LUKIN 18

Arongnu le Ruiazekpa

1Hatuka Isuan ankhina khat arila borzong chian u rase a boi mandong u no rase atia ei manchu na. 2“Khopui khata ruiazek khat a om, Pathian um achi lui miring um achi lui. 3Hava khopui den han arong khat a om, ‘Na san ro,’ ati na ahong chian. 4Asotpa tel luia a oma tenchu aninga anti, ‘Pathian ka chi nokam, miring lalchi ka tho nokam. 5Tenchu ei na hong pol sika ei dikna en ka ti phuba la pe ka ti, hanoten honga na hong manpong inti,’ ” ati.

6Puman aril tira, “Rangai u ro imo ruiaril saluipan ei ti. 7Atun chu, Pathianin a mi ngai zek luia ei om rang mo asun azana achap ngai ranga? A san ranga ei lan nu bang rang mo? 8Kei na ril u ni zei, amani ranga anrapa zek inti. Tenchu Miring Sapa ahong le phila iamna hong mu ni mo?”

Pharisi le Lei ansuang ngai Ankhina

9Isuan hiva ankhina hi ala ril, ka sa anti ngai mitei chu tel lui ngai. 10“Nikhat chu mi anni Biakina borazong ase u; angkhat ha Pharisi angkhat ha lei ansuang.

11“Ha Pharisi ha abinga andinga bor azong, ‘Ka na manpak Pathian, koi chu mi tei anga anruak makung, iamnokrua nimakung, Uire makung. Ka na manpak sova lei ansung angam nimakung. 12A hapta voianni ka ngoi, kei sua dor ata soma angkhat ka na pek.’

13“Tenchu lei ansuang chu ala uala andinga amai ngal vanram tiang tang ngam mak, arop a rachum a, ‘Pathian koi mi salui lungkham na mu ro,’ ati na. 14Kei na ril u ni zei,” Isuan ati, “ha lei ansung nimaka, Pharisi ha, Pathian matona dik luia a in apan. Atheia anlian ngai chu annuai inti, hatuka atheia annuai ngai chu lian inti.” #Mt 23.12; Lk 14.11

Isuan Naipang Bor apek

(Mt 19.13-15; Mk 10.13-16)

15Mi senkhatin anai u ngai ahong ruaia Isua kom akut adap ranga. Hantina ei tho u a zolai ngaiin amuna ango u. 16Tenchu Isuan naipang ngai apaia, “Khar u no ro asik chu Vanram chu hia ang ngai rang ke. 17Hiva hi re u ro! Naipang anga Pathian Ram pom lui chu lut pial no ni.”

Aneipa

(Mt 19.16-30; Mk 10.17-31)

18Juda ulian khatin Isua a rakela, “Minchupu asa, imo kei tho nget rang umor damna kei manthei na rang?”

19“Ichangmo asa tia nei na pai?” Isuan a rakela, “Pathian nok chu asa om mak. 20Chongpek ngai na riata; ‘Uire no ro; mi that no ro; marusa tho no ro, mi asia manlo no ro, na nu na pa lalchi tho ro.’ ” #Ant 20.12-16; Dan 5.16-20

21Hava naiin a masanga, “Naipang ka ni len ata, kei tel kiar ke hiva chongpek ngai.”

22Isuan ariata, a kom ati, “Nei tho rang khat ala om. Nei don dora zuar tan ha sum ha anriang ngai pe ro, hatuka vanrama nei donin na ti; hatuka na hong zi ro.” 23Hava ngai ariata achan anngui, asik chu achan anei ei ni sika.

24Isuan ei anngui a muna ati, “Itukmo anei ngai ranga Pathian Ram alut ei antak! 25Anei ngai Pathian Ram ase nek ten makingkang simphuai kuana lut abei.”

26Mi ariat ngaiin a rakela, “Hanle tumo azok thei rang ani zei?”

27Isuan amasanga, “Min ei tho thei nok chu Pathianin a tho thei.”

28Pitorin, “Enta! koinin na nei ngai dora nei mak zita nang nei na hong zi,” ati.

29“Ani,” Isuan ati, “Kei na ti u ni zei a in a nungak, a parual, a inkua, a nai Pathian Ram sika amak tak chu, 30hava ngai neka atam aman nok rang tute om mak, nangkan umor damnam man inti.”

Isuan Voi Anthum Changna Ei Thi rang rui aril

(Mt 20.17-19; Mk 10.32-34)

31Isuan a zolai somleianni abinga aruaia aril, “Rangai u ro! Koini hi Jerusalem tiang ase rang na ni aloma deari ngaiin ei maziak, Miring Sapa rui ei dik rang. 32Ama chu Jentail ngai kuta anpe inti, elsekara tho untia, asiat ril unti, machil unti. 33Razik untia that unti, tenchu ninthum suale anthui ret inti.”

34Tenchu a zolai ngaiin hava rui ite re u mak; a chong zia ha amani kom ata anthup, hasik han Isuan imo ei ti re u mak.

Isuan Kutado Mitacho Mandam

(Mt 20.29-34; Mk 10.46-52)

35Isuan Jeriko kola han mitacho khat lampui kola ansuta kut a lei do. 36Mipui ei se ariata a rakel, “I ang mo?” ati na.

37“Nazareta Isua ase,” ati pe u na.

38Ankheka, “Isua! David a Naipasal! Lungkham na mu ro!” ati.

39A matona mi ngaiin ango u na, dai rek ro ati pe u. Tenchu haneka anringa ankheka, “David a Naipasal! Lungkham na mu ro!”

40Isua andinga ha mitacho ha hong tuang u ro ati. A kola a hong le Isuan arakela, 41“Na rang imo atho rang nei na zot?” “Puma, amu ret rang ka zot,” ati. 42Isuan ati pe, “Hano mu ro! Nei iamnan ana mandam zei.” 43Voikhat lena amu len thei, hatuka Isua azina Pathian a manpaka. Mipuiin a muna Pathian amanpak u.

Currently Selected:

LUKIN 18: RANGBSI

Highlight

Copy