MARK 6

Nazaret kho kyn Jisu rang yng êng

(Mtt 13:53-58; Luk 4:16-30)

1Hanântâ chu â sok a, a awmnâ kho kyn chu a tung ta ia; a nungzui ngyi khawm thyi yng zui. 2Hanung ryngamni â chang a, Senagok kyn yng na rysyi tâk a; hanung, mi tamka yng awm a; yng ryngâi a, luk yng na chawp pêk ta. “Hi ngyi hi hangkyntâ ai man maw ai? I singnâ maw a kyn pêk â chang ai? A kut le hazikapui kâmchawp ai tho thyi i tâ maw ai? 3Himâ hi Mari sapâ, Jakob, Joseph, Juda, Simon ngyi parolpâ, sunduk â symmi chang mak maw? A sarnu ngyi khawm yi kyn â awm ngyi chang ma ngyi maw?” yng ti a. Luk yng na chawp pêk ta. Hanung chu, a chunga yng mulung kân chang khâi mak.

4Jisu yng kyn, “Zawlnyi chu a kho ngyi tyng, a sokpui ngyi kyn, a in ngyi kyn reng chang lou chu, mawsawr man lounin awm sin mak,” a ti.

5Dam mak mi byka ngyi chunga tonnin ai midam reng chang lou chu; hanân te sin chawp reng tho thyi mak. 6Yng khym mak tâsiknin luk a chawp pêk ta.

Khanung yng na rysyi bylampânin kho ngyi kyn chu lêngnin a rêvêl ta.

Nungzui sawm lyi nika ngyi rang Jisu yng nai dep

(Mtt 10:5-15; Luk 9:1-6)

7Sawm lyi nika ngyi rang chu yng na kou a, a bawpnin yng na dep tâk a; rythâ thamak rono ngyi chunga kutnyinâ khawm yng na pêk tâk. 8Khanung, yng sêna lom kyn lâthâ reng chang lou chu, i ngan bai khawm, sawlâ khawm, sum zuli khawm rawkawl rang tânin tit yng na phal mak; 9Imyitinung, phyikawk chu sir rangnin a phal a, kanchili pâk nika sil ma rou khawm a ti. 10Atak sek yng kyn, “Nyng tungnâ in khoka kyn ngan hanântâ nyng sok mak tenka chu hanân ngan awm ta rou. 11Khanung, atu kho khawm nyng nyng lawm mak nung chu, nyng chawng yng lâk maknâ kipka kyn chu, hâ kho kyntâ nyng sok tikân chu yng na mihoinâ rangnin, nyng phyi myzâ noi kyntâ philphut chu thik rou!” a ti.

12Hanung, yng va sok ta ia risirnâ chawng yng ril a; 13rythâ thamak tamka khawm yng misok a, dam mak tamka rang khawm saryk yng phul a, dam khawm yng midam.

Baptisma â pemi Johan thi retep

(Mtt 14:1-12; Luk 9:7-9)

14Khanung mylal Herod chu â hoi a, a riming chu a hawng thang ta ia; “Baptistma â pemi Johan ha ai thi kyntâ a hawng thou nok ta ia, hamâsiknin hamâ kuvang sinthothyinâ ngyi ha a kyn sin ai tho chang tiat,” a ti.

15Lawkka chu, “Elija yng ti a,” hanung lawkka ngyi, “Zawlnyi tou, zawlnyi ngyi sung atâ luka chang at,” yng ti.

16Imyitinung, Herod chu a hoi kale nung, “Johan a lu ki tanmi rêlê ha, a hawng thou nok ta,” a ti.

17Herod rêlê ngan a nâupâ Philip nupui Herodi tâsiknin maniâ yng na dep a, Johan rang yng na miman a, jil ina khitnin a hai khum sai tâk a, Herodi rang khawm nupui rangnin a hai lâk sai ta ia; 18Johan chu Herod rang, “Ny nâupâ nupui rang ni lâk hi dik mak,” tinin a hai ti sai.

19Hamâsiknin, Herodi khawm atak rang a mumâknâ, that rang khawm â nom a, imyitinung, thyi mak. 20Herod chu Johan hi mi dik le mi rythyng tak â chang tinin ai hoi tâsiknin atak rang ha â chi, sadim kân a rung a; a chawng a ryngâi nung luk a sung â rêng sin a; imyitinung, zâipâr taknin a ryngâi sin.

21Khanung, Herod rizirni kyn chu a milyn ngyi, sipai ulyn ngyi, Galili ram kyntâ milyn ngyi tâsik pantâ a tho lâi tak kyn zo thâ a nyi ta ia. 22Herodi sanu rêlê a hawng lut a, â lâm a, Herod le a bu nêk champui ngyi rang khawm yng zâi a mipâr tâk a; khanung chu, mylal chu nupang nâupangtê kyn, “Ni nom khoka kyi zawng raw, nyng pe ket,” a ti a. 23“Ki ni zawng tinka chu, ky ram phalka tenka khawm nyng pe ket,” tinin khawm a kyn samâi â ton. 24Khanung, atak chu â sok a, a nu kyn, “Imaw zawng ket?” a va ti. Atak chu, “Baptisma â pemi Johan lu,” a ti.

25Khanung, rang taknin mylal kyn chu pylat â lut a, “Mâirâng le Baptistma â pêkmi Johan lu atun ki ni pêk ki nom,” tinin â zawng.

26Mylal chu a mulung luk a na ta ia; imyitinung, a samâiton le a bu nêk champui ngyi tâsik ha khap ngam khâi mak. 27Khanung, mylal chu a myrykmi sipai luka rang a dep tâk a, a lu hawng kui rang tâsiknin chawng a pêk. Atak chu jil sunga sênin a lu a va tan tâk a, 28a lu chu mâirâng le a hawng kui tâk a, nâupangtê rang a hawng pêk tâk, hanung, nupang nâupangtê chu a nu rang a hawng pêk tâk. 29Khanung, a nungzui ngyi chu yng hoi kale nung a rok chu va lanin thâna yng va phum tâk a.

Mi sasi ryngâka rang mikhawp

(Mtt 14:13-21; Luk 9:10-17; Jhn 6:1-14)

30Koudep ngyi chu Jisu kyn yng hawng rubum a, atinka, yng tho kipka le yng nyng rysyi tinka ngyi yng va ril a, 31atak chu yng kyn, “Nyngni ngyi reng ramchâr muna a chawrainin hawng nang tawtka rang hawng ryngam, rou,” a ti. (Mi tamka yng rêkhêl zek zuk, bu ngan ne tik nyi ma ngyi). 32Hanung chu, ramchâr mun tyng pan rangnin mawlawng le a chawrainin yng sê ta.

33Khanung, mi ngyi yng sê lâi tak kyn yng nyng mu ia, mi tamka yngni rang yng nyng risin a, kho tinka kyntâ hanân phyi le munkân sênin yng va rubum a, yng tung mâna yng va tung ta. 34Hanung chu, tuikola a tung nung mi tamka yng na mu ta ia, a myryk bou tâ merâ tamka ngyi kuvang yng chang tâsiknin luk ryng yng na mu ta, chawng tamka yng na rysyi tâk.

35Khylou chu a hawng chang ta ia, a nungzui ngyi a kyn yng hawng, “Hina hi ramchâr mun â chang khylou khawm a hawng chang ta ia; 36yngni ngyi rang hi yi dema lou ngyi kyn le kho ngyi kyn sênin, nêk sâk yng nêk yng va sâk thyi rang kânin yng na dep ta raw,” yng ti.

37Imyitinung, atak chu yng kyn “Nyngni ngyi lam ne lom sa lom chu yng na pe rou,” tinin yng na ril. Yngni ngyi chu a kyn, “Baitêp duli ryza nika man va rawchawnin maw nêk sâk yng na pe kyi?” yng ti a.

38Hanung, atak chu, yng kyn, “Baitêp hazika maw nyng nyi? En rou ta,” yng na ti. Yng nyi zyrâ yng hoi kale nung, “Baitêp ryngâka le ngâ inika,” yng ti.

39Khanung, atak chu yng châknin chyk chunga a dawl dawlnin yng na misung rangnin yng na rep. 40Khanung, tângka kyn ryzâka, sawm ryngâka ngyi kânin yng sung ta. 41Jisu chu baitêp, ryngâka le ngâ inika chu a lâk a, ryvân tyng rawdawnnin bor a pêk a, baitêp ngyi chu a kham a, yng makunga sem rang tânin a nungzui ngyi rang yng na pêk tâk, ngâ inika le reng khawm mi tamka ngyi rang yng na sem. 42Yng châknin yng sâk a yng na khawp ta. 43Khanung, bai nyng le ngâ nyng ngyi chu tapawng sawm lyi nika bitnin yng rut. 44Bai â sâk ngyi chu upâ ulyn zir sasi ryngâka yng chang.

Tuichunga lam â sê

(Mtt 14:22-33; Jhn 6:15-21)

45Atak rêlê ngan mipui ngyi rang yng nyng michin sunga râlka tyng Bethsaida kho kyn mânsâ hai se rangnin; a nungzui ngyi ang romonin mawlawnga lui rang tânin yng na rep a. 46Yngni rang yng na michin zou nung chawngmychai rang tânin tânga a sê ta. 47Khylou tyng nung, mawlawng chu dil mylâi taka a hai awm ta, atak chu amân reng ngan tânga â awm a, 48yng mawlawng vai atâ reng ngan yng mulung a sung â rêng kân â mu ia, (thirthi ha aletlam tyng ai nam tâsiknin) khozingrubup kyn dil chunga a phyi le lam sênin yng tyng khak a hawng pan; yng na êl rang a rawthawk. 49Imyitinung yngni chu dil chung kyn a phyi le lam sênin yng hai mu nung chu, pathynsy rinim maw sonnin, khaichymnin yng mêhêt ta, 50yng châknin atak rang yng mu ia, luk yng rythâ a vai ta. Imyitinung, atak chu yngni rang tyk ngan yng na moson tâk a, yng kyn, “Sungdâi taknin awm rou; kyima tou ki chang; chi ma rou,” a ti. 51Mawlawnga yng bylap a va lut ta, thâivo chu a mawng ta. Khanung, yng mulung le chu luk yng na chawp pêk ta ia; 52bai retep chu i hoi thyi ma ngyi a, yng mulung ai khyu tâsiknin.

Genesaret rama dam mak midam

(Mtt 14:34-36)

53Râl dang tyng yng rykan zou nung Genesaret ram tânga yng tung ta. Tuikola mawlawng chu yng khit a, 54mawlawng kyntâ yng chin zou nung chu mi ngyi atak rang vawikazawk ngan yng hai risin thyi ta, 55hâ rama mun tinka kyntâ vu vu yng sê ta ia, â awm tinin yng hoinâ kipka kyn, dam mak ngyi rang yng in mun ngyi le rozonnin yng nyng roi tâk. 56Khanung, khotê ngyi kyn, kho lyn ngyi kyn, lou ngyi kyn, mun tinka kyn ngan a lutnâ kipka kyn dam mak ngyi rang bâzar ngyi kyn yng nyng mi in a, a ponmortê lo ton rangnin luk yng zawng a; hanung, atak rang â ton kipka chu thyi yng na dam ta.

Currently Selected:

MARK 6: MOLSBSI

Highlight

Copy