APOSTELNYU THO 13

Paul Lo Barnaba Au Kejükelo

1Tsükatsü Antiok nyu sidyükeshanyu lo senkethyü nyu: Barnaba lo Nager tsekethyü Simeon, lo Kurin nyu Lukia, lo menyu leyi pe Herod sikezen nyu thyükelo Manaen, lo Saul tse le bin. 2Lo anyugun le Npugü lothyü, lo nyen-o hi kebin ka Kenshün Kapu le, “Hagun le Barnaba lo Saul au nikho pe akipon shüo ale au no tha nme thyülo tseo au kokelo gü thyülo chi,” tsonshü.

3Tsügenyu anyugun le nyen-o hi lo anyugun ben shwen pe au ge shüo au nishü la.

Saipros Nyu Apostel Tho

4Lo Kenshün Kapu le au nishü ntsin, au le Selukia nyu gun-o tsünyu run ge Saipros nyu gun. 5Tson-o au le Salami nyu kebin ka Sunggigü jo pe sinagog ka nyu me senthyü shü; lo tsükatsü Johan Mark zen-o au che hü.

6Lo au le tsünyu ntsü sen-o zükehun kazü tsünyu tsü aphu ka gungü Pafa tilo; au le tsünyu tsü Barjesu tsekethyü Judanyu sidyükesha ketsin kemvu temvunyu nme hyulo. 7A-le rünyi tsünyu keda thyü kehü gü Sergia Paul tsekethyü tha keshanyu nme zen bin hü. Temi tsügü le Barnaba lo Paul au kozen a-ki gülo-o Sunggigü jo gü nyülo nyü sola. 8Ai Eluma temvu gü le kedagü kerüchün thyü kelula nyüo au ntsun sola. 9Ai Saul, Paul-e letse kehü gü le Kenshün Kapu no a-süpvüo temi tsügü nri ryülo njüo, 10“Hire, Kenkukenru, lo nshün kemvu aphu pe nsüpvü kehügü satan nyugü, Ketsin aphu shwirüchün kehü gü. Nle Npugü tson kenjü thyü nshvu kehü gü khela loho le? 11Lo hire, Npugü ben le nge bin laso, lo nle gwün gwa nyhütyü pola-o yhüko keben hyulo mvu lati so, tsonshü.”

Tsonshü ntsin tha kezün nme le ryüo a-yhütyü sunlo la. Tsüselo a-le temi peha no a-ben sülo lotseo nsin nshye sola. 12Lo kedagü tsüle tha tsühontse kethyü tsü hyushüo a-dunthyüo Npugü jo gü tenyenlo.

Paul Lo Barnaba Au Le Pisidia Kazü Antiok Nyu Kegun

13Tsükatsü Paul lo a-pvünyu dan le Pafa nyu run zen sen-o Pamfilia kazü Perga nyu gunlo; tson-o tsünyu tsü Johan le anyugun khela njüo Jerusalem ki rani gunla. 14Lo anyugun le Perga nyu tsonchü shüo gungü Pisidia kazü Antiok tilo; tson-o anyugun le Sabbath nyü tsüdan sinagog ka nyu yügü binlo. 15Lo tejvü lo sidyükesha lesü swü keshü sika kehun ka tsünyu tejvü sen kehü dan le me nipe anyugun ka, “Agun pvünyu dan, hagun le temi nyun thu keyhun keshü jo le bin yatselo zoshü ta,” tsonshü. 16Tsügenyu Paul le solo njüo a-ben shwen lo-o jo zo so:

“Israel temi dan, lo Sunggigü shye nshvu kehü dan: hagun ajo nyüshü ta! 17Israel nyu hidan hile Sunggigü le sokerika nyu ngun pepvünyu kejülo, lo anyugun le gungü Ijipt lojvü ki yhun kehü ka temi hidan hi no me nyeki gwakvu, lo a-ben kekvu lope tsünyu tsü anyugun zen chwiryülo. 18Tson-o chen henzi kho a-le tehen nyu anyugun nthon ryü. 19Tsüsiki a-le Kanan kazü nyu temi tsipwen tsenyü nkelao anyugun no kazü tsünyu chen tsizio henpvü laki kho tsünyu yhun.

20“Lo tsüsiki Samuel sidyükeshagü le soryü kemvuthen a-le temi ketso kehü dan me no anyugun so keda thyü gunryü. 21Tson hüo anyugun le raja nme hi sola; tsügenyu Sunggigü le Benjamin tsipwen nyu nme Kish nyugü Saul no chen henzi anyugun raja thyü. 22Lo tsüsika a-le raja tsügü hüla njüo David no soryüo anyugun raja thyü. Sunggigü le a-rüla zo-o, ‘Ale akerüchün gü nyu hontse temi nme le akendo aphu thyü nrün gü Jesse nyugü David hyulo laso,’ tson zo. 23Temi tsügü tsipwen nyu Sunggigü le zo kenjü gü kenikelo gü Jisu no Israel nyu ka yhun ryü. 24Lo a-le gunryü nrün Johan le nchwenyu Israel nyu aphu mhundyü nyu nyunkelu kelo baptism zo pe me senthyü. 25Tson hüo Johan le a-tho tsüthyü penlo gü kezhü ka a-le, ‘Hagun we ale segü letse rüchün hü nla? Ale hagun le khwen kebin tsügü mvu, tson la! Ai hire, temi nme le asiki ryü zhü; ale a-phaje kephin-e shwelo kümvu!’ tson sola

26“Apvünyu ju, Abraham tsipwen dan, lo hagun dan nyu Sunggigü shye nshvu kehü dan, nthu kenikelo jo tsügü khipe hagun ka shülo bin nle. 27Lo Jerusalem nyu yhun kehünyu dan lo anyugun so kedanyu jue a-sha mvu lo Sabbath jon tsenyü sidyükeshanyu lesü swü hüe sha hü kemvu genyu a-rüchün kenshvu nyu tsüdan thyü penlo laso. 28Tsüntimvule anyugun le a-dushvu kezü tho nme-e hyulo mvu tse anyugun le Pilat ka a-dushvu lalo tsekethyü hukum hilo. 29Tson-o anyugun le a-rüla thu kenjü aphu thyü pen küla njüo, san gü ge a-süshye sen tsenryüo a-pen gungü sika nme nyu shü njü. 30Ai Sunggigü le kesinyu dan nyu a-thyü nrhünlo laso. 31Lo tsüsiki a-le tsang keben jon kechon ki-e Galil nyu a-zen-o Jerusalem nyu gunkeryü nyu dan ntsoka temi dan mhundyü nyu a-rüla zo kehünyu dan zen-o kesha kehyu shü. 32Lo nduka nbon nyu dan ka zo kenjü gü, Sunggigü le anyugun nyenyu dan kanyu Jisu tsügü thyü nrhünlo njüo jo tsügü thyü penlo, agun le nthu jolokegwa tsügü sen-o hagun ka ryü bin nyo. 33Jo higü rüla le lühin lesü kenyhun gü ka,

‘Nle a nyu so;

ale nthu n nnyulo so,’ tson kethyü thu njü.

34Lo Sunggigü le kesinyu dan nyu a-thyü nrhün kelo le a-no tenren nila mvu titse kethyü genyu le, lo a-le tsü rüla-e,

‘Ale David tsü nrün jochü

Kenshün

lo hyulo tsentsü titse kethyü

dan khipe ntsü ti,’ tson kethyüe a-le zo njü.

35Tsügenyu a-le lühin lesü kecha nme nyue,

‘Nle nkenshün gü khipe

no tenren kela thyü loho,’ tsonkethyü zo njü.

36David le Sunggigü kendo zen-o a-npvü a-temi dan lothyü hüo sila; tson-o a-khipe anyenyu dan sin-o sunla, tson-o tenren la. 37Ai Sunggigü le a-thyü nrhün kelo gü we tenrenla mvu. 38Tsügenyu apvünyu ju, hagun shalo nye. Temi tsügü ge kemu keni nikeshü jo pe hagun senthyü hünyo. 39Tsüntimvule a-genyu tenyenlo kehü nyu aphu Mosa jvü nyu zhülo keho tha kechon ka-e nzhü nilo hünyo. 40Tsügenyu hagun le sidyükesha lesü nyu,

41‘Hire, hagun me ntsü kehünyu dan! Hagun

dunthyüo nkela chi!

Kechamvule ale hagun keyhun ka

peha le hagun ka zohüe hagun le

tenyen loho,

thatho tson kethyü nme thyü kehü

genyu!’

Tson kethyü zo kenjü dan no hagun ge ryü mvu nrün genyu hagun petsü sa bin lo nye.” tsonshü.

42Tsüselo anyugun le chwi kezhü ka hisigü Sabbath jon nyü ko jo tsüdan zonishü lotseo a-ka hiso. 43Tson-o kehun kekho la ntsin Judanyu dan nyue lo Judanyu jvü zen kehü rünyi kechanyu kenshün nyu dan nyu temi kechon le Paul lo Barnaba au sithen tinla. Lo tsükatsü au le anyugun zen kenthon-o Sunggigü le temi shwikenjün nyu binzin hü lotse anyugun thu keyhun sinshü.

44Tsüsigü Sabbath jon nyü rünyi tsünyu temi aphu gunryü bu khetselo njüo Sunggigü jo nyü titse ryüo kequenlo. 45Ai Judanyu dan le temi dan hyushü ntsin, anyugun yhüthyü sa lola njüo Paul le kezo jo tsüle a-kemvu letseo nkhin sa lola. 46Ai Paul lo Barnaba au le jozo peche sao, “Sunggigü jo lope hagun ka zo terishü kethyüi; ai hagun le jo higü hi kenila njüo kethonthen kerhün hyulo kümvu letse kela genyu, hire, agun le Juda kemvunyu ki gunla ti sele nye. 47Npugü le agun ka kezo le:

‘Ale nno Juda kemvunyu keben nme thyü

nrün genyu nkhikholo laso;

tson-o nno kazü keni keti aphu ki-e me

kenikelo nme thyü ti,’

tson zo hünyo.”

48Tsüselo Juda kemvunyu we jo tsügü shalo ntsin anyugun shekerhün thyüo Sunggigü jo gü shwen sa sola; lo a-no kethonthen kerhün hyu tsentsülo titse kehünyu aphu jo tsügü tenyenlo.

49Lo Npugü jo le rünyi tsüte tsümhun kebin aphu nyu sha gunla. 50Ai Judanyu dan le tenunyu teshwen kepvü kenshün nyu lo rünyi tsünyu pelü dan ketsun shüo, tsüdan no Paul lo Barnaba au nshwen lotse kethyü thu keyhun shüo au hü pe a-nyu rünyi tsü nken chwila. 51Ai au le au phaje ge kemphü kekhü pe anyugun kipon shülao Ikonia nyu gunla. 52Tson-e senthyükelonyu dan we anyugun shekerhün thyüo Kenshün Kapu no anyugun kesü thyü pvü tse bin tinla.

Currently Selected:

APOSTELNYU THO 13: REGSBSI

Highlight

Copy