LUKE 10

Nungzui Sawmsagihte Sawlkhiakna

(Lk. 9.3-5; Matt. 11.22-23,25-27; 13.16-17)

1Huaikhit in Toupa’n midang sawmsagih a sep a, a paina ding khoteng leh mun teng ah, a ma ah nihnih in a sawl hi, 2A kiang uah, “Buh lak ding a tam mahmah a, himahleh a semte a tawm uh, huchi in a buhla ding a semdingte sawl ding in buh neipa kiang ah ngen un. 3Pai un; ngai un, nge lak a belamnou bang in k’on sawl ahi. 4Dangka ip, kawlzal leh khedap tawi kei unla, lampi ah kuamah chibai buk kei un. 5Huan inn na lutna peuh uah a masapen in, hiai inn ah khamuanna tung hen, chi un. 6Huai inn a khamuanna ta a om leh na khamuanna thu uh a tung ah a om ding a; a omkei leh na kiang uah a hongkik nawn ding hi. 7Huai inn ah tung in om nilouh unla, a honpiak peuh uh ne in dawn un; nasemmi loh mutak ahi. Inn teng ah banhoh kei un. 8Huan khua na lutna peuh uah hon kipahpih uleh, honlui peuh uh na ne ding ua; huai a damlou omte leng na hihdam ding ua; 9A kiang uah, Pathian gam na kiang uah hongtungta, na chi ding uh. 10Khua na lutna peuh uah hon kipahpih kei uleh a kongzing uah paikhia unla, 11Na khaw leivui uh ka khepek ua bang teng na tung uah tatsiang ung e; himahleh Pathian gam hong naita chih thei un, na chi ding uhi. 12K’on hilh ahi, huai ni chiang in huai khuate thuak sang in Sodom khaw thuak ding a dan a omzaw ding hi.

Kisik Nuamlou Khopite

(Matt. 11.20-24)

13“Korazin, na tung a gik e; Bethsaida, na tung a gik e; Noumau a thillamdang kihihte Tura leh Sidon khua a hih hileh, saiip puansilh in, vut lak a tuin a kisik khinthamta ding uhi. 14Himahleh thukhenni chiang in nou thuak sang in Tura leh Sidon khaw thuak ding a dan a omzaw ding. 15Huan nang Kapernaum, van tan a tawisang in na om a, misi khua a sawnkhiak a om ding na hi.

16Kuapeuh na thu uh ngaikhia keimah thu ngaikhia ahi a; kuapeuh nou hon deihlou kei hondeih lou ahi a; kuapeuh nou hon ngailou kei hon ngailou ahi a, kuapeuh kei hon ngailou tuh hon sawlpa ngailou ahi” a chi hi.

Sawmsagihte Kiknawnna

17Huan sawmsagihte kipaktak in a hongkik nawn ua, “Toupa, dawite nangawn na min ziak in ka thuthu un a om uh” a chi uhi.

18Aman a kiang uah, “Khophia bang in Setan van a kipan a hong kia ka mu hi. 19Ngai un, gulte, aikamte sikdenna thu leh, melma thilhihtheihna tengteng tung a thuneihna k’on pia ahi; bangmah in a hon hihna kei hial ding, 20Himahleh dawite na thuthu ua a om ziak un kipak kei un; van a na min uh gelh a hih ziak in kipak zaw un” a chi hi.

Jesu Kipahthugenna

(Matt. 11.25-27; 13.16-17)

21Huailai tak in Jesu Kha Siangthou in a kipak mahmah a, “Pa aw, lei leh van Toupa, nang mi pil leh mi bengvakte kiang ah hiai thu na im a, naungekte kiang a na thanziak in k’on phat hi; ahi, Pa, huchibang hih nang ngaih in a hoih ahi. 22Ka Pa’n bangkim hon kemsak a, Tapa kua ahia, Pa loungal kuamah in a theikei, Pa leng kua ahia, Tapa leh a kiang ua Tapa in a theihsak nopnate kia loungal kuamah in a theikei” a chi hi.

23Huan nungzuite lam a nga a, a sim in, “Na thilmuhte uh a mu mitte a hampha e! 24K’on chi ahi, zawlnei tampi leh kumpipa tampite’n leng na thilmuhte uh muh a kilawp gige ua, himahleh a mu kei uh, bil a na zakte uh leng zak a kilawp thei mahmah ua, himahleh a za kei uh” a chi hi.

Samari Mi Hoih Gentehna

25Huan ngai un dantheimi kuahiam ading a, amah ze-etna din, “Sinsakpa, tangtawn hinna neihna ding in bang ka hihdia? a chi hi. 26Aman a kiang ah, “Dan laibu ah bang gelh ahia? Bangchi’n na sim a?” a chi hi.

27Huan aman “Toupa, na Pathian na lungtang tengteng, na kha tengteng, na hatna tengteng, na lungsim tengteng in na it ding ahi; nangmah na ki-it bang in na vengte na it ding ahi chih” chi in a dawng hi.

28Huan aman a kiang ah, “Na dawng dik hi; huchi in hih lechin na hing ding” a chi hi. 29Aman bel kisiamtansak ut in, Jesu kiang ah, “Ahihleh, ka inveng kua ahia?” a chi hi.

30Jesu’n a dawng a, “Kuahiam Jerusalem khua a kipan Jeriko khua ah a hohsuk a, suamhatte a tuak hi. Amau a puansilh a suahsak vek ua, a vua ua, si dektak in a pai santa uhi. 31Huan siampu kuahiam huai lampi ah a vapai suk a, a muhtak in lampi sik lehlam ah a pel maimah hi. 32Huan huchibang mah in Levi chi mi khat leng huai mun a hongtung a, a muh tak in lampi sik lehlam ah a pel maimah hi. 33Himahleh, Samaria gam a mi kuahiam zin pailai a omna a hongtung hi, a muhtak in a lainat mahmah hi. 34A kiang ah a vahoh a, a liamnate thau leh uain a buak a, a tuam a, amah gan tung ah a tuangsak a, khualbuk ah a paipih a, a kemta hi. 35Huan a zing in makhai nih a suahkhia a, khualbuk kempa kiang ah a pia a, amah na kem inla, hiai ban a na zat teng, ka hong kiknawn chiang in k’on din ding” a chi hi.

36Huai mi thumte lak ah, suamhatte tuakpa adin, invengte hipen kua hi in na gingta a? a chi hi. 37Aman, “A hehpihpa” a chi hi. Jesu’n a kiang ah, “Nang leng huai mah bang in va hih in” a chi hi.

Martha Leh Mari

38Huan a zinkawm un khua khat ah a lut a; numei khat a min Martha in a na zintun hi. 39Huai nun sanggamnumei khat a nei a, a min Mari ahi, huai minu Toupa khebul ah a tu a, a thu a ngaikhia hi. 40Martha in bel nasem in a buai mahmah a; huchi in a kiang a hongpai in “Toupa, ka sanggamnu’n kei kia nasem ding a honkhiat khawksalou na hi maw? Honhuh ding in sawl in, a chi hi.

41Toupa’n, “Martha, Martha, thil tampi na ngaihtuah a, buai neive; thil khat kia a kul ahi; 42Mari in tanhoih a tel a, huai laksak ding ahi kei” chi in, a dawng hi.

Currently Selected:

LUKE 10: PAITBSI

Highlight

Copy