LUKE 11

Jesu Sinsak, Toupa Thumna

(Matt. 6.9-13; 7.7-11)

1Hichi ahi a, Jesu koilai mun hiam ah a thum a, a thum khit in a nungzui mi khat in a kiang ah, Toupa, Johan in a nungzuite thum dan a hilh bang in hon hilhsam in, a chi hi.

2Huan aman a kiang uah, “Na thum chiang un hichibang in na chi ding uh, a chi hi:

“Ka Pa uh, van a om,

na min kizahtak hen,

Na gam hongtung hen.

3Niteng in ka nekkhop uh

an honpia in.

4Ka khelhnate uh hon ngaidam in, Kou leng kuapeuh bat hon neite ka ngaidam uhi;

Khemna ah hon pilut ken.

Gilou lak ah hon huzaw in”

Thum Teitei Ding a Thuhilhna

(Matt. 7.7-11; Lk. 18.1-8)

5Huan a kiang uah, “Na lak ua kuahiam in lawm nei henla, zanlai in a kiang a hoh in, ‘Lawm, tanghou phel thum hon leitawi sak ve. 6Ka lawm zin in a hon tawn a, a ma a lui ding bangmah ka neikei,’ chi henla; 7Aman inn sung apan in, ‘hon hihbuai ken; tun zaw kong khak ahi, ka tate leng ka kiang ah lupna ah a ihmuta uh; thou in ka hong pe theikei chi in, dawng leh k’on hilh ahi,’ 8A lawm a hih ziak in thou in a va pekei na a, a nget ngutngut ziak in thou in a deih zahzah a vape ding hi.

9“Huchi in k’on hilh ahi, ‘Ngen un, piak na hi ding uh; zong un, na mu ding uh; kiu un, honsak in na om ding uhi. 10Kuapeuh a ngen in a mu a, kuapeuh a zong in a mu a, kuapeuh a kiu honsak in a om ding hi.’ 11Nou lak a pa pen, a ta in tanghou ngen leh kua ahia suang pe ding? Ahihleh ngasa ngen leh kuan ahia gul pe ding? 12Ahihkeileh, aktui ngen leh aikam a pedia hia? 13Huchi in nou migilou in bawn na tate thil hoih piak dan na theih uleh, na Pa uh van a om in a ngente Kha Siangthou pe natel in chia!” a chi hi.

Jesu Leh Beelzibul

(Matt. 12.22-32; Mk. 3.20-30)

14Huan Jesu’n dawi pautheilou khat a delhkhia hi. Hichi ahi a, dawi a pawttak in pautheilou a hong pauta; huchi in mipi’n lamdang a sa mahmah uhi. 15Himahleh a khen in, “Dawimang Beelzibul ziak in eive dawite a delhkhiak zel” a chi uhi. 16A khen in, amah ze-etna ding in, van a kipan chiamtehna a ngen uhi. 17Aman a ngaihtuah uh a thei a, a kiang uah, “Koi gam leng amah kidou peuh a mangthang a; inkuan khat leng amah kidou a mangthang hi. 18Setan leng amah a kidou leh a gam bangchi’n a dingkhe dia? Beelzibul ziak in dawite a delhkhia, n’on chi ua; 19Ken Beelzibul ziak a dawite delhkhia ka hihleh, na tate un kua ziak in ahia a delhkhiak uh? Huaiziak in amau noute hon vaihawmsak dingte ahi ding uh. 20Himahleh ken Pathian khutzung ziak a dawite delhkhia ka hihleh Pathian gam na kiang uah a hong tungkhinta hi.

21Mi hat in hiamzat kim tawi a a inn a ven sungteng, a sum bittak in a om gige hi; 22Himahleh amah sang a hatzaw in a hongsual a, a zoh chiang in, a muan a galvan kim a sut a, sum a laksak a hawmzak zel hi.

23Kuapeuh ka lam a panglou tuh hondou ahi a, kuapeuh honlak khawm pihlou in a hihzak hi.

Dawinin Kiknawnna Mihing

(Matt. 12.43-45)

24“Dawinin mi sung a kipan a pawt in, khawlna zong in tui omlouhna mun peuh ah a vakvak hi. Huan, khawlna himhim a mu kei a, ka pawtna inn ah ka kiknawn mai ding, a chi hi. 25A va tun in phiatsiang leh zephoih in a mu hi. 26Huaitak in a vapai a, amah sang a gilou zaw dawi dang sagih a honpi a, huai mi sung ah a lut ua, a teng uhi; huai mihing omdan nanung amasa sang in a hoih keizaw tham hi” a chi hi.

Hamphatna Dik

27Huan hichi ahi a, huai thute a genlai in, mipi lak ah numei khat a kikoukhia a, a kiang ah, “Nang honpai gil a hampha e, na nawitep toh” a chi hi. 28Aman bel, “Pathian thu za a zuite mi hampha ahizaw uh” a chi hi.

Chiamtehna Zonlouh Ding

(Matt. 12.38-42)

29Huan mipite a kiang a a hong kikhop lai un, Jesu’n, “Hiai khang giloute ahi uh; chiamtehna a zong ua; himahleh Jonah chiamtehna chih louh a kiang uah chiamtehna piak ahi kei ding. 30Jonah Ninevi khua a mite adia chiamtehna a hih bang in, Mihing Tapa leng tulai khangte chiamtehna a honghi ding hi. 31Thukhenni chiang in, Simlam kumpinu tulai khangte kiang ah ading dia, siamlouh a tangsak ding; Solomon pilna ngaikhe ding in kawlmong a kipan a hong ngal a; ngai un, Solomon sang a thupizaw hiai ah a om hi. 32Thukhenni chiang in, Ninevi khua mite tulai khangte kiang ah ading ding ua, siamlouh a tangsak ding uh, Jonah thuhilh ziak in a kisik ngal ua; ngai un, Jonah sang a thupizaw hiai ah a om hi.

Khawnvak Apan Sinsakna

(Matt. 5.15; 6.22-23)

33“Kuamah in khawnvak a det un inn nuaitawng ah a koih ngeikei uh, lawh nuai ah leng a koih ngei sam kei uh, a lut mite’n vak a muh theihna ding un a koihna ah a koih zel uhi. 34Na sapum khawnvak na mit ahi; na mit a chim leh na sapum leng avek in a vaksuak nak hi; a chim kei leh bel na sapum a mial vek nak hi. 35Huchi in na sung a vak om mial a na hi kha ding e, pilvang in. 36Huchi in na sapum koilai peuh miallou a avek a a vakkhiak leh, khawnvak vak petpet in a tatvak bang in a vakkhe vek ding” a chi hi.

Pharisaite Leh Laigelhmite Demna

(Matt. 23.1-36; Mk. 12.38-40)

37Huan a genlai in Pharisai khat in amah kiang a an ne ding in a chial a; huchi in, a lut a an a ne hi. 38Pharisai in a an um a muh in, annek ma a khut a sillouh lamdang a sa mahmah hi. 39Toupa’n a kiang ah, “Nou Pharisaite’n nou leh kuang pawlam na silsiang ngeitak ua; na sung lam ulah lepgukna leh gilou in a dim hi. 40Mihaite aw, pawlam bawlpa’n sunglam leng a bawl ka hia? 41Himahleh na neihte uh mi genthei kiang a thil thawnpiak ding in zangun; huchi in ngai un, nou adin bangkim a siangvek hi.

42“Nou Pharisaite aw, na tung uh a gik e: pudina, pardi leh anteh louhing teng sawm a khat na pia ua, diktatna leh Pathian itna na limsak kei uhi; himahleh huaite eive na hih ding uh, a dangte hihlou tuanlou in. 43Nou Pharisaite aw, na tung uh a gik e: kikhopnain ah tutphah hoihpente leh dawlmun a chibai bukte na ngaisang uh. 44Laigelhmite leh Pharisai lepchiahte, na tung uh a gik hi: han chiamteh louh, a tung a theilou a mi a paizelna bang, na hi uh” a chi hi.

45Huan dantheimi khat in, a kiang ah, “Sinsakpa, hiai thu na gen kou leng hontai na hi” a chi a, a dawng hi. 46Huan aman “Dantheimite aw, nou leng na tung uh a gik: Puakgik, puak haksa pipi mite na suan ua, nou lah huai puakgikte na khutzung khat un leng na khoih ngeikei uhi. 47Na tung uh a gik: na pipute uh thahsa zawlneite han inn na lam ngal ua. 48Huchi in na pipute uh thilhihte na theihpih un na hoihsakpih uh ahi; amau a that ua, nou a han innte na lam uhi. 49Huaiziak in ‘Pathian pilna in leng, a kiang uah zawlneite leh sawltakte ka sawl dia, a khen a that ding ua, a khen a sawi ding uh a chi hi;’ 50Zawlnei tengteng sisan, leitung piantung a kipan a kisuah, tulai khangte tung ah phu a laktheih ding in a chi hi; 51Abel sisan suah a kipan, Zakariah, maitam leh biakin kikal a sisan suah tan in; ahi, k’on hilh ahi, tulai khangte tung ah phu a kila ding. 52Nou dantheite aw, na tung uh a gik e: theihna tabi na paimangpih ua; nou lah na lut ngalkei ua, mi a lut dingte na dal uhi” a chi hi.

53Huai a kipan a pawtin, laigelhmite leh Pharisaite’n amah a tawng ua, thu chiteng gensak teitei tum in leh, 54A pau khelh zenzen leh mat tum in a tang gige uhi.

Currently Selected:

LUKE 11: PAITBSI

Highlight

Copy