LUKE 8

Jesu Nasepsak Numeite

1A nung in Jesu thuhilh leh Pathian gam Tanchinhoih genkawm in kholian leh khoneute tawn vialvial in a pai a; a kiang ah sawmlehnihte a om uhi. 2Numei kuate hiam dawimat leh china damnawnte, Mari Magdalini asung a dawi sagih pawtna a chih uh, 3Joanna, Chuza, Herod sumkempa zi, Sussana leh midang tampite toh ahi uh; huaite’n amau neihsa in amah na a sepsak zel uhi.

Buhchithehpa Gentehna

(Matt. 13.1-9; Mk. 4.1-9)

4Huan mipi tampitak a hong kikhawm ua, khochih apan a kiang a hong paikhawm mite kiang ah gentehna in thu a gen a:

5“Buhchithehpa buhchitheh in a kuan a; a thehlai in a khen lamsik ah a kia a, min a sikden ua, tungleng vasate’n a nezou uhi. 6Huan a khen suang tung ah a kia a; a poutakin a kawtlouh ziak in a vuai pah hi. 7Huan a khen loulingnei lak ah a kia a, lou in a pou tonpih a, a depmang hi. 8Huan a khen lei hoih ah a kia a, a hongpou a, a leh za in a gahta, a chi hi. Huai thu a genlai in a kikou a, kuapeuh zakna ding bilnei in za uhen!” a chi hi.

Gentehna In A Tup

(Matt. 13.10-17; Mk. 4.10-12)

9Huan a nungzuite’n a kiang ah, “Hiai gentehna bang chihna ahia?” chi in, a dong uhi. 10Aman “Pathian gam thugukte nou theih dia piak ahi a, midang kiang ah bel gentehna kia a gen ahi; mu napi a a muh theihlouhna ding uleh za napi a a theihsiam louhna ding un” chi’n a dawng hi.

Buhchithehpa Gentehna Hilhchetna

(Matt. 13.18-23; Mk. 4.13-41)

11Huai gentehna thu omdan hiai ahi: Buhchi Pathian thu ahi. 12Lampi sik a te thu zasate ahi uh; himahleh Diabol a hongpai a, a ginlouh ua, hotdam a hih theihlouhna ding un a lungtang ua kipan thu a lak mangsak zel hi. 13Huan suang tung a te a zaktak ua thu kipaktak a pompahte ahi ua; himahleh zung himhim a neikei ua, sawtlou chik kia a gingta ua, khemna hun in a tawpsan nak uhi. 14Huan loulingnei lak a kiate thuzate ahi ua; himahleh a khosak zelna uah damsung khosak ngaihtuahnate, hauhsaknate, nuamsaknate’n a dep a, a gah piching kei nak uhi. 15Lei hoih a kiate bel thuza a lungtang kizen leh hoih a kem kinken a, kuhkaltak a gahsuahte ahi uhi.

Khawnvak Apan Sinsakna

(Mk. 4.21-25)

16“Kuamah in khawnvak de in bel in a khuh kei uh, lupna nuai ah leng a koih kei uh; a lut peuhmah in a vak a muh theihna ding un a koihna ah a koih zaw uhi. 17Thanglou ding a im bangmah a omkei a, theihlouh ding leh langlou ding a selguk bangmah a omsam kei hi. 18Huchi in bangchi bang in ahia na zak uh pilvang un; kuapeuh a nei piak behlap ahi ding a, kuapeuh a neilou nei a kichih sun leng laksak ahi ding” a chi hi.

Jesu Nu Leh A Sanggamte

(Matt. 12.46-50; Mk. 3.31-35)

19Huan a nu leh a unaute’n Jesu kiang a hongnaih ua, himahleh mipi ziak in a kiang a hongtung theikei uhi. 20“Na nu leh na unaute nangmah muhtum in inn pua ah ading nilouh uh” chi in, a hilh uhi.

21Aman a kiang uah, “Pathian thu za a gingtate ka nu leh ka unaute ahi uh” chi in a dawng hi.

Huihpi Jesu’n A Daisak

(Matt. 8.23-27; Mk. 4.35-41)

22Huan hichi ahi a, huailai in ni khat a nungzuite toh long ah a tuang a, a kiang uah, “dil galkhat lam ah i kai ding uh,” a chi a, huchi in long a phel ua, a paita uhi. 23Long a a tuanlai un Jesu a ihmuta a; dil ah huihpi a hong nungsuk a, a long uh tui in a dim dekdek a, lauhuai pi in a omta hi. 24Huan a kiang ah a va hoh ua, a phawng ua, “Heutupa, Heutupa, mangthang ding ka kei umaw” a chi uhi. Amah a khanglou a huih leh tui kihot a taita a; a tawp ua a daita mai uhi. 25Huan a kiang uah, “Na ginna uh kaw om ahia?” a chi hi. Huan a lau ua, lamdang a sa mahmah uhi. “Hiai mi kua ahia leh huih leh tui nangawn thu a piak a, a thu a man uh?” a kichi uhi.

Pasal Naupang Dawimat Hihdamna

(Matt. 8.28-34; Mk. 5.1-20)

26Galili gam zawn Gerasinte gam a tung uhi. 27Huan gam a a paikhiak lai in, khua a mi dawimat kuahiam in a na mu a; huai mi sawtpi puan silhlou in a om hi, inn ah leng a omkei a, han ngenah a omzaw hi. 28Jesu a muhtak in a kikou a, a ma ah a khupboh a, aw ngaihtak in, “Jesu, Pathian Tungnungpen Tapa, kei leh nang bang i kizawlhna a om a? Hon hihgim lou ding in k’on ngen ahi” a chi hi. 29Jesu’n dawinin huai mi sung a kipan a pawt ding in thu a pekhinta hi. Huai mi dawi in a man gige ahi; khainiang leh kol a bunsak ua, a vengzel ua; himahleh a gakna uh a hihtat a, dawi in gamkeu ah a delhkhia hi.

30Jesu’n, “Na min bang ahia?” chi in, a dong a, aman, “Nuai ka hi” a chi a, asung a dawi tampi a lut ziak in. 31Huan kawkhuk tawneilou a paithu pelou ding in Jesu kiang ah a ngen uhi.

32Huai tang ah vokhon tampi a ta ua; voksung a lut theihna thu a kiang ah a ngen uhi. Aman phalna a pia hi. 33Dawite huai mi sung a kipan a pawt ua, voksung ah a lut uhi; huan vokhon dilgei ken ah a taisuk ua, dil ah a tailut ua, tuihak in a sita uhi.

34Huan vok vulte’n huai thil omdan a mu ua, a tai ua, khua ah leh gam ah a gen uhi. 35Huan bang ahita a? chi a, en ding in a pawt chiat uhi. Jesu kiang a hongtun un, dawi pawtsan nung puansilh a, lungsim ngeina pu in, Jesu khebul a tu a hong mu ua, huchi in a lauta uhi. 36Huan a theite’n dawimat a hihdam danthu a maute a na hilh uhi. 37Huan a kim Gerasinte gam a mi tengteng in, a lau mahmah ziak un, amah a kiang ua kipan paimang ding in a ngen ua; huan, long ah a tuang a, a paikik nawnta hi. 38Dawi pawtsan mi in Jesu kiang a omden a ngen hi. 39Himahleh Jesu’n, “Na inn ah pai inla, Pathian in nang dia thil a hon hihsak a thupidan vahilh in” chi in a sawlkhia hi. Huchi in a pai a, khopi sung tengteng ah Jesu’n amah adia thil a hihsak thupidan a tangkoupihta hi.

Jaira Tanu Kaihthohna Leh Numei Sipawt Damna

(Matt. 9.18-26; Mk. 5.21-43)

40Huan Jesu a hong kiknawn in mipi in amah a kipahpih ua; amah a nangak nilouh uhi. 41Huan ngai dih, mi khat a min Jaira kikhopnain vaihawmpa a hongpai a, Jesu khebul ah a khupboh a, a inn a hoh ding in a ngen ngutngut hi. 42Tanu tangkhat, kum sawmlehnih hiam ding a nei a, amah laitat din a lum hi. Huan Jesu a pailai in mipi hon in a bawh lutlut uhi. 43Numei khat kum sawmlehnih sipawt a china a sum neih tengteng daktorte lak ah a zangkhinta a, kuamah in a hihdam theih tuanlouh uh; 44A nung ah a hongpai a, a puanmong a khoih a; thakhat in a sipawt a kam guih hi. 45Jesu’n, “Kua ahia hon khoih?” a chi hi. “Kei zaw ka hi kei” a na chi chiat uhi. Peter leh a lawmte’n, “Heutupa, mipi’n honbawh lutlut ua, honvel vengvung ve ua” a chi uhi. 46Himahleh Jesu’n “Kuahiam in hon khoih ahi, thilhihtheihna ka sung a kipan a pawt chih ka theih ziak in” a chi hi. 47Huan numei in a kisel theihlouh a theih in, ling kawm in a hongpai a, a ma ah khupboh in a khoihsan leh thakhat a a damtak dan mi tengteng ma ah a genkhe ta hi. 48Huan a kiang ah, “Tanu, na ginna na dampih hi, khamuangtak in pai in” a chi hi.

49A pau laitak in kikhopnain vaihawmpa inn a kipan mi khat a hongpai a, “Na tanu a sita, Heutupa hihgim nuamdah in” a chi hi.

50Jesu’n huaithu a zak in, “Lau ken, gingta mai in, huchi in a dam nawn ding” chi in a dawng hi. 51Huan inn a vatun in, Peter, Johan, Jakob leh naupang nu leh pate kia chih louhngal kuamah lut a phal kei hi. 52Avek un a na kap kheukhou ua, a kap vengvung ua, himahleh, aman, “Kap kei un, a si kei, a ihmu ahizaw” a chi hi.

53Huan sikhin a a theih ziak un a nuihsan maimah uhi. 54Jesu’n a khut a len a, “Nungak, thou in” a chi a, a sam hi. 55Huan a kha a hong kiknawn a, a thou pah hi. 56Banghiam nekding piak ding thu a pia hi. A nu leh apan lamdang a sa mahmah uhi. Himahleh aman a thilhih kuamah hilhlou ding in a chi bikbek hi.

Currently Selected:

LUKE 8: PAITBSI

Highlight

Copy