NASEPTE 2

Kha Siangthou Tunna

(Jol. 2.28-32)

1Pentikost ni a hongtun in, avek un mun khat ah a omkhawm uhi. 2Thakhat in van a kipan ging huihpi nung bang in a hongom guih a, huchi in huai in a tutna inn uh a hihdim vekta hi, 3leite amah leh amah mei bang a kihawm in, a lutung uah a hong tuang chiat hi. 4Huchi in avek un Kha Siangthou in a luahdimta a, Kha in hihtheihna a piak a a pausak bangzel in pau dang in a pauta uhi.

5Huan van nuai namchih lak a kipan Pathian limsak Juda kulmutte Jerusalem khua ah a om uhi. 6Huan ging husa a zaktak un mipi a hong kikhawm ua, michih in a pau uh amau pau chiat a a zak ziak un a lungsim uh a hong buai hi. 7Huan avek un a mangbang ua, lamdang a sa mahmah uhi, En dih uh, hiai a pau tengteng Galili gam a mi ahi kei ua hia? 8Bangchi’n ahia i vek ua pianpih pau chiat a i zak uh? 9Eite Parthai nam, Medai nam, Elamitai nam; khenkhat Mesopotamia gam a om, Judia gam a om, Kapadosia gam a om, Pento gam a om, Asia gam a om, 10Phrigia gam a om, Pamphilia gam a om, Aigupta gam a om, Kurini khaw kiang a Libia gam a om i hi ua; khenkhat Rome apan mikhualte, Judate leh a phungkaite utoh i hi ngal ua; 11Khenkhat Krit tuikulh leh Arab gam a i hi ngal ua; himahleh, Pathian thilhih thupite a gen uh eimau pau chiat in i za ngal ua! a chi uhi. 12Huan avek un lamdang a sa mahmah ua, a khiakna dan theilou in, “Hiai bangchidan ahia?” a kichi uhi.

13Khenkhat in “Uain thak a kham ua hi” chi in a nuihsan uhi.

Peter Thugen

14Himahleh Peter in sawmlehkhatte toh ding khawm in, aw ngaihtak in a kiang uah a gen a, nou Judia gam a mite aw, nou Jerusalem khua a om tengteng aw, hiai thei unla, ka thu leng ngaikhia un, 15Hiaite na gin bang un a khamkei uh, dak thumna hun ahi. 16Hiaite zawlnei Joel in a gen ahizaw:

17‘Pathian in, ni nanungte ah

hichi ahi ding,

mi tengteng tung ah ka kha ka sungbaw ding a;

na tapa leh na tanute’n ka thu a hilh ding uh;

na tangvalte un kilaknate a mu ding ua, na putekte un mang a nei ding uh.

18Ahi, huai ni’n ka sikhapate,

ka sikhanute tung ah leng ka Kha ka sungbaw ding a,

ka thu a gen ding uhi.

19Huan tunglam van ah thillamdang nuailam lei ah chiamtehna ka musak ding a;

sisan, mei, meikhu hu toh:

20Ni mial a suak ding a,

kha sisan a suak ding,

Toupa ni thupitak leh lauhuaitak a hongtun ma in.

21Huan hichi ahi dia,

Toupa min lou peuhmah hotdam in a om ding hi.’

22“Nou Israel mite aw, hiai thu za un: Nazaret Jesu, Pathian in amah zang in na lak uah thil thupite, thillamdangte, chiamtehnate a hih in a hon theichiansak hi; nou ngei in tuate na theichian uhi. 23Huai mi Pathian vaihawm tel leh theihkholh bang in na mansak ua, nou migiloute khut in Kros ah kilhden in na hihlumta uhi. 24Amah, Pathian in sihna thuaknatna phelsak in, a kaithouta a; amah sihna letden vual a hihlouh ziak in. 25Huan David in a thu a gen a,

‘Ka ma ah chiklaipeuh in

Toupa ka mu gige hi.

Ka mangbat louhna ding in ka taklam ah a om hi;

26Huaiziak in ka lungtang a nuam a, ka lei leng a kipak a,

ka sa lamentak in a om behlap lai hi.

27Misi khua ah ka kha na nuse kei ding a,

muatna na Mi Siangthou na musak sam kei ding hi.

28Nangman hinna lampite n’on theisak a;

nangman na mel in kipak in n’on hihdim ding,’ chi in.

29“Unaute aw, chikhahpa David thu laulou in na kiang uah ka gen thei hi; amah zaw a si a, vui leng a vuikhin ua, a han leng tutan in i kiang ah a omlai hi. 30Amah tuh zawlnei ahi a, Pathian in a khal a mi kuahiam sadan a a chite lak a mi khat Khrist mangtutphah a tu ding in a kaithou ding chih kichiam in a gen chih a thei hi. 31Huchi in huai tuh a theihkholh him ziak in Khrist thohnawn ding thu a gen hi,

‘Misi khua a nutsiat in a omkei a,

a luang leng a muat sam kei hi,’ chi in.

32Pathian in Jesu a kaithouta chih theihpihte i vek un i hi uhi. 33Pathian khut taklam ah pahtawi in a om a, Kha Siangthou chiam Pa kiang a kipan in a mu a, na muh uh leh na zakte uh a hon sunbuak ahi uhi. 34David zaw van ah a kahtou kei, amah ngei in,

‘Jehovah in ka Toupa kiang ah,

35“Na melmate na khepek ngakna dia ka bawl masiah,

Ka taklam ah tu kinken in” a chi a na chi hi.

36Huchi in Jesu, na kilhden uh, Pathian in Toupa leh Khrist hi khawm in a bawlta chih Israel inkuan chih in kichiantak in thei uhen” a chi hi.

Piangthak Masate

37Huan huaithu a zak un a lungtang ua sutbang a honghi ua, Peter leh sawltakdangte kiang ah, “Unaute aw, bangchi’n ka hihta ding ua?” a chi ua.

38Peter in a kiang uah, “Na khelhnate uh ngaihdamna ding in lungsim khek unla, Jesu Khrist min in baptisma tangchiat un; huchi in Kha Siangthou thawnpiak na tang ding uhi. 39A chiam nou ading, na tate uh ading, gamlapi a mi tengteng ading leh Toupa i Pathian in a kiang a a sap peuhmahte ading ahi” a chi hi.

40Huan thudang tampi in a hilhchian a; tulai khang thulimloute lak ah kihumbit un, chi in a hanthawn hi. 41Huan a thu zuipeuh in baptisma a tang ua, huai ni’n mi sang thum vel behlap in a om uhi. 42Huan sawltakte thusinsakte sin in, kithuah in, tanghou balkham in, thum in, phatuamngaitak in a omkhawm uhi.

Saptuam Masate Hihna

43Huan michih in a lauta ua: sawltakte’n thillamdang leh chiamtehna tampi a hih uhi. 44A gingta peuhmah in bangkim a kikop khawm uhi. 45A goute uh, a thilneihte uh a zuak ua, a deihdong chinglel chiat in avek ua kiang ah a hawmzel uhi. 46Huan niteng in, lungsim munkhat in, Pathian biakin ah phatuamngaitak in a om zelzel ua, a innte uah leng tanghou balkham in, nuam leh lungkim in, a an uh a ne zel uhi. 47Pathian a phat ua, mi tengteng deihsak in a om uhi. Huan a hotdam lel peuhmah Toupa’n niteng in a kiang uah a behlap sakzel hi.

Currently Selected:

NASEPTE 2: PAITBSI

Highlight

Copy