LUKE 20

Thuneihna Thu Ginlelhna

(Matt. 21.23-27; Mk. 11.27-33)

11 Huan ni khat Pathian biakin a mite thuhilh a, Tanchinhoih a genlai in, siampu liante, laigelhmite, upate toh a kiang ah a hongpai guih uhi; 2A kiang ah, “Kua thu in ahia hiai thilte na hih? Kuan ahia thu honpia? honhilh in” a chi uhi.

3Aman a kiang uah, “Ken leng thu kamkhat k’on dongsam ding; hon dawng un” a chi hi. 4“Johan baptisma van a kipan hia, mihing a kipan?” chi in a dong hi.

5A kingaihtuah ua, “Van a kipan chi le hang, bangdia amah ginglou? honchi thepthup ding hi. 6Huan Mihing a kipan chi lehang lah, mi tengteng in suang in a hon deng ding uh; Johan zawlnei a hih a thei ngal ua” a chi uhi. 7Huchi in a dawng ua, “Koi a kipan ahia ka theikei uh” a chi uhi.

8Huan Jesu’n a kiang uah, “Ken leng kua thu in ahia hiai thil ka hih chih k’on hilh sam kei ding” a chi hi.

Grephuan Kemte Gentehna

(Matt. 21.33-46; Mk. 12.1-12)

9Huan mipite kiang ah hiai gentehna a gen a; “ Mi kuahiam in grephuan a bawl a, a loukemte kiang ah khohloh ding in a pia a, sawtpi tam ding in gamdang ah a hohta hi. 10Huan a gahloh hun in a tan ding gah a piak ding un loukemte kiang ah sikha khat a sawl hi; ‘himahleh loukemte’n a na vua uhi.’ 11Sikha dang a sawlnawn a; ‘huai leng a na vaw nawn in, zumhuaipi in a na bawl ua, khutvuak in a paisak nawnta uhi.’ 12Huan a thumna a sawlnawn a; huai leng hihliam in a paikhia uhi. 13Huaizoh in grephuan neipa’n, bangchi’n ka hihdia? ‘Ka tapa deihtak ka sawlmai ding; amah a na zah khamawh kei ding uh,’ a chi hi. 14Himahleh loukemte’n amah a na muhtak un, ‘hiai gouluah dingpa ahi, that ni, huchi in, a gou ei a ahi ding,’ chi in, a kihou uhi. 15Huchi in grephuan apat a paikhia ua, a hihlumta uhi. Huan grephuan neipa’n amau bang a lohta dia le? 16Loukemte a hong hihmang dia, huan grephuan midangte a pe ding” a chi hi. Huan huai a zak un, “Huai telzaw tungkei leh” a chi uhi.

17Himahleh amaute a en a, ahihleh hiai thu a gelh uh bang ahia? “Inlammite suang deihlouh pen, huai mahmah a ning a suang phatuampen a hong hita” chih. 18Kuapeuh huai suang tung a puk a kitat gawp ding; a delhkhakte houh a delhzan ding, a chi hi.

Siah Piak Thu A Dotna

(Matt. 22.15-22; Mk. 12.13-17)

19Huailai tak in laigelhmite leh siampu liante’n mat a tum ua; himahleh mipi a lau ua; huai gentehna amau dem in a gen chih a theih ziak un. 20Gamukpa vaihawmna leh thuneihna nuai a a piaktheih na ding un, a thu genkhelh tang in a enkhia ua, mi hoih a kibawl enkhetu a guk sawl uhi. 21Amau a kiang ah, “Sinsakpa, diktak in thugen in na sinsak zel a, kuamah khentuam neilou in chihtaktak in Pathian thu na hilhzel chih ka thei uh. 22Kaisar kiang a siah ka piak uh siang hia, sianglou?” chi in a dong uhi.

23Himahleh aman a zekhem uh a thei a, a kiang uah, “Bang a chia hon ze-et na hi ua?” a chi hi. 24“Na sumtang uh honlak un, kua lim leh kua min ahia tuang?” a chi a, amau “Kaisar lim” a chi uhi.

25Aman a kiang uah, “Tua ahihnung, Kaisar thilte Kaisar kiang ah pia unla, Pathian thilte Pathian kiang ah pia un” a chi hi.

26Huchi in mipi ma a paukhelh lakding a mukei ua; a dawnna lamdang a sa mahmah ua, a daidide uhi.

Thohnawnna Thu A Dotna

(Matt. 22.23-33; Mk. 12.18-27)

27Huan Saddukai, thohnawnna a omkei chite lak a mi kuate hiam a kiang ah a hong ua; thu a dong uhi: 28“Sinsakpa, Mosi in, min zi nei in, ta neilou in sihsan leh, a unaupa’n a zi luah in, a unaupa ading in chi a suahsak ding chih, a gelh hi. 29Ahi a, unau pasal sagih a om ua; upapen in zi a nei a, ta neilou in a si hi. 30A nihna in a luah a; ta neilou in a si nawn hi. 31A thumna in a luahnawn a, huchibang in unau sagihte’n a neichiat ua, ta neilou in a si uhi. 32A tawpna ah numei leng a sita hi. 33Huchi ahihleh thohnawn hun ah a kuapen zi ahi dia? Amau sagihte’n zi in a neichiat uh” a chi uhi.

34Huan Jesu’n a kiang uah, “Tulai mite zi leh ta in a kinei zel ua; 35himahleh huai hun chiang a teltak ding leh, misi lak apat thohnawnna tangtak a seh peuhmahte, zi leh ta in a kinei nawn kei ding uh; 36Sih leng a si nawn theikei ding uh, angelte bang a om ding ahi ngal ua; thohnawnna tate a hih ziak un, Pathian tate ahi ding uh” a chi hi. 37Misi kaihthoh in a om ding uh chih Mosi in leng Loubuk ah, Toupa, Abraham Pathian, Isak Pathian, Jakob Pathian, a chih lai in, a theisak hi. 38Amah misi Pathian a hi kei a, mihing Pathian ahizaw; amah ngaih in mi tengteng a hing vek ngal ua” a chi hi.

39Laigelhmi kuahiam in, “Sinsakpa, na gendik e” chi in a dawng uhi. 40Huchi in thudang a dong ngam nawn kei uhi.

Messia Thu A Dotna

(Matt. 22.41-46; Mk. 12.35-37)

41Huan aman a kiang uah, Khrist David tapa ahi chih bangchidan a chi thei uh ahia? 42Sa. laibu ah David mahmah in,

Toupa’n, ka Toupa kiang ah,

ka taklam a tuin,

43“Na melmate na khepek ngakna dia ka bawl masiah,

a na chi hi.

44Huchi in David in amah “Toupa a chi ngal a, bangchi’n ahia a tapa a hih theih?” a chi hi.

Laigelhmite Vauhilhna

(Matt. 23.1-36; Mk. 12.38-40)

45Huan mi tengteng theih in a nungzuite kiang ah, laigelhmite lak ah pilvang un. 46“Amau puanaktual silh a vak a ut ua, dawlmun ah chibaibuk leh, kikhopnain a tutphah hoihpen a tut, Ankuangluina ah mun hoihpen a deihtuam nak uhi. 47Meithaite innte a negai ua, mi khemna ding in sawt pipi a thum uhi. Huaite’n siamlouh a nak tansem ding uhi” a chi hi.

Currently Selected:

LUKE 20: PAITBSI

Highlight

Copy