LUKE 14

Khawlni A Damlou Chibawk Hihdamna

1Huan hichi ahi a, khawlni’n Pharisai vaihawmmi khat inn a an ne ding a a hoh in a na enkhia uhi. 2Huan ngai in a ma ah damlou chibawk kuahiam a om hi. 3Huchi in Jesu’n dantheimi leh Pharisaite a houpih a, a kiang uah, “Khawlni’n hihdam a siang hia, siang lou?” a chi hi.

4Amau a daidide uhi. Aman damlou a long a, hihdam in a paisakta hi. 5Huan a kiang uah, “Na lak uah sabiltung hiam bawngtal hiam nei unla, khawlni’n tuikul sung ah ke leh kua ahia kaikhe pah lou ding?” a chi hi.

6Huai thu a dawng theikei uhi.

Kingaihniamna Leh Siamna

7Huan a mi sapte un tutna mun hoihpen a telzel uh a mu a, a kiang uah gentehna a genta hi: 8“Kitenna an ne ding a kuapeuh in a honsap chiang in tutnamun hoihpen ah tu kei un; huchilou in zaw noute sang a mi zahtakhuai zaw a na sam kha dia, huchi in a hon sampan, 9‘Hiai mi tutna ding awn in,’ a honchi dia; huan nang zumpi in tutnamun niampen ah na tu nawn phing ding hi. 10A honsap chiang in tutnamun niampen ah na vatu zaw ding a; huchi in a hon sampa a hong chiang in, na kiang ah, ‘Lawm, tutnamun hoihdeuh ah tuin, a hon chithei ding.’ Huchi in na an umpihte mitmuh in pahtawi in na om ding hi. 11Kingaisang peuhmah a neu ding a: kingaineu pahtawi a om ding a hih ziak in” a chi hi.

12Huan a sampa kiang ah leng, “Sun an hiam nitakan hiam a Ankuang na lui chiang in, na lawmte, na unaute, na sanggamte, na inveng mihaute na sam kei ding hi; huchilou in zaw a hon samthuk ding ua, a hon thuk chitchiat kha ding uhi. 13Ankuang na luichiang in, tagahte, piangsualte, khebaite, mittawte, na sam zaw ding hi; 14Huchi in huai ten thukna ding a neih louh ziak un, na hampha ding; midikte thohnawn chiang in thuknawn na hih ding ziak in” a chi hi.

Kitenna Ankuangluina Gentehna

(Matt. 22.1-10)

15Huan a an umpih kuahiam in huai thu a za a, a kiang ah, “Pathian gam a an ne ding a hampha hi” a chi hi.

16Huan aman a kiang ah, “Mi kuahiam in nitakin Ankuang thupi a lui a, mi tampi a sam hi; 17Annek hun in, a misapte kiang ah, ‘hong paita un, bangkim a manta,’ chi ding in a sikha khat a sawl hi. 18Huan avek un thukhatsat in paulam a neichiat uhi. A masapen in, a kiang ah, lou ka leita a, a en dia ka hoh kiphamoh hi; hon hehpih inla, hon ngaisiam hen, a chi hi. 19Midang in bawngtal tuaknga ka leita a, a siat a phat chian ding in ka kuan ding a, hon hehpih inla hon na ngaisiam hen, a chi hi. 20Huan midang in, zi ka neita a, huaiziak in ka hoh theikei, a chi hi.

21Huan sikha in a pu kiang ah, huai thute a vahilh hi. Huan inn neipa a heh a, a sikha kiang ah, ‘kintak in pawt inla, kongzing leh kawmkal ah pai mengmeng inla, tagahte, piangsualte, mittawte, khebaite hiai lai ah hon pilut in,’ a chi hi. 22Huan a sikha in, Pu, n’on thupiak bang in ka hihkhin a, himahleh mun awnglai lai ve aw, a chi hi. 23A pu in, sikha kiang ah, ‘Pawt inla, lamlian leh daikil kal ah pai inla, ka inn dimna ding in mi hon sawllut teitei in a chi hi.’ 24K’on hilh ahi, ka misapte khat in leng ka Ankuang lui a chiam kei hial ding” a chi hi.

Nungzuihna Man

(Matt. 10.37-38)

25Huan mipi thupitakte a kiang ah a hohsam ua; huchi in amah a kihei a, a kiang uah, 26“Kuapeuh ka kiang a hongpai in, a pa, a nu, a zi, a tate, a unau a sanggamnu, leh amah hinna nangawn huat kei leh ka nungzui ahi theikei ding. 27Kuapeuh a Kros pua a hon zuilou ka nungzui ahi theikei ding.

28Nou lak a kuapeuh in insang lam tum le uchin, amasa in tuin, lam zohna khop sum na neih uleh neih louh thei ding in, aman ding dan kua ahia sut lou ding? 29Huchilou in zaw, suangphum khin phot a, a lamzoh theihkei leh, a en peuh in, 30‘Hiai min gel napi in a zou thei ngalkei chi in, a nuihsan ding uh.’

31Huan kumpipa kuan ahia kumpipa dang dou ding a a kuan ding in, amasa a tu a, mi sing nih toh amah dou ding a hong, mi sing khat toh a tuah ngam ding leh ding louh, mi dong lou ding? 32Huchi ahihkei vanglak leh, kumpipa dang gamlapi a a omlai in, kituahna lam thuchiam ngen ding in palai a sawl ding hi. 33Huchibang in, nou lak ah kuapeuh a neih tengteng paisanlou ka nungzui ahi theikei ding hi.

Chi Peng Zatna Bei

(Matt. 5.13; Mk. 9.50)

34“Chi a hoih a, himahleh chi a pen khit in, bang in a hih al nawn ding a? 35Lei ading in a hoihkei; ekvum ding in leng a hoih sam kei; min a paikhia uhi. Kuapeuh zakna ding a bilnei in za hen” a chi hi.

Currently Selected:

LUKE 14: PAITBSI

Highlight

Copy