LUKE 16

Sumkem Diktatlou Gentehna

1Huan Jesu’n a nungzuite kiang ah hiai thu leng a gen a: “Mi sumhau kuahiam in sumkemmi a nei a; huai min a sum a zatbeisak thu ah a kiang ah a hek uhi. 2Huchi in aman amah a sam a, a kiang ah, ‘na tungtang thu ka zak bangchidan ahia? Na sumkepthu hon pelut in; tuban siah sumkem in na pang thei nawn kei ding,’ a chi hi. 3Sumkempan, a lungsim in, ‘ka toupa’n ka sumkep hon tawpsak ding hi a, bangchi’n ka hihdia leh? Lei toh ka ngapkei a, khutdoh lah ka zum ngal hi. 4Sumkep a hon tawpsak hun chiang in a innte ua hon omsak theihna ding un ka hih ding dan ka theita,’ a chi hi.

5Huchi in a toupa sumbate a sam chiat hi, a masapen kiang ah, ‘Ka toupa lak ah bangzah na ba a?’ a chi hi. 6Aman, ‘thau tehna dan za khat, a chi a, aman a kiang ah, na lai la inla tumeng inla, sawmnga gelh in,’ a chi hi. 7Midang kiang ah, Nang bangzah na ba a? a chi hi. Aman buh tehna dan za khat, a chi a, aman a kiang ah, ‘Na lai la inla, sawmgiat gelh in,’ a chi hi.

8Huan a toupa’n sumkempa diklou a lemtheih ziak in a phat a; vak tate sang in hiai khovel tate a tulai thu ua a pilzawk ziak un.

Muanhuaina

9“K’on hilh ahi, diktatlouhna sum in nou adin lawm bawl un, sum a bei hun chiang a tangtawn a omna a a hon omsak na ding un. 10‘Kuapeuh tawmchik tung a ginomlou tampi tung ah leng a ginom kei uhi.’ 11Sumlem tung a bawn na ginom kei uleh kuan ahia hauhna dik noute hon kemsak ding? 12Midang a tung a bawn na ginom kei un, noumau a kua’n honpe ding a?

13Sikha kuamah in heutu nih na a semkop theikei, khat hua in khat a deih ding, ahihkeileh khat gum in khat a musit ding, Pathian leh sumna na semkop theikei ding uh” a chi hi.

Pharisaite Salhna

(Matt. 5.31-32; 11.12-13; Mk. 10.11-12)

14Huan Pharisai sum deihte’n huai thu tengteng a za ua, a nuihsan uh. 15Huchi in aman a kiang uah, “Mi mitmuh a ki siamtangsak na hi uh, himahleh Pathian in na lungtang uh a thei a; mihing lak a a pahtawi uh Pathian mitmuh in kihhuaipi ahi.

16“Dan leh Zawlneite, Johan hongom tan in a om a; huai nung siah Pathian gam Tanchinhoih a gen ua, michih in pawnglut a sawm uhi. 17Himahleh danthu sutvom neuchik a man sang in lei leh van a manthat a baihlam zaw hi.

18“Kuapeuh zi ma a, a dang nei, angkawm ahi; kuapeuh mi zi maksa nei angkawm ahi.

Mi Hausa Leh Lazar

19“Huan mi hausa kuahiam a om a, puan sandup leh puanmalngat a silh a, niteng in nuamsatak in a om hi. 20A min Lazar khutdoh, meima a pumdim, a kongkhak bul ah a lum hi. 21Mi hausa dohkan a khatehnen kiate nek a lunggulh a; uite’n a meimate a liahsak uhi.

22Huan hichi ahi a, khutdohpa a si a, angelte’n a paipih ua, Abraham angsung ah a koih uhi. Mi hausa leng a si a, vui in a omta hi. 23Huan misi khua ah gimthuak in a om a, a daktou a, gamlapi a Abraham leh a angsung a Lazar om a muta hi. 24A kikou a, ‘Pa Abraham, ka tung ah zahngai inla, Lazar honsawl in, a khutzung muk tui ah diah henla, ka lei hihvotna din; hiai mei kuang ah ka gim mahmah hi,’ a chi hi.

25Himahleh Abraham in, ‘Ka tapa, nang na damlai in, thil hoih na mu a, huchi mah bang in Lazar in thil hoihlou a muh thei tanla; himahleh tun ah amah zaw hiai ah khamuangtak in a om a, nang zaw gim neive. 26Tua lou leng hiai a kipan a nou kiang a paitumte a pai theihlouhna ding un leh kuamah huai a kipan a kou kiang a a hong kai theihlouhna ding in, kou leh nou kikal ah guam thupitak koih denin a om hi,’ a chi hi. 27Huan aman, ahihleh, pa, amah ka pa inn ah paisak ding bek in, k’on ngen hi; 28‘Sanggam pasal nga ka nei a; hiai gimna mun ah a hongpai kha ding uh chih a kiang uah vahilh leh’ a chi hi.

29Abraham in bel, Mosi leh zawlneite a neive ua oi; huai mite thu ngai le uh a ke, a chi hi. 30Huan aman Pa Abraham, ‘hilou e; misi lak a mi hilhial a kiang uah hoh leh a kisik ding uh, a chi hi. 31A man a kiang ah, Mosi leh zawlneite thu a ngaih kei un zaw, misi lak a mi thounawn hoh mah leh leng a taksang tuankei ding uh’ ” a chi hi.

Currently Selected:

LUKE 16: PAITBSI

Highlight

Copy