu n ketenyen nyu ten pe do thyü, lo anyugun vü tson soryü. 20Tsüntimvule njün kezo gü Stefan dukeshvu ka-e anyugun zen-o kenyunrhün-o anyugun khoka bin-o a-dukeshvunyu dan phinya khwen bin.’ 21Tsüselo Npugü le aka, ‘Tsonchü shü, kechamvule ale n nipe a-mah kephoun hyukemvu bin ki Juda kemvunyu ki shüti tse kebin genyu,’ tsonshü.”

Paul Lo Romnyu Tejvü Gü

22Lo anyugun le a-jo tsü keti nyülo, tsüselo nra sen-o, “Temi hontse kethyü nyu we no kazü nyu yhun bin nya; a-no yhun hü zümvu.” 23Lo anyugun le nra sen-o anyugun phi-e rho pe shwen, lo kenphü khü pe shwen tse so ntsin, yie so kedagü le meno a-zen-o shüpahünyu bin ki gunla lotse ahza khishü. 24Tson-o mele nyu genyu a-ge a-kenyümvu-o sen pe hitsüki thyü bin yo tsekethyü shalo kenyü genyu meno a-vüo ketso petsü sa lotse kethyü zoshü. 25Tsontsin me le ron lope a-phinlo ntsin Paul le tsiso kedagü ka, “Rom nyu-e hagun le a-kemu shalo kemvu ka a-vü kethyü tsüle tejvü ole?”

26Lo tsükatsü tsiso kedagü le jo tsü shalo njüo, gungü yieso kedagü ka, “Nle dihontseo hihontse bin nla? Temi higü hile Romnyu nme hile la?” tson.

27Tsontsin yieso kedagü le gunryüo a-ka, “Nle Romnyu ole? Aka zoshü ta.”

28Tsüselo Paul le a-ka, “Ele!” tsonshü.

Tsüselo yieso kedagü le a-ka, “Awe Romnyu thyükelo le raka kechon lope hei-o thyülo le.”

Tsüselo Paul le a-ka, “Awe a nnyulo nyemhun ka nyu Romnyu lenye!” Tsonshü ntsin a-ketso titse kebin nyu dan aphu tin bula.

29Lo yie so kedagü ko Paul le Romnyu letsekethyü sha kelo ka, a-le Paul ten pe phin kethyü genyu nshvu rila.

Paul Le Pelünyu Kehun Mhundyü Nyu Jozo Kethyü

30Lo tsüsinyü Judanyu le nyu genyu Paul nkhin yo tsekethyü sha tsentsülo nrün genyu, yieso kedagü le Paul shwüshülao peshükesha ju lo pelü kehun aphu no ryüo kequenlo lotse zoshü. Tson-o a-le Paul zen nshye gü a-khipe anyugun mhundyü nyu shüshü.

Currently Selected:

APOSTELNYU THO 22: REGSBSI

Highlight

Copy