APOSTELNYU THO 12
12
Jakob Dushvu Kela, Lo Pitor Tenpe Dothyü Kela
1Lo tsügwünkho ka tsü Herod raja le kehun nyu temi peha nshwen sola. 2Tson-o a-le zhethon pe Johan tsagü Jakob dushvula. 3Lo tsügenyu Judanyu dan le anyugun sherhün kelo shao a-le Pitor ko tenlo. Lo tsükatsü le kebu no shükemvu tensü ketyü nga jon ka. 4Lo a-le a-tenlo ntsin khipe doka nyu shülao shüpahünyu mizi zi no keserio a-khwenlo lotse la; tson-o a-le nkenkechwi nga sika a-zen-o temi dan mhundyü nyu kegun rüchün bin. 5Tsügenyu Pitor khipe doka nyu shü njü; ai kehun le anyugun yhenthyüo Sunggigü ka kehithyü bin.
Doka Nyu Pitor Kenikeshü
6Herod le a-zen chwiryü nrün mhundyü je Pitor le shüpahünyu mihvu janyu tegiron kenyhun pe a-dyü pvü tse zhü bin; lo rikhun nyu le kakhin mhundyü nyu doka khwen bin. 7Tsükatsü hire, Npugü lokethyünyu nme le gunryüo a-khoka binlo, lo doka tsünyu tsü keben nme le tha ben pe benchvü tsela; lo a-le Pitor chwenkenuo a-kesun shüo a-ka, “Nle whütse solo chi!” Tsontsin tegiron hvu tsüle a-ben ge nyhola. 8Tsüselo tsangge lokethyü gü tsüle a-ka, “Nsen philo lo nphaje ko pvülo!” tsonshü. Tsontsin Pitor le tsühontse thyülo. Tsüselo tsangge lokethyü gü le a-ka, “Nphi khibenlo njüo asithenlo!” tsonshü. 9Lo a-le chwigü a-sithenlo; ai a-le tsüle tsemin tha nme hyushü letseo tsangge lokethyü gü le thyükeshü tsüle a-ketsin nme tse kethyü rüchün bin mvu. 10Tson-o au kethen sen-o rikhun kerigü lo tsüsigü nkenlo ntsin nyida gü kipon tegi khenpvü nyu gunryülo; lo chwida khenpvü kekhin tsügü le a-npvü a-khinshye pe au tsüshü. Tson-o au le chwilo njüo tsonlu nme zen gunzhü; tsontsin tsangge lokethyü gü le a-khela.
11Tsüselo Pitor le ntsenlo njüo a npvü a-nthon-o, “Ale ntsoka we Npugü le a-lokethyünyu nishüo Herod ben nyu lo Judanyu kendo aphu nyu akenilo laso tsekethyü sha tsentsülo laso!” tsonlo.
12Tson-o a-le jo tsüdan rüchün gunzhü ntsin gungü Johan Mark tsekethyü gü a-jvü kanyu gunryülo, ka tsünyu temi kechon le gungü tsünyu kequen-o hi kebin tenolo. 13Lo tsükatsü a-le chonrha kakhin gü kekhoshü ntsin Rhoda tsekethyü tenunyu nme le tsü nri titse chwiryü. 14Lo a-le Pitor khwen nyülo ntsin a-shekerhün pvüo kakhin gü shyeshü mvulao, kanyuki nton yügü Pitor le gunryüo kakhin mhundyü ka bin nle tse zoshü. 15Tsüselo anyugun le a-ka, “Nle nnu bin laso!” Ai a-le a-yhenthyü zoni kvuo tson ketsin thyü letse zo sola. Ai anyugun le a-men ado tse so.
16Ai Pitor le kakhin gütsü kekho bin; tsügenyu anyugun le kakhin shye chwigü a-hyulo-o anyugun dunthyüla. 17Tsükatsü a-le anyugun ka nra nyalo tseo ndo pe anyugun hishüo, Npugü le doka nyu a-zen chwiryü kelo rüla pe anyugun ka zoshü. Tsüntimvule a-le, “jo hilope Jakob lo a-pvünyu dan ka ko zoshü nye,” tsonshüo a-le kecha nme ki tinla.
18Tsüselo tsangbenlo ntsin Pitor le dikipon tinla yo tsekethyü zo-o shüpahünyu dan nyu kevü khe nti mvula. 19Tsükatsü Herod le Pitor fü kendio a-kekhwenyu dan ketsoketsü sao tsüdan dushvula lotse ahza hoshüla. Lo Tsükatsü Herod le Judia nyu Kaisaria ki gungü tsünyu bin.
Herod Kesi
20Lo Herod le Tur lo Sidon nyu ge a-kenyü mvu sa hü; lo anyugun le kengüo jo me thyülo njüo raja gü gogü Blasta no anyugun jün zoshüo anyugun rünyi le raja gü rünyi nyu tha hyutyü kehü genyu raja gü zen-o kegwa thyüla titse hi.
21Lo jon tho keshü nme nyü Herod le a-raja kanyü pe a-nthyülo njüo raja bin ge dun-o anyugun ka tha zo. 22Tsügenyu temi dan le sen-o, “A-khwen hile temi khwen mvule teronyu khwen so!” tson sola. 23Tsüselo Npugü lokethyünyu nme le a-le Sunggigü shwen mvu kethyü genyu kenjün kethyü pe a-tsü whütse shü; tsontsin ntse le a-tyüo sila.
24Ai Sunggigü jo we chvü gwen gwen tse pe meno sha gunla.
25Lo Barnaba lo Saul au le tsünyu tha thyü penla njüo Johan Mark tsekethyü gü zen-o Jerusalem nyu nigun ryüla.
Currently Selected:
APOSTELNYU THO 12: REGSBSI
Highlight
Share
Copy
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
