LUKE 15

Belam Mang Gentehna

(Matt. 18.12-14)

1Huan siahkhawnmite leh mikhialte tengteng in a thu za ding in a kiang a honzuan uhi. 2Pharisaite leh laigelhmite’n, “Hiai mi’n mikhialte a khawl a, a kiang uah an a ne chi in, a phun tuaktuak uhi.” 3Huchi in aman a kiang uah hiai gentehna a gen hi:

4“Nou lak ah kuapeuh in belam za khat nei henla, a lak ua khat mangsak leh gamdai ah sawmkua leh kuate nusia in, a mang pen a muhnawn masiah kua ahia zong lou ding? 5Huan a muhnawn un kipaktak in a liangzang ah a pua hi. 6Inn a tuntak un, a lawmte leh a vengte uh a samkhawm ua, a kiang uah, ‘hon kipahpih un, ka belam mang ka munawnta,’ a chi hi. 7K’on hilh ahi, huchi mah bang in, midik sawmkua leh kua kisik tuan ding neiloute sang in mikhial khat kisik tung ah van a mi a kipak zaw ding uhi.

Makhai mang

8Huan numei kuapeuh in makhai sawm nei in khat mangsak leh, khawnvak de in, inn phiat in a muhnawn masiah kua ahia hoihtak a zong lou ding? 9Huan a muhnawn in, a lawmte leh a vengte a samkhawm a, hon kipahpih un, ka makhai mansak ka mu nawnta, a chi hi. 10K’on hilh ahi, huchi mah bang in, Pathian angelte ma ah, mikhial khat kisik tung ah, kipahna a om nak hi” a chi hi.

Tapa taimang

11“Mi kuahiam in tapa nih a nei hi: 12A naupangzaw pen in, a pa kiang ah, Pa, gou ka tansik honpia in, a chi hi. Huchi in, a sum a kiang uah a hawmta hi. 13Huan ni sawtlou nung in a tapa naupangzaw pen in a tansik tengteng a lakhawm vek a, gam gamlapi ah a zinta hi, huai ah nuamtat lua in a sum a mawkzat mangta hi. 14Huan a zatbei zohvek tak in, huai gam ah kial thupitak a hongtung a; nekding a hong tasamta hi. 15Huchi in huai gam mi khat a vabel a; aman vokan pe ding in a lou ah a sawl hi. 16Huan thil hawng vok in a nekte ua kihihvah a ut mahmah a; kuamah in bangmah a pe ngalkei uhi. 17Huan amah leh amah hong kiphawkkhiak tak in, ka pa kiang a kilohte annek senglouh a tamtam toh, kei lah hiai ah gilkial a si ding himai veng in; 18Ka thou ding a, ka pa kiang ah ka pai ding a, a kiang ah, “Pa, van a tung ah leh nangmah mitmuh in thil ka hihkhial; na tapa a sehtak ka hita kei hi; 19Na kiang a kiloh khat bang in honbawl in ka chi ding” a chi hi. 20Huchi in a thou a, a pa kiang ah a paita hi. Huan gamlapi a a omlai in, apan a mu a, a lainat mahmah a, a tai a, a vapoma a tawp tonton hi. 21A tapa in a kiang ah, ‘Pa, van a tung ah leh nangmah mitmuh in thil ka hihkhial; na tapa a sehtak ka hita kei’ a chi hi. 22Himahleh apan a sikhate kiang ah, ‘puan hoihpen hon lakhe pah unla, silhsakun; a khut ah zungbuh a khepek ah khedap bunsakun; 23Bawngnou thautak honla unla; gou un, i ne ding ua, nopbawl in i om ding uh; 24Hiai ka tapa a si a, a hong hing nawnta hi; a mang a, i mu nawnta uhi,’ a chi hi. Huchi in kipaktak in a om panta uhi.

25“Huan a tapa upazaw lou ah a om hi; inn a hong tunkuan in bangpeuh tum ging leh lam husa a zata hi. 26Huchi in a sikha khat a sam a, tua bang ahia? chi in, a dong hi. 27Huan aman a kiang ah, ‘na nau a hongtung a, damtak a a muhnawn ziak in na pa’n bawngnou thautak a gou,’ a chi hi.

28Amah a heh a, a lut nuam kei hi; huchi in, a pa hong pawtkhia a, amah a hongsam hi. 29Himahleh aman a pa kiang ah, ‘ngai in, kum hiai zah na nna sem ing a, na thu a talek ngeilou ing a; ka lawmte toh kipahna ka bawlna ding in kelnou leng n’on pe ngeikei hi. 30Himahleh hiai na tapa kizuakte kiang a na sum nemang vekpa a hong tuntakin amah ading in bawngnou thautak na goh a,’ chi in a dawng hi. 31Huan aman a kiang ah, ‘Ka tapa, ka kiang a om gige hi chin a, ka neih tengteng nang a ahi.’ 32Kipak leh nuamtak a om ding ahi; hiai na nau a si a; a hong hing nawn a; a mang a, i mu nawnta ahi” a chi hi.

Currently Selected:

LUKE 15: PAITBSI

Highlight

Copy