MARK 7

Ulyn ngyi chawng mâk

(Mtt 15:1-9)

1Pharisai ngyi le lekhasuimi ngyi sung kyntâ atu ngyi mychang, Jerusalem kho kyntâ â hawng ngyi chu, a kyn yng hawng rubum a. 2Hangyi ha a nungzui lawkka ngyi rang yng kut khem le bai yng sâk yng nyng mu ia, (“Akhem, ti hi rusuk chang mak” tinâ â chang.)

3Pharisai ngyi le, Judami ngyi chu ulyn ngyi chawng mâk chu tit yng pawm tâsiknin, yng kut sadim kân yng rusuk mak nung chu ne sin sa sin ma ngyi.

4(Bâzar kyntâ yng kir khawm tui yng risil mak nung, ne sin sa sin ma ngyi. Khanung, a dang tam taka dân det taknin yng pawm lom â awm, ruhum, bêl, thir bêl ngyi rusuk lom ngyi hi.) 5Khanung chu, Pharisai ngyi le lekhasui ngyi chu, “Ilom maw ny nungzui ngyi te, ulyn ngyi chawng mâk kuvangnin awm ma ngyi, kut khem le bai yng sâk?” tinin yng rythang.

6Atak chu yng kyn, “Isai chu nyngni thalêmkom ngyi chawng ai hai ril sai hi tytak âdik hi!

‘Hi maniâ ngyi hi yng mur le ky iyng mypâk.

Imyitinung, yng mulung le te ky kyntâ luk yng rylak.

7Zê khawm chang synang, yng rysyinâ kyn maniâ chawngpêk ngyi yng nyng rysyi tâsiknin,

ky iyng byk sin hi atawng â chang!’ tinin sui ai chang kuvang.

8Pathyn chawngpêk mi rang hengnin maniâ chawngpêk mi rang tou nyng milung,” a ti.

9Khanung, atak sêk ngan yng kyn. “Nyngni ngyi tyna chawngmâk rang chu nyng pawm thyi rangnin, Pathyn chawngmâk mi rang â heng chu thawp tou a lam nyng hoi hi! 10Mosi chu, ‘Ny nu le ny pâ rang zâ raw,’ ‘Mi atu khawm a nu, a pâ rang a mêtêk khoka chu that chang se,’ a ti. 11Imyitinung, nyngni chu hi khanin nyng ti sin, ‘Maniâ chu, a nu maw, a pâ kyn maw, ky ny mangnâ lom chu korban tou a chang ta,’ a ti nung, (korban chu Pathyn kyn mylân, tinâ â chang), 12a nu tâsik maw, a pâ tâsik maw, i min tho pêk rangnin phal sin mak chou a; 13mi ngyi kyn nyng chawngmâk rylân ngyi kân hi Pathyn chawng nyng mirysyl sin; hakhanin ha tamka nyng tho sin,” a ti.

Maniâ rang a mironomi

(Mtt 15:10-20)

14Mipui ngyi rang yng na kou nok a, yng kyn, “Nyng châknin hi ky chawng pheng ryngâi nang a ryngâi kyi thyi pêk rou; 15Maniâ rang pên tyngtâ a phung sunga lutnin atak rang a mirono thyi chu awm mak; 16maniâ sung atâ â sokmi ngyi chu maniâ rang a mirono mitou â chang,” a ti.

17Khanung, mipui ngyi rang yng na manin ina a lut zou kale nung, a nungzui ngyi chu a rekhennâ chawng ha a kyn lang taknin yng rythang tâk. 18Khanung, atak chu yng kyn, “Nyngni khawm hazikpui maw hoi lounin nyng awm? Pên atâ maniâ sunga â lutmi chu mirono thyi mak tinin hoi mak chou maw? 19Asik chu ha ngyi ha a mulunga lut lounin, a phunga mitou lutnin pên a sênâ kyn â sok sin,” (Hamâ tinâ chu sa lom tinka a rythyng).

20Khanung, atak sêk ngan, “Maniâ phung sung atâ â sokmi chu, hamâ rêlê tou maniâ rang a mirono sin. 21Phungsung kyntâ mi, mulung sung kyntâ chu ryvak tha mak ngyi a hawng sok sin, rawawlnâ, murunâ, mi rang thatnâ, 22myngnangnâ, ruzuknâ, rononâ, lêmnâ, hurnâ, khameretnâ, rêsêlnâ, ryymnâ, toknâ ngyi; 23hi tharo thamak tinka chu phung sung kyntâ hawng soknin maniâ rang a mirono sin.” a ti.

Luka Grik nupang khymnâ

(Mtt 15:21-28)

24A ding a, hanântâ chu Tura le Sidon khak tyng â sê ia: hanung ina â lut a, mi atu khawm yng hoi nom mak a; imyitinung, ruthup thyi khâi mak. 25Khanung chu, nupang luka, a sanu nâupangtê, rythâsy â lutmi chu a rou â hoi a, a phyimakunga vawikazawk a va rukhup ta. 26Nupang chu Grik mi â chang a, a zirnâ chu Surophoiniki mi tou â chang, atak chu a sanu phung sung kyntâ rythasy misok pêk rang tâsiknin a u tâk. 27Khanung, atak chu a kyn, “Synâu ngyi chu mânsânin khawp ngyi se; synâu ngyi bai lanin ui ngyi kyn pêk chu dik nâ ni,” a ti.

28Atak chu a kyn, “Pumâ, chang te â chang, imyitinung, tebul noia ui ngyi ngan nâupang ngyi bai rethek ngyi te yng sâk sin ha,” tinin a ril.

29Atak chu a kyn, “Ny chawngril siknin sê ta raw; rythasy chu ny sanu phungsung atâ a sok ta,” a ti. 30Khanung, a ina a vâ kir a, rythasy chu a sanu kyntâ a sok ta ia, in muna innin tou a va mu ta.

Nathawng chawng thyimak a midam

31Tura ram kyntâ â sok nok a, Sidon kho lutnin Dekapoli ram kân telnin Galili dil kyn a va tung ta. 32Khanung, luka nathawng chawng ngan sadim ril thyi mak a, a kyn yng hawng roi a, a chunga a kut bâng rang tâsiknin yng u ia. 33Khanung, mipui ngyi bil kyntâ atak rang reng a chawrainin a roi a, a kutchal le a na awnga a ton a, hanung, a michil a, a mylyi a ton a; 34hanung, ryvân tyng rawdawnnin ringik dawm a lâk a, a kyn, “Ephatha” a ti a (Hamâ chu, “Rawhawng raw,” tinâ â chang.)

35Khanung chu, a nâ chu a vân ta ia, a mylyi ai rikhit khawm ha a rawhawng ta ia, rysai taknin a chawng thyi ta.

36Atak chu yng kyn atu rang ngan ril mak rangnin tit a khap a; imyitinung, a khap rylyk dyu mitou yng ril sin. 37“Atak chu atinka sadim kân a tho ia; nathawng ngyi rang a mivân a, chawng thyi mak ngyi rang khawm a michawng sin,” yng ti a, luk yng na chawp pêk ta.

Currently Selected:

MARK 7: MOLSBSI

Highlight

Copy