MARK 5

Gerasin rythasy lut a midam

(Mtt 8:28-34; Luk 8:26-39)

1Dil râl, Gerasin mi ngyi ram chu yng hawng tung ta. 2Khanung, mawlawng kyntâ sok zounin mi luka rythasy â lutmi, thân kyntâ hawng soknin vawikazawk a hawng pan tâk a; 3hamâ chu thân ngyi kyn ngan â awm sin a, mi atu khawm atak rang chu sikawl le ngan khit thyi khâi ma ngyi a; 4a phyi le a kut kyn khawm sikawl le yng khit ta sin a; imyitinung, sikawl ngyi chu phyk phyk a sat zou a, phyi le kut rykhitnâ sikawl ngyi khawm a khyk sin a; maniâ atu khawm atak rang a mook zou awm khâi mak, 5Sun le zân thân ngyi kyn le tâng ngyi kyn pat a mêhêt sin a, lung ngyi le khawm a ryât sin.

6Khanung, âla kyntâ Jisu rang a mu kale rytounin a va pan a, a va lau a; 7a thyi tykka mêhêtnin, “Jisu, Pathyn rysâng chemmi Sapâ, kyima le nyngma te yi na rutunâ imaw â awm? Kyi ron hâm mak rangnin Pathyn rimingnin nyng ki u,” a ti. 8Jisu ha a kyn, “Nyngma rythasy, maniâ sung kyntâ sok raw,” a ti.

9Atak chu, “Ni riming imaw?” tinin a rythang a, atak chu, “Ki riming chu Nuaia â chang, tamka ki chang siknin,” a ti. 10Khanung chu, hâ ram kyntâ yng na um mak rangnin Jisu kyn rik titnin a u tâk.

11Hâ tânga vawk châk yng awm. 12Khanung, rythasy ngyi chu, “Vawk sung kyn lut rangnin kyi na dep raw, yng kyn kyi lut thyi rang kân,” tinin a kyn yng zawng. 13Khanung, yng na dep a, hanung rythasy ngyi chu yng sok a, vawk sung ngyi kyn yng lut a; hanung vawk châk ngyi chu (Sasi nika yng chang) haurak kân rytounin, tuili kyn pheng yng va rochom a; hanung tui kylyknin yng na thi ta.

14Khanung, â vul ngyi yng rytou a, kho ngyi kyn le in ngyi kyn yng va ril a, “Imaw a chang tâk?” tinin en rangnin yng hawng. 15Jisu kyn yng hawng tung a, rythasy lut, Nuaia ai manmi ha, pon silnin, maniâ dik tak mulung nyinin ai sung yng hawng mu ia; hanung yng chi ta. 16A hoi ngyi chu rythasy â manmi chunga tharo ai tung dân le, vawk ngyi retep khawm hangyi rang yng nyng hai ril tâk.

17Khanung chu, hangyi ha yng ram kyntâ rykhai rangnin yng mêthêm tâk.

18Mawlawnga a lut tona hâ rythasy ai manmi ha Jisu bylap pat awm rangnin â zawng.

19Imyitinung, Jisu phal mak a, a kyn, “Ni ina ny sokpui ngyi bylap va kir nang, Pumâ ny chunga a tulsin dân le ryng na mu dân hi va ril raw,” tinin mitou a ril tâk. 20Khanung chu, â se ia, Dekapoli kho ngyi kyn chu Jisu a chunga a tulsin dân chu a va ril tâk a; khanung chu, mi ngyi pheng ngan luk yng na chawp pêk ta.

Jaira sanu le thi rysar a midam

(Mtt 9:18-26; Luk 8:40-56)

21Jisu chu mawlawng le râlka tyng a hawng rykan nok nung, maniâ tamka a kyn yng rubum a; hanung, atak chu dil kola â awm a.

22Khanung, Senagok kyntâ ulyn ngyi bil kyntâ luka a riming Jaira chu â hawng a; Jisu rang a mu kale a phyi makunga a va rukhup a, 23“Ky sanu nâupangtê thi rodonnin â awm a; hawng sangnin a hawng dam thyi rang kân hawngnin a chunga nu kut bâng rang tâsiknin nang ki u hi,” tinin mulung tytak le â u ia.

24Khanung chu Jisu a bylap â sê a, hanung mi tamka yng ruzul a, yng na va reet zik zuk ta.

25Khanung, nupang luka, kum sawm lyi nika thi rysarnin syrang mak a, 26Daktawr tamka kyn a ry ennâ luk ngan a tor ta, ai nyi tinka khawm a mythâm zou ta ia, tha rang tyng nêknin a rawngawk tyng mitou a pan rylyk a; 27hamâ ha Jisu retep hoinin, a nunga mi tamka bil kân â hawng a, a pon chu a hawng ton. 28“A pon ngan tonnin, kyi dam thyi at,” ti ha a mulung ryvak chu â chang.

29Vawikazawk ngan a thi rysar chu a hawng dam ta ia, a rikho chu a dam ta tinin atak chunga a rohoi thyi ta.

30Jisu chu a sung atâ sinthothyinâ ai sok sin chu â sok tinin â hoi a, vawikazawk ngan mipui ngyi tyng â ngat a, “Atu maw ky pon â tonmi ha?” tinin a rawk.

31Khanung a nungzuimi ngyi chu a kyn, “Mi tamka ngyi ny iyng et hi ni mu korok, ‘Atu maw ka ton? Hakhanintâ ni ti maw ai?’ ” yng ti a.

32A tonmi rang mu rangnin pheng tyng a en, 33hanung chu, hâ nupang chu a chunga sin ai tho pêk chu hoinin chinin chun bylamnin â hawng a, a makunga rukhupnin, a kyn chawng dik pheng a ril tâk. 34Atak chu nupang kyn, “Ky sanu, nykhymnânin na dam ta, sungdâi taknin sê ta raw, ny rikho kyntâ chu nyng dam tar se,” a ti tâk.

35Chawng a la ril lâizing kyn Senagok ulyn in kyntâ chu mi yng hawng a, “Ny sanu a thi ta; imaw nget Pumâ rang te ron lom khâi?” yng ti.

36Imyitinung, Jisu chu yng chawngril ngyi ryngâi lounin senagok ulyn rang chu, “Chi ma raw, khym lam khym raw,” a ti tâk. 37Khanung, Peter, Jakob nâupâ Johan ngyi reng chang lou chu atak rang zui rang tânin phal khâi mak. 38Khanung, senagok ulyn in a vâ tung a, Jisu chu yng nai hai rawkhawl remrum le yng chap ir ur, yng hai pung ur ur a va mu ta. 39Khanung, a vâ lut a, yng kyn, “Itâ maw pung er urnin nyng chap tâk? Hi nâupang ai thi chang mak, ai in tou hi,” a ti.

40Yngni chu nuihêk yng thâk a, imyitinung, atak chu pheng yng na misok a, nâupang nu le pâ le a bylap â awm ngyi rang khawm yng na roi a, nâupang awmnâ kyn a vâ lut. 41Khanung, hâ nâupang kut a man a, a kyn, “Talithakumi!” a ti a. (Hamâ tinâ chu, “Alit, thou raw, nyng ki ti hi!” tinâ â chang).

42Hâ nâupangtê chu â thou a, vawikazawk a kal thyi ta; atak chu kum sawm lyi nika a chang ta. Yngni chu bykka yng nai chawp pêk chang khâi mak. 43Khanung, yng kyn, “Himâ hi atu rang khawm mihoi ma ngyi se,” tinin rik titnin a ril a; hanung chu nêk sâk pe rangnin yng na rep.

Currently Selected:

MARK 5: MOLSBSI

Highlight

Copy