LUKE 9

Sawltak Sawmlehnihte Sawlkhiakna

(Matt. 10.5-15; Mk. 6.7-13)

1Huan Jesu’n sawmlehnihte a samkhawm a, dawinin tengteng tung a thilhihtheihna leh natnate hihdam theihna thuneihna a pia hi. 2Huchi in Pathian gam thugen ding leh damloute hihdam ding in a sawlkheta hi. 3A kiang uah, “Zinna ading in chiangkhun hiam, kawlzal hiam, tanghou hiam, dangka hiam, bangmah keng kei un; puanak nih leng keng kei un. 4Na tunna inn uah tung kinken un, huai inn a kipan paikhia un. 5Huan a hon kipahpihlou peuhmah huai khua a kipan na paikhiak chiang un amau mawhpaihna ding in na khepek ua leivui tatkhia un” a chi hi.

6Huchi in a kuanta ua, khua a tawn vialvial uhi. Gamchih ah Tanchinhoih a hilh ua, mi a hihdam zel uhi.

Herod Lungbuaina

(Matt. 14.1-12; Mk. 6.14-29)

7Huan kumpipa Herod in a thilhih tengteng uh a naza hi; khenkhat in, “Johan hingnawnta ahi, a chi ua, khenkhat in, 8Elijah hong kilak ahi, a chi ua, khenkhat in, nidanglai zawlnei kuahiam thounawnta ahi,” a chih ziak un, a lungzingta hi. 9Herod in, “Johan a lu ka tanta a; himahleh hichi lawmlawm a a thu ka zakzak kua ahia?” chi in amah muh a tum hi.

Mipi Sang Nga Vakna

(Matt. 14.13-21; Mk. 6.30-44; Jn. 6.1-14)

10Huan sawltakte a hong kiknawn un, a kiang ah a thilhihte uh a hilh ua. Aman amau pi in khopi Bethsaida kichi ah a paituamta hi. 11Himahleh mipi’n a thei ua, a zui zel uh; aman amau a na kipahpih a, Pathian gam thu a hilh a, hihdam kiphamoh peuhmah a hihdam hi.

12Huan nitaklam a hong hidekta a; sawmlehnihte a hongpai ua, a kiang ah, “Khuate leh a kim gam ah giahna leh annek tuidawn zong ding in mipite paisak tanla; gamkeu mun a om hi ngal hang a” a chi uhi.

13Aman bel a kiang uah, “Nou nekding pia un” a chi hi. Amau, “Mi hiai zahzah nekding i va leisak kei leh, tanghou phel nga leh nga nih kia loungal bangmah i neikei uh” a chi uhi. 14Piching ngen leng sang nga phial ahi uhi. Huan a nungzuite kiang ah, “Mite a pawlpawl in tusak un, sawmnga zel in” a chi hi.

15Huchi in a hih ua, a tusak vekta uhi. 16Huan tanghou phel nga leh ngasa nih la a, vanlam en in vual a zawl a a balkham a, mipi ma a lui ding in a nungzuite kiang ah a pia hi. 17Huan a ne ua, a vah chiatta ua, a khamval nengte uh bawm sawmlehnih a luak dimta uhi.

Peter In Jesu Khrist Phuangkhia

(Matt. 16.13-19; Mk. 8.27-29)

18Huan hichi ahi a, Jesu amah kia a a thumlai in a nungzuite a kiang ah a om ua; a kiang uah, “Mipite’n kua ka hi a honchi ua?” chi in a dong hi.

19Amau “Baptispa Johan a honchi ua; himahleh khenkhat in, Elijah hiam nidanglai zawlnei kuahiam thounawn a honchi uh” chi in, a dawng uhi.

20Huan aman a kiang uah, “Ahihleh nou kua ka hi n’on chi ua?” a chi hi. Peter in, “Pathian Khrist mah” chi in, a dawng hi.

Jesu’n a Sihna leh Thohnawnna Ding Genkhol

(Matt. 16.20-28; Mk. 8.30—9.1)

21Huan huai thu kuamah hilhlouh ding chi bikbek in, thu a pia hi: 22“Mihing Tapa in thil tampi a thuak dia, upate, siampu liante leh laigelhmite deihlouh in a om dia, thah in a om dia, ni thum ni’n kaihthoh in a om ding” a chi hi.

Eimah Kipai Dia Chihna

(Matt. 10.34-37; Mk. 8.34-38)

23Huan mi tengteng kiang ah, “Kuapeuh in hon zuih a ut leh, amah kingaihsaklou in, niteng a Kros pua in honzui hen. 24Kuapeuh a hinna humbit ut in a tan ding; kuapeuh keimah ziak a a hinna tan in a humbit ding hi. 25Min khovel a pum in nei henla, amah kimangsak hiam, ahihkeileh kimanloh leh amah ading in bang a phatuam dia? 26Kuapeuh keimah leh ka thu zahpih mi zaw Mihing Tapa in amah thupina toh, a Pa thupina leh a angel siangthoute thupina toh a hongpai chiang in a zahpih ding hi. 27Diktakin k’on hilh ahi, hiai a dingte a khen, Pathian gam a muh masiah uh sihna chiamlou hial ding a om uh” a chi hi.

Mellamdanna

(Matt. 17.1-13; Mk. 9.2-13)

28Huan hichi ahi a, Jesu’n a thugen nung ni giat hiam in, Peter, Johan leh Jakob a pi a, thum ding in tang ah a hohtou uhi. 29A thumlai in a mel omdan a hong lamdang a, a puansilhte mi lengthei in a hong ngouta hi. 30Huan ngai in, mi nih amah toh a kihou ua, huai mite Mosi leh Elijah ahi uh. 31Thupina a kithuam in a kilak ua, Jerusalem khua a sihna a hih bukim ding thu a gen uhi. 32Peter leh a lawmte bel a ihmut uh a suak a, himahleh a hak teitei ua a thupina leh a kiang a mi nih ding a mu uhi. 33Huan huai mite’n Jesu a paisan deklai un, Peter in Jesu kiang ah, “Heutupa, ei din hiai a om a hoih, aidakbuk thum i khoh dia, nang adin khat, Mosi adin khat, Elijah adin khat, a chi a, a thugen leng a theikei hi.”

34Huan huai thute a genlai in mei a hong kai a, amau a liahta; mei lak a a lutlai un a lau uhi. 35Meipi a kipan aw a hongsuak a, “Hiai ka Tapa, ka tel ahi, amah thu ngai un” a chi hi. 36Huan aw a daihtakin Jesu kia a muta uhi. Huan a daidide ua, huailai in a thilmuh uh kuamah bangmah a hilh kei uhi.

Pasal Naupang Dawimat Hihdamna

(Matt. 17.14-21; Mk. 9.14-29)

37Huan hichi ahi a, a zing in tang a kipan a paisuk nung un, mipi thupitak in amah a nadawn uhi. 38Ngai in, mipi lak ah mi khat a kikou a, “Sinsakpa, ka tapa en ding in k’on ngen ahi, amah ka tapa neihsun ahi. 39Ngai in, dawi in a man a, a kikou kheguih zel a; huchi in, a chilphuan ke hial in a gimbawl a, nakpitak a hih sidup in a paisan zel hi. 40Na nungzuite kiang ah delhkhe ding in ka ngen a, a hih theikei uhi” a chi hi.

41Huan Jesu’n, “Ginna neilou khang leh lampialte aw, bang tan ahia ka honthuak theih ding? Na tapa hiai ah honpi in” chi in, a dawng hi.

42Huan a hong pailai in dawi in a hihpuk ek a, nakpitak in a gimbawlta hi, himahleh Jesu’n dawinin a tai a, naupang a hihdam a, a pa kiang ah a paisak nawn ta hi.

Jesu’n a Sihna Ding Genkholhna Nihveina

(Matt. 17.22-23; Mk. 9.30-32)

43Huan mi tengteng in Pathian thupidan lamdang a sa mahmah uhi. Huchi in mi tengteng in a thilhih tengteng lamdang a saklai un, Jesu’n a nungzuite kiang ah, 44“Hiai thute na bil uah lut hen. Mihing Tapa mihingte khut a matsak a om ding ahi ngal a” a chi hi. 45Himahleh a thugen a theisiam kei uh, a theih theihlouhna ding un a kisel ahi, huai thugen tanchin amah a dong ngam kei uhi.

Kingaihniamna Dik

(Matt. 18.1-5; Mk. 9.33-37)

46Huan a lak uah kua a thupipen dia? chih thu in a na kisel uhi. 47Jesu’n a lungtang ua a ngaihtuah uh a thei a, naupang neu khat a kai a, a sik ah a omsak a, a kiang uah, 48“Kuapeuh ka min ziak a hiai naupang neu kipahpih keimah hon kipahpih ahi ding uh; keimah hon kipahpih hon sawlpa kipahpih ahi: na vek ua lak a neupen a thupipen ahi ding” a chi hi. 49Johan in “Heutupa, kuahiam na min a dawite delkhia ka mu ua, k’on zuihna ua a panlouh ziak in ka khamta uhi” chi in, a dawng hi. 50Jesu’n a kiang ah, kham nawn kei un, kuapeuh nou hon dallou nou lam a pang ahi” a chi hi.

Samari Mite’n Jesu Ngailou

51Huan hichi ahi a, amah pitouh a hun ding in, Jerusalem khua a hoh a tum chiltela, a ma ah mi a ma taisak hi; 52Huan a pai ua, amah adia na kimansak ding in Samari mite khua khat ah a lut uhi. 53A mai Jerusalem kholam naih a a lat ziak in amah a na kipahpih kei uhi. 54Huchi in a nungzui Jakob leh Johan in huai a theih un, “Toupa, amaute kangmang ding in, Elijah hih bang in van a kipan mei hong ke ding a thu ka piak uh hoih na sa hia?” a chi uhi.

55Amah a kihei a, amau tai in, “Bang kha apan na hi ua chih theilou na hi uhiam? 56Mihing Tapa mite hih mangthang ding hilou in, hondam ding a hongpai ahizaw hi” a chi hi. Huan khaw dang ah a paita uhi.

Nungzui Dingte Theihna

(Matt. 8.19-22)

57Huan lampi a a pailai un, kuahiam in a kiang ah, “Na paina peuh ah k’on zui ding” a chi hi. 58Jesu’n a kiang ah, “Sehalte’n kua a nei ua, tungleng vasate’n leng bu a nei uh, himahleh Mihing Tapa in zaw a lu ngakna ding mun a neikei” a chi hi.

59Jesu’n midang kiang ah, “Honzui in” a chi hi. Himahleh aman, “Toupa, ka pa hon vuisak phot in” a chi hi. 60Jesu’n a kiang ah, “Misi in a misi uh vui uhen; nang Pathian gam thu va genzaw in” a chi hi.

61Huan midang in leng “Toupa, k’on zui ding, himahleh ka inn a mite kampha in hon khasak phot in” a chi hi. 62Huan Jesu’n a kiang ah, “Kuapeuh leilehna len a, nunglam nga Pathian gammi hitak ahi kei” a chi hi.

Currently Selected:

LUKE 9: PAITBSI

Highlight

Copy