LUKIN 14

Isuan Ana ei Mandam

1Sabat nikhua Isua Pharisi ulian khat ina bu nek rang asena; mipuiin adep rita Isua ha aveng u. 2Mikhat a kut a ke apan, Isua kom ahong, 3Isuan Dan minchu ngai le Pharisi ngai kom a rakela, “Koini na danin sabat nikhua min dam aphal mo phal mak mo?”

4Tenchu ite masang u maka Isuan ha anapa ha a mandama a manse. 5Hava suale Isuan, “Na naite mo na serat mo sabat nikhua tikhura achulin sabat nikhua len han rut u non mo?” #Mt 12.11

6Tenchu hava rui ite masang thei u mak.

Atomansit le Anphal

7Isuan khual ngaiin mun ahui ei athang a en chian; hasik han hiva ankhina aril: 8“Min inneina na bu nek rang ana kui ten ansutna hui khita ansut u no ro, nang na neka mi alian a kui um thei, #Hnc 25.6-7 9hatuka anakui han, ‘Hivan ansut ro ba,’ na hong ti inti hatuka anzak na tia mun annuai khita ansut na ti. 10Hanekten, min ana kui le, mun annuia van sut tan la ana kui han, ‘Horo hin mun ansanga hong ansut ro,’ na tin tia. Havantin han khual atei ngai matona lalchi ruai na ti. 11Atheia anlian ngai chu lannuai unti, annuai ngai chu lalian unti.” #Mt 23.12; Lk 18.14

12Isuan a kuipu rang atina, “Bunnek rang mi na kui le, na mal na parual na unai na in kola anei kui no ro, asik chu na kui ret unti, havantin han nei tho na thuan ret unti. 13Bu nek mi na kui rang ten anriang, akhor, akhe, acho ngai kui ro; 14borsang tung na ti, asik chu na thuan ret thei u no ni, Pathianin na thuan inti mi sa ngai anthui tik.”

Panta Alian Ankhina

(Mt 22.1-10)

15Khual khatin ei riat le Isua kom ati, “Pathian Rama panta na anchel rang ngai chu itukmo achan ei sa!”

16Isuan ei ti, “Voikhat chu mi khatin bu khalai azara mi tampa ei kui. 17Bu nek rang ansukchit suale asuak ngai mi kui rang atir, ‘Hong u ro ansukchit zei ava ti u.’ 18Tenchu angkhat suale angkhat anlenna en u na. Mana pu han suak ngai kom ati na, ‘Ram ka rachok ava en ka nang; lungkham taka andualna kei zong hi na pom pe ro.’ 19Atei ret han, ‘Serat rabo ranga ka rachoka mansin di rong; andualna kei na zong na pom pe ro,’ ati reta. 20Hanuk retin, ‘Nungak alak phing ka ni hasik han anchel thei no ning.’

21“Suak ngai akira a pumapa kom avaril u; A pumapa achan a takasina a suak kom ati, ‘Anrapa se u tan lampuia, khopui kola se u ro, hatuka anriang, akhor, acho, akhe hong ruai u ro.’ 22‘Ka pu, nei ti anga na tho zei tenchu mun atampa ala om,’ ati u na. 23A pumapa han asuak ngai kom, ‘Khotiang se u tan la mi hong man hong u ro, ka in ei bit na rang. 24Kei na ril u ni zei, kei kui ngaiin ka khului bu tem u no ni.’ ”

Azolai Achang Aman

(Mt 10.37-38)

25Voikhat chu mi tampan Isua a zina, anhoia ati, 26“Ka bila ahong nok tak chu ka zolai ni thei mak koi hi a pa neka, a nu neka, a nungak neka, a nai neka, a parual neka, a sarnu neka, ama neka ana dit nok ten. #Mt 10.37 27A theia a kros a raputa ka nuka ahong nok ten ka zolai ni thei mak. #Mt 10.38; 16.24; Mk 8.34; Lk 9.23

28“Nangni bila mi khatin in asin rang ati ten ansut baka itukmo aman ei ni rang, na sum hun ni mo nei en bak ania. 29Hantin han na en bak nok ten abul phut dola ansua luia om intia, amu doran na mani inti. 30‘Hiva mi a phut duaia tenchu sua thei lai mak!’ ti unti.

31“Reng khatin atei reng khat anduipui rang ti sela, mansana ansuta asang somanni le ama a dui ranga a hong ha asang som lehan lei dui thei ni mo, dui thei no ni mo ati na mandon bak no ni mo? 32Antor nok ranga an iam ten palai tir inti a, anngoina ranga anlapana a om u lai. 33Hantin den han Isuan aman hek, nei don dora na pei zit u nok ten ka ruaisi ni thei u no ta ni.

Lamluabui Machi

(Mt 5.13; Mk 9.50)

34“Machi hi asa, tenchu ei alna anpei suaten, an al ret na lampui reng om ma. 35Phil rang ngala lamluana abui; apei rang duai ei ni, rangai u ro kuar na don u ten.”

Currently Selected:

LUKIN 14: RANGBSI

Highlight

Copy