MARK 5

Gerasinmi Dawipai Hihdamna

(Matt. 8.28-34; Lk. 8.26-39)

1Huan dilgal, Gerasin mite gam a hongtung uhi; 2Long a kipan a pawtnung in dawininpai khat, han a kipan a hongpawt in amah a natuak pah hi; 3Huai mi han ah a om zel; kuamah in sik khainiang nangawn a hen theilouh uh ahi. 4Sikkol leh sik khainiang in a hen ua; himahleh sik khainiang a bottat a, sikkol leng a hihtan zel a; kuamah in a khoizual zou kei uhi. 5Sun leh zan in han leh tang ah a kikou kou a, suang in a ki-at hi.

6Huan gamla tak a kipan Jesu a muhtak in a tai a, amah a bia hi. 7Huan aw ngaihtak a kikou in, “Jesu, Pathian Tungnungpen Tapa, kei leh nang bang ahia i kizolhna om? Hon gimsak lou ding in Pathian min in nget chihtak in k’on ngen hi” a chi hi. 8Jesu’n a kiang ah, “Nang, dawininpai, hiai mi sung a kipan pawt in” a na chita hi. 9Huan aman “Na min bang ahia?” chi’n a dong hi. Aman, a kiang ah “Ka min nuai ahi, tampi ka hih ziak un” a chi hi. 10Huai gam apat amau sawlkhe lou ding in Jesu kiang ah nakpi’n a ngen hi.

11Huan huailai a tangpang ah vokhon tampi a ta uhi. 12Dawininte’n, “Vok sung ah honsawl in, asung ua ka lut theihna ding un” chi in, a kiang ah a ngen uhi. 13Aman thu a pia a, huchi in, dawininte a pawt ua, vok sung ah a lut ua; vokhon, sang nih phial ahi ua, ken ah a taisuk ua, dil ah a tailutta ua; dil ah tuihak in a sita uhi.

14Huan vok anpete a tai ua, khua leh lou ah a gen ua, huai thil hongom bang ahia chih en ding in mite a hong taikhawm uhi, 15Jesu kiang a hongtung ua, dawimatpa, a lungsim ngei pu leh puansilh a huai a tu a mu ua, huchi in a a lauta uhi. 16A ma ua mute’n, dawimat tung a thiltun dan leh vok tanchin amaute a na hilh uhi. 17Huan amau a gam ua kipan a pawt ding in a ngenta uhi. 18Huan long a a lut in dawininpaipa’n amah kiang a omsak din a ngen hi. 19Himahleh Jesu’n a phalkei a, a kiang ah, “Na inn a na lawmte kiang ah pai inla, Toupa’n nang dia thil hon hihsak a thupidan leh nang a hon lainat dan vahilh in” a chi zaw hi.

20Huan a pai a, Dekapolis khua ah Jesu’n amah dia thil a hihsak thupidan a tangkoupihta hi. Huan mi tengteng in lamdang a sa mahmah uhi.

Jaira Tanu Leh Numei Sipawt Hihdamna

(Matt. 9.18-26; Lk. 8.40-56)

21Jesu long a galkhat lam a a hong kainawn in mipi tampitak a kiang ah a hong paikhawm ua, amah dilgei ah a om hi. 22Huchi in kikhopnain a vaihawmte lak a mi khat, a min Jaira, a hong a, Jesu a muhtak in a khebul ah a khupboh hi. 23“Ka tanu naupang chik a si dekdek a; hongdam a, a hin theihna ding in hongpai a a tung a na khut koih ding in k’on ngen hi” chi in, nakpi’n a thum hi. 24Huchi in Jesu a kiang ah a vahoh a, mipi thupitak in zui in, amah a boh lutlut uhi. 25Huan numei khat kum sawmlehnih sipawt a damlou a om hi, 26Daktor tampi lak ah nakpitak a thuak in, a neih tengteng a zangbei khinta a, phattuam naksang in a se zawsop hi. 27Huai min Jesu tanchin a naza a, a nung ah mipi lak ah a hongpai a, a puanmong a khoih hi. 28“A puanmong kia khoih leng hihdam in ka om mai ding” a lungsim in a chi hi. 29Huan thakhat in a sipawt a kam ngal a, a natna hihdam ahi chih a sa ah a kitheita hi. 30Jesu’n, asung a kipan thilhihtheihna a pawt chih a thei a, milak ah a kihei vialvial a, “Kua ahia ka puanmong khoih?” a chi hi. 31A nungzuite’n a kiang ah, “Mipi’n a honboh lutlut uh mu chin a, kua ahia hon khoih? Bangchidan a chi na hia?” a chi uhi. 32Aman huai thilhihnu muh tum in a en vialvial hi. 33Huchi in numei in a tung a thil a hihsak thei in, lau leh ling kawm in a hongpai a, a ma ah khupboh in, a kiang ah thudik a hilhvek hi. 34Aman a kiang ah, “Tanu na ginna dampih na hi, khamuangtak in pai inla, na natna a kipan na damta in” a chi hi.

35A pau laitak in kikhopnain a vaihawmpa inn a kipan mi a hongpai ua, “Na tanu sita hi, sinsakpa hihbuai lailai ding na hiam?” a chi uhi.

36Jesu’n a thugen uh ngeingaih lou in, kikhopnain a vaihawmpa kiang ah, “Lau ken, gingta mai in” a chi hi. 37Peter, Jakob, leh Jakob unau Johan chih louhngal midang kuamah in amah a zuih uh a phal kei hi. 38Huan kikhopnain vaihawmpa inn a tung a, Jesu’n a na buai vengvung, kap vengvung leh a mau vengvung a za hi. 39A valut a, a kiang uah, “Bangdia bil am zen a kap na hi ua? Naupang silou hi, a ihmu ahizaw hi” a chi hi.

40Huan amah a nuihsan maimah uhi. Himahleh aman avek un a delkhia a, naupang omna ah a valut hi, 41Huan naupang khut a len a, a kiang ah, “Talitha kumi” a chi a, “Nungaknou, thou in, k’on chi” chihna ahi.

42Huan numei naupang a thou a, a paipah ngal a; amah kum sawmlehnih mi ahi hi. Huan amau lamdang a sa mahmah uhi. 43Aman a kiang uah, “Hiai kuamah in theikei hen” a chi bilbel hi, nekding piak ding thu a pia hi.

Currently Selected:

MARK 5: PAITBSI

Highlight

Copy