LUKE 12

Nungzuite Thuhilhna

(Matt. 10.26-27)

1Huchihlai a mipi sang tampi kiphu muimui zou hial a hong kikhop un, Jesu’n a masapen in a nungzuite kiang ah, “Pharisaite silngou, lepchiahna lak ah pilvang un, 2Langlou ding a selguk bangmah a omkei a; theihlouh ding a im leng bangmah a omsam kei hi. 3Huaiziak in mial a na gen peuh uh vak a zak in a om ding; dantan sunggil a bilbul a na thugen uh intung vum a tangkoupih in a om ding hi.

Lauh Ding Pen

(Matt. 10.28-31)

4“Huan ka lawmte aw, k’on hilh ahi, sapum that a, huai nung a bangmah dang hih nawn theiloute zaw, kihta kei un, 5Himahleh kua ahia na lauh ding uh k’on hilhkhol ahi; a hihlup nung a leng Gehenna a paihtheihna thuneipa lau un.

6Kawlgit nga dal dangka nih in a zuaksek kei ua hia? Himahleh a lak ua khat leng Pathian in a mangngilh ngeikei hi. 7Na luzang ua samzangte nangawn leng simvek ahi uh. Lau kei un; kawlgit tampi sang in na manpha zaw uhi.

Khrist Gum Leh Gumlou

(Matt. 10.32-33; 12.32; 10.19-20)

8“Huan k’on hilh ahi, mite ma a hon gum peuhmah Pathian angelte ma ah Mihing Tapa in a gum sam ding hi. 9Himahleh mite ma a hon kitheihmohbawl peuhmah Pathian angelte ma ah ka kitheihmohbawl sam ding hi. 10Mihing Tapa kalh a thugen peuhmah a genkalhna ngaihdam sak ahi ding a; himahleh Kha Siangthou hilhial gensia zaw a gensiatna ngaihdam sak ahi kei ding hi.

11Kikhopnain a mite, vaihawmte, heutute ma a a honpi hun chiang un, bangchi in, bang thu in ka dawng dia, bang thu ka gen dia chi in lungkham kei un. 12Huai huntak in, bang ahia na gen ding uh, Kha Siangthou in a honhilh ding hi” a chi hi.

Mihau Hai Gentehna

13Mipi lak a khat in Jesu kiang ah, “Sinsakpa, ka u kiang ah gou hon hawmsam ding in hilh in” a chi hi. 14Himahleh aman a kiang ah, “Mihing, noumau tung ah kuan ahia kei thukhenpa hiam tanseppa hiam a honbawl? a chi hi. 15A kiang uah, “Pilvang unla, enna lak ah kiveng un; hauhna mihing damsan ahi kei hi” a chi hi. 16Huan a kiang uah gentehna thu a gen a, “Mi hau kuahiam a hong pung mahmah hi. 17Huchi in a kingaihtuah a, bangchibang in ka hih diam aw? Ka buh leh bal koihkhawmna ding ka neikei hi. 18Hichibang in ka hih ding e; ‘ka buhinte ka phel ding a, a sang a lianzaw in ka lam dia, huai ah buh leh ka van tengteng ka koih khawm ding.’ 19Huan ka kha kiang ah, ‘Kha aw, kum tampi sung daih ding tampi na kholta; khawl inla, ne in dawn inla, nuamtak in om in, ka chi ding,’ a chi hi. 20Himahleh, Pathian in a kiang ah, ‘Nang mihai, tu zan chiah na kha a hon laksak ding uh, huai na lamkhiakte, kua a ahi ta dia?’ 21Amau ading a gou khola, Pathian lam a haulou huchi ahi uh” a chi hi.

Pathian Muanna

(Matt. 6.25-34)

22Huan a nungzuite kiang ah, “Huaiziak in k’on hilh ahi, bang ka ne diam aw? chi in, na hinna thu uh leh, bang silh in ka teng diam aw? chi in, na sapum thu uh lunghimawh kei un. 23Nekding sang in hinna a thupizaw hi, puansilh sang in leng sapum a thupizaw hi. 24Va-akte ngaihtuah dih uh, buh a tuh kei ua, a at sam kei uh; buhpang leh buhin leng a neikei uh; himahleh Pathian in amau a vak hi; noute vasate sang a manpha zaw na hi uhi. 25Huan nou lak ah lunghimawh ziak a kua in ahia amah dunglam tong khat a hihsang thei tuan? 26Hiai lel leng hih theiloute’n bangdia thil dang lunghimawh nak na hi ua? 27Lilite khandan ngaihtuah dih uh; na a semkei ua, khau leng a khek kei uh; himahleh k’on hilh ahi, Solomon hilhial leng a thupina tengteng a a kizep in, hiai lilite lak a khat bang a zep in a omkei hi. 28Huchi in gamlak loupa tuni a hing a, a zing a thuk a khul nawn mai ding bawn Pathian in hichitel a a zep leh, aw, nou mi gintawmte, huaite sang in puansilh honpe zaw natel in chia! 29Huan na nekding uh, na dawn ding uh, zong kei un; ginglel in leng omsam kei un. 30Khovel a namte’n huai thil tengteng a zong uh; huai bang na kiphamoh uh chih na Pa un a theigige hi. 31Himahleh Pathian kumpi gam zong zaw un, huchi in huai thilte leng a honpiak behlap ding hi.

Van Hauhsakna

(Matt. 6.19-21)

32“Pawltawmte aw, lau kei un; nou kiang a gam piak ding na Pa uh kipahlam tak ahi. 33Na neih peuh uh zuak unla, mi gentheite kiang ah pia un; van ah guta naih phaklouhna ah, leikha neksiat louhna ah, dangka ip lui theiloute, gou bei theiloute kibawl un. 34Na gou omna peuh ua na lungtang uh leng a om ding ziak in.

Sikha Kiging Gigete

35“Na kawng uh gak unla, na khawnvak uh leng diam sa in om un. 36Min a pu uh kitenna Ankuangluina a kipan a a hongpai chiang a, kongkhak a hon kiuhtaka, hon theipah ding a a ngak nilouh bang in, om un. 37A pu uh a hongpai chiang in sikha na ngak nilouh a a muhte a hampha uhi; chihtaktak in k’on hilh ahi, aman a kawng a gak dia, amau an um ding in a tusak ding a, a na uh a sepsak ding hi. 38Zanlai in hiam, thoh hun in hiam a hong a, huchibang a a honmuh, huai sikhate a hampha uhi.

39“Himahleh, hiai thei un, guta a hongpai ding inn neipa’n thei leh, a veng dia, a inn a phenvang sakkei ding hi. 40Nou leng mansa in om un, na gintak louh dak un Mihing Tapa a hongpai ding hi” a chi hi.

Sikha Ginom Leh Ginomlou Tehna

(Matt. 24.45-51)

41Huan Peter in “Toupa, hiai gentehna koumau kia hia n’on hilh, mi tengteng?” a chi hi. 42Toupa’n “Sumkempa ginom, piltak, a pu in a hunteng a a tan ding uh hawmsak ding a a inkuanpihte tung a heutu a a bawl ding kuapen ahi dia le?” 43A pu a hongpai chiang in sikha huchibanga hih a hon muhding pa a hampha hi. 44Diktakin k’on hilh ahi, a neih tengteng tung a heutu ding in a bawl ding hi. 45Himahleh huai sikha in a lungtang in, ‘ka pu a hongzok kei ding e, chi in, a sikhanu, a sikhapa, na vaw ta leh, ne in dawn in na kham leh; 46Huai sikha pu, a ginlouh ni’n, a theihlouh lai in, a hong ding a, tum nih a honsuah ding a, mi ginomloute tan bang a tangsak ding hi.’ 47Sikha a pu deihlam theigige na pi a na kiging tuanlou a, a pu deihlama gamta loupa’n nakpitak a vuak a tuak ding hi. 48Himahleh theiloupia vuakna tham a gamtapa’n awlchika vuak a tuak ding. Tampi piak a ommi kiang ah tampi phutin a om ding a; tampi kepsakpa kiang ah a tamsem a phut ding uhi.

Jesu Kikhekna Bul

(Matt. 10.34-36)

49“Khovel a mei khesuk ding a hongpai ka hi; tuin leng kangpah leh china tel ing e! 50Himahleh baptisma tan ding ka nei, huai hih tangtun mateng ka om nuamlou hina mahmah e: 51Khovel a lem lengsak ding a hongpai hiam honsa na hi umaw? Hidek lou, k’on hilh ahi, kidou lengsak ding a hongpai ka hi zaw. 52Tunung chiang in inkuan khat ah mi nga a kidou ding uh, thum in nih, nih in thum. 53A kidou ding ua, pa in a tapa, a tapa in a pa; a nu in a tanu, a tanu in a nu; a pi in a mou, a mou in a pi, a chi hi.

Hun Chiamtehna

(Matt. 16.2-3)

54Huan mipi kiang ah leng, “Tumlam a meikai na muh uleh, ‘vuah a zu ding na chi pah ua; huan a hongzu ngei zel hi.’ 55Sim huihnung na muh chiang un, ‘khua a lum ding, na chi ua, a hong lum hi.’ 56Nou lepchiahte aw, khovel leh van omdan leng na genchian thei ngal ua, bang a chia tu hun theichian siamlou na hi ua?

Na Langpa Toh Kilem In

(Matt. 5.25-26)

57“Bang a chia noumau in thudik kikhen lou na hi ua? 58Honhekpa toh thukhenpa kiang na zotlai un, lampi ah kilep theihna khat zawng teitei in; huchilou in zaw thukhenpa mai ah hon kailut ding a, thukhenpa’n miman heutu a hon mansak ding a. Miman heutupa’n suangkulh ah a honkhum kha ding hi. 59K’on hilh ahi, paihsa san khat nangawn na piakkim masiah, huai a kipan na pawtkei hial ding” a chi hi.

Currently Selected:

LUKE 12: PAITBSI

Highlight

Copy