JOHAN 18
18
Jesu Matna
(Matt. 26.47-56; Mk. 14.43-50; Lk. 22.47-53)
1Jesu’n huai thute a genkhit in a nungzuite toh a pawt ua, Kidron lui a kan ua, huai ah huan a om hi. Huai ah amah leh a nungzuite a lut uhi. 2Huan a mansak dingpa Judas in leng huai mun a thei a; Jesu a nungzuite toh huai ah a pawt zelzel uhi. 3Huchi in Judas in sepaih pawl, siampu liante leh Pharisaite kiang a om heutute a pi a, khawnvakte, meiselte, galvante tawi in huai ah a hongpai uhi. 4Jesu’n a tung a thil tungding tengteng a theigige a, a vapawt a, a kiang uah, “Kua ahia na zon uh?” a chi hi.
5Amau a kiang ah, “Nazaret Jesu a chi ua” a dawng uhi. Jesu’n a kiang uah, “Keimah ka hi” a chi hi. 6A mansakpa Judas leng a lak uah ading a. “Keimah ka hi” a chihtak in, a nungtolh ua, lei ah a puk duam uhi. 7Huan aman a kiang uah, “Kua ahia na zon uh?” chi in a dong nawn hi. Amau, “Nazaret Jesu” a chi uhi.
8Huan Jesu’n, “Keimah ka hi chih k’on hilhta a; nou kei hon zong na hih uleh hiaite hoihtak in khah un” a chi a a dawng hi. 9“Nang kei n’on piakte khat leng ka mangsak kei” chi a a thugen a tunna ding ahi.
10Huan Simon Peter in a namsau vom a dok a siampu lianpen sikha a sat a, a bil taklam a satkhiaksak hi. Huai sikha min Malka ahi. 11Huchi in Peter kiang ah Jesu’n, “Na namsau a pai ah siat in; Pa in nou a honpiak ka dawn kei dia hia?” a chi hi. 12Huchi in sepaih pawl leh Judate heutute’n Jesu a man ua, a henta uhi.
Jesu Siampulian Ma Ah
13Ana kiang ah a pi masa ua, Kaiapha sungpa a hih ziak in. Kaiapha, huai kum a siampu lianpen ahi. 14Kaiapha bel, mitengteng sang a mi khat sih a hoih chi a, Judate hanthawn pa ahi.
Peter In Jesu Kitheihmohbawl
(Matt. 26.69-70; Mk. 14.66-68; Lk. 22.55-57)
15Huan Simon Peter in nungzui dang khat toh Jesu a zui hi. Huai nungzuipa siampu lianpen meltheih ahi a, siampu lianpen in huangsung intual ah, Jesu kiang ah a lutsam hi; 16Himahleh Peter pawlam ah kongkhak bul ah ading hi. Huchi in nungzui dang siampu lianpen meltheih, a vapawt a, kongkhak ngaknu a houpih a, Peter a pilut hi. 17Kongkhak ngak, nungak in Peter kiang ah, “Nang leng hiai mi nungzuite lak a pangsam na hi hia?” a chi hi.
18Aman “Ka hi kei” a chi hi. Sikhate leh heutute huai ah ading uhi. A vot ziak in meihol in mei a toh ua, meilum a awi uhi. Peter leng a kiang uah a om a, ding kawm in meilum a awisam hi.
Siampu Lianpen In Jesu Thudong
(Matt. 26.59-66; Mk. 14.55-64; Lk. 22.66-71)
19Siampu lianpen in Jesu a nungzuite tanchin leh a thuhilh a dong hi. 20Jesu’n a dawng a a kiang ah, “Khovel kiang ah vantang theih in, thu ka gen gige hi; kikhopnain, Pathian biakin leh Judate omkhawmnate ah thu ka hilh zel a, a sim in bangmah ka genkei hi. 21Bang a chia kei hon dong? A kiang ua ka thugen ka thuzate dong in, ngai in, amaute’n ka thugen a thei uh a kei hiam” a chi hi.
22Huan a gentakin a kiang a ding heutu khat in Jesu a beng a, “siampu lianpen hichibang in na dawng maw?” a chi hi.
23Jesu’n a kiang ah, “Thudiklou gen ka hihleh, a gitlouhna hon theisak in. Himahleh, thupha ka gen in bang a chia hon beng?” a chi hi.
24Huan Annas in hensa in siampu lianpen Kaiapha kiang ah a sawl hi.
Peter In Jesu Kitheihmohbawl Nawn
(Matt. 26.71-75; Mk. 14.69-72; Lk. 22.58-62)
25Simon Peter in ding kawm in meilum a awi hi. “Nang leng a nungzuite lak a pangsam na hi hia?” a chi uhi. Aman, “ka hi kei” chi in, a kitheihmohbawl hi.
26Huan siampu lianpen sikha khat Peter in a bil satkhiak sakpa sanggampa’n, a kiang ah, “Huan ah k’on mu kei maw?” a chi hi.
27Huchi in Peter in a kitheihmohbawl nawn a; huan ak a khuangpah hi.
Pilat Ma ah Jesu
(Matt. 27.1-2,11-14; Mk. 15.1-5; Lk. 23.1-5)
28Kaiapha inn a apan in Vaihawmna inn ah Jesu a pinawn ua; zingsang ahi a; amau zaw Vaihawmna inn ah a lut kei uh, a lut un zaw buah in, Paikan Ankuanglui a ne theikei ding uhi. 29Amaute kiang ah Pilat a vapawt a, “Hiai mi tung ah hekna bang ahia na neih uh?” a chi hi.
30Amau a kiang ah, “Hiai migilou hikeileh na kiang ah k’on pi kei ding uh” chi in a dawng uhi.
31Huan Pilat in a kiang uah, “Nou pi unla, na dan bang un vaihawmsak un” a chi hi. Judate’n a kiang ah, “Kou thu in kuamah hihlup dan ahi kei” a chi uhi. 32Hiai thu a sih ding dan, Jesu’n a gen bang a a tunna ding ahi.
33Huchi in Pilat inn sung ah a lutnawn a, Jesu a sam a, a kiang ah, “Judate kumpipa na hi hia?” a chi hi.
34Jesu’n “Hiai ka tungtang thu nangmah lungsim puak khiak a na gen hia, midang in honhilh?” chi in dawng hi.
35Pilat in, “Kei Judami ka hi ahia? Nangmah chipihte leh siampu liante’n ka kiang ah a honpi ua ahi; thil bang ahia na hih?” chi in a dawng hi.
36Jesu’n, “Ka kumpi hihna hiai khovel ahi kei; ka kumpi hihna hiai khovel hileh Judate kiang a piak a ka omlouhna ding in, ka sikhate’n a dou ding uh. Himahleh ka kumpi hihna hiai khovel a kipan ahi kei hi” chi in, a dawng hi.
37Pilat in a kiang ah, “E, kumpipa na hi maw?” a chi hi. Jesu’n, “Kumpipa ka hi n’on chi ve. Thutak theihsak ka piansan leh khovel a ka hong paisan ahi. Kuapeuh thutak a om peuhmah in ka thu a sang uh” a chi hi.
38Pilat in a kiang ah, “Thutak bang ahia?” a chi hi. Huan huai thu a genkhit in, Judate kiang ah a va pawtnawn a, a kiang uah, “Bangmah a gitlouhna ka mu kei a chi hi.”
Jesu Si Ding a Thutanna
(Matt. 27.15-31; Mk. 15.6-20; Lk. 23.13-25)
39Himahleh Paikan Ankuangluina ah mi khat k’on pawtsakna ding dan na nei uh; huchi in Judate kumpipa hon pawtsak leng na ut uhia? a chi hi.
40Amau a kikou nawn ua, “Hiai mi zaw hi kei henla, Barabba pen hi hen” a chi uhi. Barabba suamhat ahi.
Currently Selected:
JOHAN 18: PAITBSI
Highlight
Share
Copy
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
Free Reading Plans and Devotionals related to JOHAN 18
John Reading Guide
21 Days in the Gospel of John With Levi Lusko
King of Kings
