GENESIS 37
37
Joseph Leh A Unaupate
1Jakob bel a pa mikhual a, a omna gam, Kanan ah a teng hi. 2Hiaite Jakob suante ahi uh. Joseph, kum sawmlehsagih a upa a hih in, a ute toh ganhon a khah uhi. Amah naupang a hilai a, a pa zite Bilhah leh Zilpah tapate kiang ah a om a; Joseph in a gitlouhna thu uh a pa uh kiang ah a tun hi.
3Israel in Joseph, a teklam ta a hih ziak in a tate tengteng sang in a itzaw a; puanaktual ze tuamtuam a gial a bawlsak hi. 4A pa un amah, a u tengteng sang in a itzaw chih a ute’n a thei uhi; amah a mudah ua, kampha himhim in a houpih thei takei uhi.
5Joseph in mang a nei a, a ute a hilh a, amah a mudah semsem uhi. 6Aman, a kiang uah, “Hehpih in ka mang ngai dih uh. 7Ngai un, lou ah buhphalte i na gak ua, ngai dih uh, kei buhphal a thoutou a, ading nemnom hi. Ngai un, nou buhphalte’n a hongum ua, kei buhphal ma ah a kun chiat uh” a chi hi.
8A ute’n a kiang ah, “Nang soplai in ka tung uah vai na hawm mahmah ding maw? Nang soplai in ka tung uah thu na nei mahmah ding maw?” a chi uh. Huchi in, a mang ziak in amah a mudah semsem uhi.
9Mang dang a neinawn a, a ute a hilhnawn hi, “Ngai un, mang ka neinawn hi. Ni, kha leh aksi sawmlehkhatte ka mai ah a kun uhi,” a chi hi.
10A pa leh a ute a hilh hi. A pa’n a tai a, a kiang ah, “Mang na neih bangchi mang ahia? Kei leh na nu leh na ute leisi in na mai ah ka kun taktak ding u maw?” a chi hi. 11A ute’n amah a haza ua; a pa’n bel a thugen a lungsim in a pai nilouh hi.
Joseph Zuakna Leh Aigupta A Pina
12A ute Sekem ah a pa uh ganhon khah in a hoh uh. 13Israel in Joseph kiang ah, “Na ute’n Sekem ah ahi maw ganhon a khah uh? Hongpai dih, a kiang uah k’on sawl ding” a chi hi. Huan aman, “Hiai ah ka om” a chi hi.
14Aman a kiang ah, “Na ute a damdam na uhiam, ganhon leng a damdam na hiam va en inla, a tanchin uh hong hilh nawn in” a chi hi. Hebron guam a kipan a sawlkhia a, Sekem a vapha hi. 15Mi kuahiam in amah a mu a, ngai in, pawn ah a vakvak hi. Huai mi’n, “Bang zong na hia?” chi’n, a dong hi.
16Aman, “Ka ute zong ka hi. Hehpih in ganhon a khah na uh honhilh ve” a chi hi. 17Huai mi’n, “Hiai a kipan pawt hive un, Dothan ah i hoh ding uh, a chih uh ka za” a chi hi. Joseph in a ute a delh a, Dothan ah a va mu hi.
18Amau gamlapi a kipan a na galmuh ua, a kiang nai uh a tunma in, amah thah a na sawmkhin uhi. 19Amau, “En un, mangneipa a hongpai. 20Hong un, i that dia, kawkhuk khat ah i khe ding uh. Gamsa gilou in a ne, china ni. A mangte bangchibang in a om a, chih i thei mai ding uh” a kichi uhi.
21Reuben in huai a naza a, a khut ua pan a honkheta hi. “Thah zaw i that hial kei ding uh” a chi hi. 22Reuben mah in a pa uh kiang a, a pitheihna dia, a khut ua pan a hotkhiak theihna ding in, a kiang uah, “Sisan zaw suahkei un, gamdai ah kawkhuk ah khia un, khut zaw a tung ah kha kei un” a chi hi. 23Hichi ahi a, Joseph a ute kiang a tun in, Joseph puanaktual ze tuamtuam a gial a silh, a na suahsak uhi. 24Amah a pi ua, kawkhuk ah a kheta uhi. Huai kawkhuk a vuak ahi a, tui om nawnlouhna ahi.
25An ne ding in a tu chiat ua, a dak ua, a en ua, ngai in, Ishmael khualzin mite Gilead gam a kipan a sangawngsau ua thil gimnamtui, singnai damdawi leh murra pua in Aigupta gam a paisuk dingte a hongpai uhi. 26Judah in a unaute kiang ah, “I naupa uh i thah ua, a sisan suak i im un bang phattuamna om ding ahia? 27Hong un, a tung a khut khalou in, Ishmaelte kiang ah i zuak zaw ding uh. Amah lah i nau uh, i sa ngeingei uh lah ahi ngal a” a chi hi. A unaute’n a thu a zuita uhi. 28Midian sumsinmite a hongpai ua; Joseph kawkhuka kipan a kaikhia ua, Ishmaelte kiang ah Joseph dangka sawmnih in a khawngta uhi. Amau Joseph Aigupta gam ah a pi uhi.
29Reuben kawkhuk ah a hongpai nawn a, Ngai in, Joseph kawkhuk ah a na omta kei hi. A puansilhte a botkekta hi. 30A naute kiang ah a hoh nawn a, “I nau uh a om nawn kei. Kei koi a paita ding ka hia oi?” a chi hi.
31Joseph puanaktual a la ua, keltal a gou ua, a si ah a puanaktual a diah uhi. 32Huai puanaktual ze tuamtuam a gial a khak ua, a pa uh kiang ah a honla ua; “Hiai lel ka mu ua, na tapa puanaktual ahi hia, hilou, en mah dih” a chi uh.
33Aman a na theipah a, “Ka tapa puanaktual eive. Gamsa gilou in ne eive. Joseph bohnen vek a om hi mahmah ding eive’ a chi hi. 34Jakob in a puansilhte a botkek a, saiip puan a teng a, ni tamtak a tapa a sun hi. 35A tapa tengteng leh a tanu tengteng amah lungmuan ding in a thou ua; himahleh amah lungmuan a utkei. “Sunkawm in han ah ka tapa kiang ah ka paisuk ding,” a chi hi. Amah ngai in a pa a kap hi.
36Midiante’n Aigupta gam ah Joseph a lutpih ua, Pharo nuai a heutu khat, vengmi pawl heutu Potiphar kiang ah a zuak uhi.
Currently Selected:
GENESIS 37: PAITBSI
Highlight
Share
Copy
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
