LUKE 13

Kisik Ding a Thupia

(Matt. 12.1-5)

1Huailai in, kuate hiam a om ua, huaite’n Galili mite Pilat in a sisan uh Pathian biakna sagohte lak a a helsakte tungtang Jesu a hilh uhi. 2Huan aman a kiang uah, “Huai Galili mite huchibang thil a thuak ziak un Galili mi tengteng sang in migilou tuan hi un na gingta ua hia? 3Hilou e, k’on hilh ahi, nou leng na kisik kei uleh huchi mah bang in na mangthang vek ding uhi. 4Huan Siloam insang in mi sawmlehgiat a delhlupte leng Jerusalem khua a om tengteng sang in migilou zaw hi un na gingta ua hia? 5Hilou e, k’on hilh ahi, nou leng na kisik kei uleh huchibang mah in na mangthang vek ding uh” a chi a, a dawng hi.

Theipi Kung Hut Gentehna

6Huan hiai gentehna a gen a: “Kuahiam in a grephuan ah theipi kung khat a suan hi. Huan a kung ah gah a hong zong a khat leng a mu kei hi. 7Huchi in grepgui kemmi kiang ah, ‘Ngai in, kum thum sung hiai thei kung ah a gah ka va zong zel a, khat leng ka mu kei; phuk in; bangdia mun dal a om nilouh ahia?’ a chi hi. 8Aman a kiang ah ’Toupa, tukum bek om henla, a kimvel in ka tou ding a, ek in ka phungvuh lai dia; 9Huchi a a gah leh a hoih ding, a gah keileh phuk mai in,’ ” a chi hi.

Khawlni A Numei Hihdamna

10Huan khawlni’n aman kikhopnain khat ah thu a hilh hi. 11Ngai in, kum sawmlehgiat hatlouhna nei dawimat numei khat a om hi; huai mi a kun kheukheu a, amah thu in ading tang theikei hi. 12Jesu’n amah a muhtak in a sam a, a kiang ah, “Numei, na hatlouhna in a honkhahta” a chi hi. 13Huan a tung ah a khut a koih a; thakhat in a tang paha, Pathian a phatta hi.

14Jesu’n khawlni a mi a hihdam ziak in kikhopnain heutu a heh a, mipi a houpih a, a kiang uah, “Mihing nasepna ding ni guk a om vo oi; huai sung in kihihdam un, khawlni’n hilou in” a chi hi.

15Toupa’n a kiang ah “Nou lepchiahte aw, khawlni’n na bawng uh hiam na sabiltung uh hiam a annekna a kipan phel in, tui dawn ding in na pikhe chiat zel uh hilou hia? 16Hiai numei, Abraham tanu ahi ngal a, ngai un, Setan in kum sawmlehgiat a man a, Khawlni’n leng hiai gak phelsaklouh dan ahi ahia?” a chi a, a dong hi. 17Huai thute a genlai in a melma tengteng a zum ua; mipi bel a thil thupi hih tengteng ziak in a kipak uhi.

Ankam, Chi Leh Silngou Gentehna

(Matt. 13.31-32; Mk. 4.30-32)

18Huchi in aman “Pathian gam bang ahia? Bang toh ka teh dia? 19Ankam chi tangkhat min a lak a, huan a a theh bang ahi, huai a hongpou a, sing a honghi a, tungleng vasate a hiangte ah a giak uh,” a chi hi.

20Huan “Pathian gam bang toh ka teh dia? a chi nawn a. 21Silngou numei in a lak a, anbuang tehna thum lak a avek a a thoh mateng a phum bang ahi” a chi hi.

Kong Kawchik

(Matt. 7.13-14,21-23)

22Huan aman thuhilh kawm zel in, Jerusalem kholam naih in kholian leh khoneute a tawn zel hi. 23Kuahiam in a kiang ah, “Hotdamte tawmchik ahi ding u maw? a chi hi. 24Huan aman a kiang uah, kong kawchik ah lut tum teitei un; k’on hilh ahi, mi tampi in lut a tum ding ua, a lut theikei ding uhi. 25inn neipa a thoh a, kong a khaknungin, nou a pua ading in, Toupa, kong hon hon in, chi in kongkhak n’on kiuh chiang un, aman koilam mi na hi ua, hon theilou ka hi’ chi in, nou a hon dawng ding hi. 26Huai hun chiang in, nou, na muh in ka ne ua, ka dawn ve ua oi, ka kongzing uah leng thu na hilh zel vaw oi, na chi ding uh. 27Aman, k’on hilh ahi, koilam mi na hi ua, k’on thei ngeikei; nou thil gilou hihte aw, ka kiang apan paimang vek un, a honchi ding hi. 28Abraham, Isak, Jakob leh zawlnei tengteng Pathian gamsung a om na muh ua, nou pawlam a delhkhiak na hih uh na kitheih chiang un, na kap ding ua, ha na gawi ding uhi. 29Huan suahlam, tumlam, simlam leh mallam a kipan mite hongpai ding ua, Pathian gam ah ne in a dawn ding uhi. 30Huan ngai un, nanungpente leng masapen a om ding ua, masapente leng nanungpen a om ding a om uh” a chi hi.

Jerusalem Khua Jesu’n A Kahkhum

(Matt. 23.37-38)

31Huaitak in Pharisai kuate hiam a hongpai ua, a kiang ah, “Pawt inla, hiai a kipan paimang in: Herod in a honthat ding” a chi uhi.

32Huan aman a kiang uah, “Huai sehal kiang ah hiai thu vagen un: ‘Ngai in, tuni toh, zingchiang toh dawite ka delhkhe dia, natnate leng ka hihdam dia a ni thum ni’n ka zou ding. 33Abang abang hitaleh tuni toh, zingchiang toh, a ni thumni toh ka pai zel ding hi; Jerusalem khaw pawlam ah zawlnei sih theih hilou ahi’. 34Aw Jerusalem, Jerusalem: zawlneite that, na kiang a honsawlte uh suang a na denglum: akpi in a noute a khanuai a a opkhum bang in na tate bangzah vei opkhum ka tuma? Himahleh na ut kei uhi. 35En in, na inn a vuak a taisan in a omta hi. Ka hon hilh ahi, ’Toupa min a hongpai a hampha, na chih masiah n’on mu kei ding’ ” a chi hi.

Currently Selected:

LUKE 13: PAITBSI

Highlight

Copy