JOHAN 17

Jesu Thumna

1Huai thute Jesu’n a genkhit in vanlam nga in, “Pa a hun a tungta; na Tapa pahtawi in, Tapa in nang hon pahtawi theihna ding in; 2Huchi a mi tengteng tung a thunei a na bawl in, a kiang a na piak peuhmahte tangtawn hinna a piak theihna ding in. 3Hiai tangtawn hinna ahi, Nang Pathian tak kia leh na sawl Jesu Khrist theih. 4Nang thilhih ding n’on piakte ka hihkhinta a, khovel ah k’on pahtawita hi. 5Pa aw, khovel omma a na kiang a thupina ka neih in, tuin nangmah kiang ngei ah hon pahtawi in.

6“Nang khovel a kipan a mi kei n’on piakte kiang ah na min ka hihlangta; amau nang a ahi ua, nang amau kei n’on piak ahi uh; amau lah na thu a zuita uhi. 7Nang kei n’on piak tengteng nang a kipan ahi chih a theita uhi. 8Nang thu n’on piakte a kiang uah ka peta a; huaite a kem ua, nang a kipan ka hi chih diktak in a theita uh, nang n’on sawl chih leng a gingta uhi.

9Amau dia ka ngetsak zaw; khovel a dia ngetsak ka hi kei, nang n’on piakte ading ahizaw, nang a ahi uhi. 10Thil tengteng kei a peuhmah nang a ahi a, nang a lah kei a ahi a; amau ziak in pahtawi in ka om hi. 11Huan kei zaw khovel ah ka omta kei ding, hiaite bel khovel ah a om ding uh; kei na kiang ah ka hong paidekta hi. Pa Siangthou aw, nang kei n’on piakte na min in hum in pumkhat a hihtheihna ding un, eimah pumkhat i hih bang in. 12A kiang ua ka om sung in, nang kei n’on piakte na min in ka hum a; amau ka don a, a lak ua khat leng a mangthang kei hi, mangthang tapa loungal, Laisiangthou a tun theihna ding in. 13Himahleh tuin na kiang ah ka hong paidekta; khovel ah hiai thute ka gen ahi, ka kipah amau ua a neih kimna ding un. 14Na thu a kiang uah ka peta hi; khovel in amau a hua a, khovel a a hihlouh ziak un, kei khovel a ka hihlouh mah bang in. 15Nang amau khovel a kipan na lakkhiak ding ngen ka hi kei a, migilou lak ah na hum ding ka chi ahizaw hi. 16Amau khovel a a hi kei ua, kei khovel a ka hihlouh mah bang in. 17Amau thutak in hihsiangthou in, na thu thutak ahi. 18Nang khovel a kei n’on sawl bang in, amau khovel ah ka sawl hi. 19Amau ziak in ka ki hihsiangthou a, amau leng thutak a a sianthouna ding un.

20“Hiaite ading kia a ngetsak ka hi kei, a thugen ziak ua kei hon gingta lai dingte ading in ngetsak ka hi; avek ua pumkhat a hihna ding un; 21Pa, nang keimah a na om leh, kei nangmah a ka om bang in, amau leng eimah a a omna ding un; nang kei n’on sawl chih khovel in a taksan theihna ding in. 22Huan nang thupina n’on piak ken amau ka peta; amau pumkhat a hihna ding un, ei pumkhat i hihmah bang in. 23Kei amau ah, nang kei ah, amau pumkhat a a om ua a bukim theihna ding un; nang kei n’on sawl chih leh, n’on it bang in amaute na it chih khovel in a theihtheihna ding in.

24“Pa, nang kei n’on piakte, ka omna a ka kiang a om ding in ka deih; leilung pian ma a itna a nang n’on piak ka thupina a muhtheihna ding un. 25Pa diktat aw, khovel in zaw nang hon theikei a, ken zaw k’on thei hi; hiaite’n leng nang kei n’on sawl chih a thei uhi. 26Huan a kiang uah na min ka theisakta a, ka theisak lai ding, nang kei n’on itna bangbang na itna amau a a om a, keileng amau a ka om theihna ding in” a chi hi.

Currently Selected:

JOHAN 17: PAITBSI

Highlight

Copy