LUKE 21
21
Meithainu Thilpiak
(Mk. 12.41-44)
1Huan a dak khia a, mi haute’n sumkholna a sum a khiaklai uh a mu hi. 2Meithai zawngtak kuahiam in dal dangka muza nih hong khia leng a mu hi. 3Huchi in, “Chihtaktak in k’on hilh ahi, hiai tengteng sang in tua meithai zawngtakin a khe tamzaw; 4Hiai tengteng in a neihlet uh a khia ua; aman bel a kitunhingna ding a a neih sunsun a khevek” a chi hi.
Huntawp Chiamtehnate
(Matt. 24.1-2; Mk. 13.1-4)
5Huan kuate hiam in Pathian biakin thu, suang hoihtak leh thil piakkhawm a a zep kilawm dan uh, a genlai un, aman, 6“Hiai na thilmuh uh, hih chiplouh a suang kichiang himhim hiai ah a omkei ding; huaibang ni a hongtung ding” a chi hi.
Khrist Hongpaina Ding Chiamtehna
(Matt. 24.3-14; Mk. 13.3-13)
7Huan amau a kiang ah, “Sinsakpa, huaite chikchiang in a hongom ding ua? Huaite a hongtun ding chiamtehna bang a om dia?” chi in, a dong uhi.
8Huan aman, “Pimang a na omlouhna ding un pilvang un. Mi tampi in, ‘Khrist ka hi’ a hun tungding ahita, chi in, keimah minsial in a hongpai ding uh, huaite zuikei un.’ 9Kidou thu leh buai thu na zak hun chiang un lau kei un; huaite a tung masa ding a, tawpna bel hipahlou ding ahi” a chi hi.
10A kiang uah, “Nam tuam leh nam tuam a kidou ding ua, gam tuam leh gam tuam a kidou ding uh. 11‘Zin nakpitak in a ling ding a, mun tuamtuam ah kial a ke ding a, hipi a leng lai ding; van a kipan thil lauhuai leh chiamtehna thupitak a hongom ding hi.’ 12Himahleh huai thil tengteng a tunma in, nou a honman ding ua, kikhopnain leh suangkulh ah pi in a hon hihgim ding uh, keimah min ziak in kumpipate leh gamukte ma ah a honpi ding uhi. 13Hiai noute ading a theihpihna hun lemtang ahi ding hi. 14Huchi in dawnna ding ngaihtuah khawllou ding in na lungtang uah kihih kip un. 15Na melma tengteng un hondou ua honsel theihlouhna ding un kam leh pilna ka honpe ding a. 16Huan na nu leh na pate, na unaute, na sanggamte, na lawmte un leng hon mansak ding ua; a khen a honthat ding uhi. 17Keimah min ziak in mi tengteng huat na hi ding uh. 18Himahleh, na samzang uh khat leng a mangthang kei ding. 19Na kuhkalna uah na hinna uh na humbit ding uhi.
Jerusalem Siatna Ding Genkholhna
(Matt. 24.15-21; Mk. 13.14-19)
20“Himahleh sepaihte’n Jerusalem khua a um uh na muh chiang un, a mangthang dek chih thei un. 21Huai hun chiang in Judia gam a omte’n tang ah taimang san u hen; asung a omte’n pawtsan u hen, gam a omte asung ah lut kei uhen. 22Huai nite phulakna ahi, thu a gelh tengteng uh a hongtun theihna ding in. 23Huai nite in gaite leh naunou pawmte tung a gik ding, khovel ah haksatna thupitak a tun ding ziak in leh hiai chite tung a thangpaihna a tun ding ziak in. 24Huan namsau in a si ding ua, namchih kiang ah sal a pi in a om ding uh; huan Jentelte ni a tawp mateng Jerusalem Jentelte sikden in a om ding hi.
Toupa Hongpai Nihveina
(Matt. 24.29-31; Mk. 13.24-27)
25“Huan ni leh kha leh aksite ah, chiamtehna a om ding a; tuipi mau leh a kihoh ziak in lei ah leng namchih haksatna leh mangbatna a tung ding; 26mite launa ziak leh khovel a thil hongtung ding ngaihtuah ziak in, a sibup ding uhi; van thilhihtheihnate a ling ding hi. 27Huai hun chiang in Mihing Tapa thilhihtheihna leh thupina thupi toh meilak a hongpai a mu ding uhi. 28Huan huai thilte a hong tunpat chiang in entou unla, dak khia un; na tatna uh hong naita ahihman in” a chi hi.
Theipi Kung Gentehna
(Matt. 24.32-35; Mk. 13.28-31)
29Huan a kiang uah gentehna thu a gen a: “Theipi kung leh sing tengteng en un; 30A hong selnoutakin huai na mu ua, nipi hongtung ding ahi chih noumau in na thei uhi. 31Huchi mah bang in nou leng huaite hongtung na muh chiang un, Pathian lalgam a hongnaita chih thei un. 32Chihtaktak in k’on hilh ahi, thil tengteng a tunkim masiah tulai khangte a mangkei ding hi. 33Lei leh van a mang dia, ka thu zaw a mang kei ding hi.
Kiveng Gige A Om Kulna
(Matt. 24.36-44; Mk. 13.32-37)
34“Himahleh pilvang un, huchilou in zaw nek vahluat toh, zukham toh damsung khosak ngaihtuah in, na lungtang uh a dimlaw kha ding a, huai ni’n thangawk bang in thakhat in na tung uah a hongtung guih kha ding hi. 35Tuabang tak in leitung tengteng a omte tung a tung chiat ding ahi ngal a. 36Huai thil hongtung ding tengteng pel ding leh Mihing Tapa ma a dingtak ding a seh na hihtheihna ding uleh thahatna na neihna ding un chiklaipeuh in thumkawm in limsak gige un” a chi hi. 37Huan niteng in Pathian biakin ah thu a hilhzel a; zan teng in a pawt a, Olive tang a chih uah a giak zel hi.
38Huan zing in a thu ngaikhe ding in mi tengteng Pathian biakin ah a kiang ah a hongzel uhi.
Currently Selected:
LUKE 21: PAITBSI
Highlight
Share
Copy
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
