PHILIPPITE 1

Chibaibukna

1Paul leh Timothi, Khrist Jesu sikhate’n, Philippi khua a om misiangthou tengteng leh heutute leh Upate kiang ah:

2Hehpihna leh lemna i Pa Pathian leh Toupa Jesu Khrist a kipan noute tung ah om hen.

Paul Kipahthugenna

3Noute k’on phawk tengin ka Pathian kiang ah kipahthu ka gen hi. 4Na vek ua ding a kipaktak a thum a k’on ngetsakna teng ah. 5Ni masapen apan tuni tanpha a Tanchinhoih a na kithuahkhawmna ziak ua kipak in. 6Hiai thil mahmah gingta ing: amah nou a nasep hoih panpan Jesu ni tanpha in a zoukim vek ding. 7Na vek ua tungtang thu a, ken hichibang lungsim ka neih a dik ahi, ka lungtang a k’on neih ziak in; ka kolbutna leh Tanchinhoih gupna leh hihkipna thu a hehpihna ka tanpihte na hi vek uhi. 8Khrist Jesu hehpihna nou ngiingei ah nou k’on ngai mahmah chih Pathian in a hon theihpih hi.

9Noute theihna leh theihkakna toh kithuah itna a na khan semsemna ding un ka thum hi; 10Huchi a thil hoihpen na deih ua, Khrist ni a siangthou leh dembei a na om theihna ding uh ahi, 11Pathian thupina leh pahtawina ding a, Jesu Khrist ziak a hongom dikna gahte a dim a na om theihna ding un.

Paul Suangkul Tanna Ziakte

12Unaute aw, tuin ka tung a thil hongtungte, Tanchinhoih a khanna dia hongtung ahi uh chih na theih uh ka deih hi. 13Huchi in Inpi vengpawl tengteng leh a dang tengteng kiang ah Khrist a ka kolbuhna ziak a kichianta hi. 14Ka kolbuhna a kipan a Toupa muanna nei in unaute lak a tampite lau lou a Pathian thu gen ding in nakpitak in a hong hangsan deuhdeuhta uhi.

15Khenkhatte’n hazatna ziak leh thangpaihna ziak in Khrist a tangkoupih ua; khenkhatte’n hoih a sak ziak un a gen uhi: 16Pawl khatte’n itna ziak in, Tanchinhoih dik dan gen dia om ka hihdan thei in a gen uhi; 17Himahleh pawl dang in kikhenna ding in Khrist a tangkoupih ua, a taktak hilou in ka kolbuhna a ka thuakna behlap tum in.

18Bang a poi a? Kong bangkim a Khrist a kigenkhiak phot leh, a khem hi in a taktak hileh huai ah ka kipak hi. Ahi, ka kipak zel ding hi.

Khrist A Hinna Leh Sihna

19Na thumnate uh leh Jesu Khrist Kha panpihna ziak in hiai ka suahtakna hongsuak ding chih ka thei hi. 20Ka gintak taktakna leh ka lametna bang in bangmah ah hihzum in ka omkei hial dia, himahleh ahi gige sa mah bang in tuin leng Khrist ka hinna hiam ka sihna hiam in ka sapum ah hangsanna kim toh hihletin a om ngeingei ding hi. 21Kei ding in zaw hin Khrist ahi a, sih leng punna ahi. 22Himahleh sa a hin ka tan ding hitaleh kei din sepgim gah tampi suahna ding ahi. Himahleh ka telding ka theikei hi. 23Nih kaltehin hamhaihin ka om hi. Paimanga Khrist kiang a om utna ka nei a; nakpitak in huai a hoih zaw hi. 24Himahleh noute ziak in sa a omphot a kiphamoh zaw hi. 25Huchi in hiai ginna ka neih ziak in, ka omphot ding chih ka thei hi; ginna a na khanletna ding uh leh na kipahna ding un, na vek ua lak ah ka omphot ding hi; 26Huchi a na kiang ua k’ong pai nawn ding ziak a Khrist Jesu na suanna ding uh tam semsem kei a na neihna ding un.

27Na omdan uh Khrist tanchinhoih toh kituak sak photphot un; hong a, nou hong mu a, ahihkeileh ka omlouh a leng kha khat a na din kipdan uh leh lungsim khat nei a Tanchinhoih thugin a na pandan uh, na tanchin uh ka zak theihna ding in. 28Huan bangmah ah na melmate uh hihlau in omkei un. Huai amau ading in manna ding kichetna teltak ahi a, himahleh nou ading in hotdamna ding kichetna ahi, huai Pathian a kipan ahi. 29Hiai tuh nou adia phal ahita: Khrist gingtate kia hilou a, amah ziak a na thuaksam ding uh; 30Keimah a na muh uleh na zak uh huai kidouna mah na dou ding uh ahi.

Currently Selected:

PHILIPPITE 1: PAITBSI

Highlight

Copy