मरकुस 14

येसुसिन धर'आ गे मोका बेद्दना

(मत्ता 26:1-5; लूक 22:1,2; यॊ 11:45-53)

1ऎंड़ उल्‍ला ख़ॊख़ा कट्टना#14:1 यहूदीर ही ओन्‍टा परब। इस्राऎल आलर मिसर राजी ती उरखना ही मुन्‍द माख़ा धर्मेसी पिटना पैकस आरिन कट्टरकी मिसर राजी ता आलर ही जेट्टा ख़द्दारिन पिटियस। इदन यहूदीर कट्टना परब मन्नर। अरा बिगर बिदगी असमा ही परब#14:1 यहूदीर कट्टना परब आबोन ओन हप्‍ता मननर। अन्ने मन'ओ बारी गोट्टा हप्‍ता नू बिगर बिदगी ही असमा मॊख़नर। असमा बिदगी ती फुलरना ही पाब मल ऎररकी मिसर राजी ती लॆम आर गे उरखना रहचा, इदन सुरता नना गे आर मन्नर। इदन आर बिगर बिदगी ही परब ब'अनर। मन्ना रहचा। मुध नैगर अरा नॆग सिखाब'उर एकासे येसुसिन ठग'अरकी धर'ओत ती पिटत'ओत एन्ने मोका बेद्दते र'आलियर।#निर्ग 12:1-27 2लिकिन आर ताम ताम ती ब'आलियर, “परब ही उल्‍ला नू अम्‍बोत नना। एन्‍देरगेका आ उल्‍ला नू ननोत होले, आलर थोकबो‍काम्‍ब'ओर अरा हुलहुली ननोर।”

बेतानिया नू ओन्‍टा आली येसुसिन गमगमरना इसुंगन तुन्‍दी

(मत्ता 26:6-13; यॊ 12:1-8)

3येसुस बेतानिया पद्दा नू सिमॊन नामे आलासी एड़पा नू रहचस। एकास मुन्‍द खसरा रोगी रहचस। येसुस सिमॊनसी एड़पा नू मंडी ओनालियस। ख़ने ओन्‍टा आली पंडरू पखना ही सं‍जगी नू नगदे दाम ही जटामासी ही अर्रगा गमगमरना इसुंग ओन्‍द्रा बरचा। आद सं‍जगिन चलख़ा ती इसुंगन येसुसी कुक्‍कु नू तुन्‍दिया।#लूक 7:37,38 4ख़ने असता जोक्को आलर उकुलबुकुल ती ओर्त इरिब नू ब'आलियर, “ई गमगमरना इसुंगन एन्‍देरगे एन्ने नठाबातारा? 5ई इसुंग ही दाम ओर्तोसी ओन बछर ही कमाब'अना ही भुती मनी, इदन कीड़र गे चितारकी र'ओ दने।” एन्ने आर अदिन नगदे केप्‍पर।

6येसुस आरिन बाचस, “इदिन अमा केबा, इदिन अमा दिकदिकाब'आ। एन्‍देरगेका ईद गा एंगा गे दौ नंजकी र'ई। 7कीड़र निम्‍है गने सगरघड़ी र'ओर, होले नीम इकला ओंगोर आ उल्‍ला आर गे दौ नना ओंग्दर। लिकिन ऎन निम्‍है गने बग्‍गे उल्‍ला मल र'ओन।#व्य 15:11 8आद एन्‍देर नना उंगी अदिन नंजकी र'ई। ईद एंग्‍है माड़ना ही सपड़'अना नू एंग्‍है मॆद नू मुन्‍द तिम इसुंगन तुन्‍दकी र'ई। 9ऎन निमन ओन्‍टा मुदे कत्‍था तेंगदन, सौंसे ख़ॆख़ेल नू एक्‍स‍अनिम दौ कत्‍था तेंगर'ओ असन ईद ही नलख ईद ही सुरता गे तेंगतार'ओ।”

यूदस येसुसिन धर'आ गे संगे चि'अदस

(मत्ता 26:14-16; लूक 22:3-6)

10ख़ने यूदस इसकारियॊत नॆ बारा चेलर ती ओर्तोस रहचस, आस मुध नैगर गुसन केरस। एन्‍देरगेका आस येसुसिन धरत'आ गे आर गे संगे चि'आ बिद्दियस। 11आर इदिन मेंजर ख़ने खुसमारर, अरा आर आस गे ढिबा चि'आ गे गच्‍छरर। ख़ने आस आर गे संगे चि'आ गे येसुसिन धरत'आ गे मोका बेद्दा हेलरस।

येसुस चेलर गने कट्टना ही ओना मॊख़नन मॊख़दस

(मत्ता 26:17-30; लूक 22:7-23; यॊ 13:21-30; 1कोरि 11:23-25)

12कट्टना परब ही मुन्‍द उल्‍ला इकला यहूदीर भेंडो ख़द्दन दाँड़े अरगर अरा आर बिगर बिदगी ही असमा मोक्‍खर। ख़ने येसुसी चेलर आसिन में‍जर, “नीन एन्‍देर बेद्ददय ऎम एसन कालरकी कट्टना ही ओन्ना-मॊख़नन निंगा सराजमा ननोम?”

13ख़ने आस तंग्‍है चेलर ती इरबरिन त‍इय्‍यस अरा आरिन बाचस, “नगरे नू कला, ओन्‍टा आलस सं‍जगी नू अम्मु चेड्डका निमा गे ख़क्ख्र'ओस। आसी ख़ॊख़ा ख़ॊख़ा कालके। 14आस एका एड़पा नू क'ओस, आ एड़पा उर्बासिन ब'अके, ‘गुरुस ब'अदस का एंग्‍है पाही कुठली एसन र'ई, एसन एंग्‍है चेलर गने कट्टना ही ओन्ना-मॊख़नन मॊख़ोन?’ 15आस निमन ओन्‍टा सिंगराचका सपड़ाचका म‍इय्‍याँ ता कोहाँ कुठलिन ऎद'ओस। नीम असन नमा गे कट्टना ही ओन्ना-मॊख़नन सपड़'आ।”

16अबड़ा दुयो चेलर उरखर अरा नगरे नू केरर, अरा येसुस एकासे बाचकाचस अन्नेम ख़क्‍खियर। अरा कट्टना परब ही ओन्ना-मॊख़नन सपड़ाचर।

17बीड़ी पुत्तिया ख़ने येसुस बारा चेलर गने आ एड़पा नू बरचस। 18आर ओना मॊख़ालियर, ख़ने येसुस आरिन बाचस, “ऎन निमन मानिम ब'अदन, निम्‍है ती ओर्तोस एंग्‍है गने ओना मॊख़ालदस, आस एंगन धरत'आ गे संगे चि'ओस।”#भज 41:9 19इदन मेनरकी आर हेन्‍दवारर केरर। अरा आर ओरोत ओरोत आसिन ब'आ हेलरर, “आस ऎन हिकदन का?”

20आस आरिन बाचस, “आस नीम बारो ती ओर्तोस हिकदस, आस एंग्‍है गने डुभा नू असमन ओतदस मॊख़दस। 21धर्मेसी कत्‍था तिंगुर नेम्हा पुथी नू एंग्‍है पत्त नू एन्‍देर लिखचकानर अन्नेम मनवा ख़द्दन ऎन खे'ओन दने। लिकिन नॆ एंगन धरत'आ गे संगे चि'अदस आसी मुंज्रना नगदे भयभयान मनो। आस मल कुन्‍द्रका होले, आस गे दौ रहचा।”

22आर मॊख़ालियर, ख़ने येसुस असमन होच्‍चस ती धर्मेस गे धन्‍यवाद नंजस। फिन अदिन किच्‍चियस, अरा चेलर गे चिच्‍चस अरा बाचस, “ओन्‍दा, मॊख़ा, ई असमा एंग्‍है मॆद हवे।”

23फिन आस ओन्‍टा डुभा नू अंगुर रासिन होच्‍चस, अरा धर्मेस गे धन्‍यवाद नंजस। अरा आस अदिन आर गे चिच्‍चस। अरा आर आ डुभा ती ओं‍डर।

24ख़ने आस आरिन बाचस, “ई अंगुर रासी एंग्‍है ख़ॆंस हवे एकदा ऎन बाहत'आ गे कालालदन, ई ख़ॆंस ती ऎन बग्‍गे आलारिन पाप ती अम्‍बा गे धर्मेस नंजका गच्‍छरकन बड़ियर ननोन।#निर्ग 24:8; यिर्म 31:31-34 25ऎन निमन ओन्‍टा मानिम कत्‍था ब'आलदन, ऎन धर्मेसी राजी ननो बारी पुना अंगुर रासी ओन्ना गूटी इदन ई तरिका ती मुन्‍द इकला हूँ मल ओनोन।”

26फिन आर ओन्‍टा डं‍डी पाड़ियर अरा उरखरकी जैतून परता तरा केरर।

पतरस येसुसिन बलदन ब'अनन येसुस मुन्‍द तेंगदस

(मत्ता 26:31-35; लूक 22:31-34; यॊ 13:36-38)

27ख़ने येसुस आरिन बाचस, “नेम्हा पुथी नू एंग्‍है पत्त नू लिख्रकी र'ई,#जक 13:7

‘ऎन महरासिन पिटोन,

अरा आसी भेंडो भिड़कार'ओ कालो’

एन्ने नीम ओर्मर एंगन अम्‍बोर ती बोंगोर क'ओर। 28लिकिन ऎन केचका ती उज्‍जा चॊचका ख़ॊख़ा निमन ती मुन्‍द गलिलेया क'ओन, अरा असन निमन भेंटार'ओन।”#मत्ता 28:16

29लिकिन पतरस आसिन बाचस, “ओर्मर निंगन अम्‍बोर होले अम्‍बोर नेख़‍ओन, ऎन मल अम्‍बोन।” 30ख़ने येसुस आसिन बाचस, “ऎन निंगन ओन्‍टा मुदे कत्‍था ब'अदन, इन्नम ई माख़म दुई हॆल ख़ॆर चींख़ना ही मुन्‍द नीन तीन हॆल एंगन बलदन ब'ओय।”

31लिकिन पतरस अउरिम हूँ कोड़हे बाचस, “एंगा निंग्‍है गने खे'अना मनो दिम होले हूँ, ऎन इकला हूँ निंगन बलदन मल ब'ओन।” एन्नेम नन्ना ओर्मा चेलर हूँ बाचर।

येसुसी गेतसेमनी नू बिन्‍ती

(मत्ता 26:36-46; लूक 22:39-46)

32फिन येसुस अरा आसी चेलर गेतसेमनी नामे ओन्‍टा अड्डा नू बरचर। ख़ने येसुस तंग्‍है चेलारिन बाचस, “ऎन बिन्‍ती नना कालालदन, एंग्‍है किर्रना गूटी इसन उक्‍का र'आ।” 33तहाँ आस पतरस, याकॊब अरा यॊहनसिन तंग्‍है गने होच्‍चस केरस। आस नगदे कलपार'आ अरा खिलपत मना हेलरस। 34अरा आस आरिन बाचस, “ऎन नगदे हेन्‍दवारदन, अरा ईद एन्ने हवे ऎन खे'अना ही बेड़ा नू र'अदन। नीम इसन र'आ अरा जॊहचका र'आ।”

35अरा आस कटी गुना मुन्‍द केरस। अरा आस ख़ॆख़ेल नू खत्तरस ती बिन्‍ती नंजस का मना ओंगो होले, ई खिलपत एंगा अम्‍बो मना। 36अरा आस बाचस, “अना एंग्‍है बंगायो, निंग्‍है ती उर्मी दिम मना उंगी। औंगे एंग्‍है ई दसा ती बछाब'आ, होले ऎन अक्‍कुन खिलपत अम्‍बोन मना। लिकिन एंग्‍है मने लेक्‍खा मला, निंग्‍है मने लेक्‍खा नना।”

37फिन आस बरचस अरा चेलारिन ख़न्‍द्रना ख़क्‍खियस ती आस आरिन एज्‍जस अरा पतरसिन बाचस, “अना सिमॊन, नीन ख़न्‍द्र'आलदय, नीन ओन घड़ी हूँ जॊहचका र'आ पोलकय का? 38ऎन एन्‍देर बाचकन अदिन नीम नना गे गा बेद्ददर, लिकिन अदिन नना गे निमा पूरेम सवंग मलकी। औंगे जॊहचका र'आ अरा बिन्‍ती नना का निम्‍है बिड़दो नू इन्द्रिइम बर'ओ होले नीम छेक'आ ओंगोर।”

39आस फिन किर्रिम बिच्‍चियस, अरा मुन्‍द ता लेक्‍खम बिन्‍ती नंजस। 40आस फिन बर'अरकी आरिन ख़न्‍द्रना ख़क्‍खियस। एन्‍देरगेका आर मथलारका केरकाचर। आस आरिन एज्‍जस ख़ने आर बल्‍लालियर का आसिन एन्‍देर उतारा चि'ओत।

41तहाँ आस अउरिम केरस ती बिन्‍ती नंजस। फिन तिसर बारी आस बरचस अरा आरिन अउरिम ख़न्‍द्रना ख़क्‍खियस ती आरिन बाचस, “अक्‍कु ख़न्‍द्रते र'अरकी ख़न्न ऎख़ोय का? हुरू! एंग्‍है दुक्‍खे सारना ही बेड़ा अंड़सिया केरा। ऎरा, मनवा ख़द्दन एंगन धर'आ गे ओर्तोस, पपहा आलारिन संगे चि'आ कालदस। 42चो'आ, आसी तरा क'ओत! ऎरा! एका ओर्तोस एंगन धर'आ गे संगे चि'अदस आस हेद्दे बर'आलदस।”

यूदस येसुसिन धरत'अदस

(मत्ता 26:47-56; लूक 22:47-53; यॊ 18:3-12)

43येसुसी एन्ने ब'अना गनेम आचका बारो चेलर ती ओर्तोस यूदस बरचस। आसी गने तलवार अरा सोट्टा धरचका ओन्‍टा गोंहड़ा बरचा। आरिन मुध नैगर अरा नॆग सिखाब'उर अरा सेयान आलर त‍इय्‍का रहचर। 44यूदस एन्ने चिन्‍हा चिच्का रहचस का ऎन नॆकन चोंखोन आसिम येसुस हिकदस, एकाबारी ऎन चोंखोन आसिन धर'अरकी कोड़ेम हो'अके। 45यूदस बरचस ती लॆम येसुस गुसन केरस, “अना गुरु!” बाचस ती येसुसिन चुंखियस#14:45 चोंखना, गुरुसिन परघ'अना ही असता नीती हवे।। 46ख़ने गोंहड़ा येसुसिन धरचा अरा गुड़चा। 47आ बारी येसुसी ओर्तो चेलस तंग्‍है तलवारन नतगियस ती कोहाँ नैगासी जॊंख़ासिन खोत्तस। लिकिन आसी ख़ेबदा लेका खं‍डरा।

48-49येसुस आरिन बाचस, “ऎन गा उर्मी उल्‍ला धर्मेसी मन्दिर नू निम्‍है गने सिखाब'आ लिक्‍कन। ख़ने नीम एंगन मल धरचकर। नीम डाकू आलारिन धरना लेक्‍खा एंगन धर'आ गे तलवार अरा सोट्टा धर'अरकी बरचकादर। लिकिन ईद इदगे मं‍जा का धर्मेसी कत्था तिंगुर नेम्हा पुथी नू एंग्‍है पत्त नू लिखचका कत्‍था पूरा मनो।”#लूक 19:47; 21:37

मरकुस इलचका ती बोंगदस

50ख़ने आसी उर्मी चेलर आसिन अम्‍बरकी बोंगर केरर। 51आ बारी आसी गने चॊंख़्र'‍ऊ ओन्‍टा जॊंख़स#14:51 ईसी नामे यॊहन मरकुस हवे, ईस दिम ई पुथी ही लेकख हवे। तंग्‍है निठंग मॆद नू चदरन झपर'अरकी आसी गने चॊंख़्रस। आर आ आलासिन हूँ धरचर। 52ख़ने आस चदरन अम्‍बरकी लंगड़ा बोंगस केरस।

यहूदी कोहाँ सभा ही मुन्‍द येसुस

(मत्ता 26:57-68; लूक 22:54,55,63-71; यॊ 18:13,14,19-24)

53फिन अबड़ा आलर येसुसिन कोहाँ नैगस गुसन होच्‍चर। असन उर्मी मुध नैगर अरा सेयान आलर अरा नॆग सिखाब'उर ख़ॊंड़रर। 54पतरस गेच्‍छा ती येसुसी ख़ॊख़ा ख़ॊख़ा कोहाँ नैगासी चाली गूटी केरस। अरा असन धर्मेसी मन्दिर ख़ा‍पुर गने ओक्‍करकी आस चिच्‍ची अख़र'आ हेलरस।

55मुध नैगर अरा गोट्टा यहूदी कोहाँ सभा येसुसिन पिटत'आ गे आसी बिड़दो नू गोवाह बेद्दना नू लक्‍की रहचा, लिकिन ओन्‍टा हूँ मल ख़क्‍खरा। 56नगदे आलर आसी बिड़दो नू ठकना गोवाह चि'आलियर, लिकिन आर ही गोवाह ओन बेसे मल रहचा।

57छेद्दे नू जोक्को आलर आसी बिड़दो नू चॊचर ती ठकना बदी नंजर अरा एन्ने ब'आलियर। 58“ऎम ईसिन एन्ने ब'अना मेंजका र'अदम, ‘ऎन आलर ती कमचका ई धर्मेसी मन्दिर आबोन धस'ओन चि'ओन, अरा तीन उल्‍ला नू ऎन नन्ना कम'ओन, आद आलर ही ख़ेक्खा ती कमरका मल र'ओ’।”#यॊ 2:19 59अन्नु हूँ आर ही गोवाह ओन्‍टम मल उक्‍किया।

60ख़ने कोहाँ नैगस मझी नू इज्‍जस ती येसुसिन मेंजस, “नीन इन्द्रिइम किर्त'अर मल चि'अदय का? इबड़ा आलर निंग्‍है बिड़दो नू एन्‍देर गोवाह चि'अनर अदही पत्त नू नीन एन्‍देर ब'अदय?” 61लिकिन येसुस कलेकसे अकलगुम रहचस अरा एन्‍देर हूँ किर्त'अर मल चिच्‍चस। ख़ने कोहाँ नैगस फिन आसिन मेंजस, “नीन महबा ही जॊगे धर्मेसी ख़द्दय मसी हिकदय का?”

62ख़ने येसुस बाचस,#दानि 7:13 “ऎन हिकदन, ‘अरा नीम मनवा ख़द्दन एंगन उर्मी नू सवंग उइय्‍यू धर्मेसी तीना चोक्‍ख उक्‍का ती राजी नन्नन ऎरोर। अरा नीम एंगन मेर्ख़ा नू चरियो तरा बदाली ती एत्तनन ऎरोर।’”

63येसुसिन ई ब'अनन मेंजस ती कोहाँ नैगस तंग्‍है बरमारनन ऎद'आ गे तंग्‍है किचरिन चर्रियस, तहाँ बाचस, “अक्‍कु नमा गे ईसी बिड़दो नू गोवाह ही एन्‍देर चाड़ र'ई? 64ईस धर्मेसी बिड़दो नू तंगन धर्मेसी लेक्खा जोक्‍खचस, ई ब'अनन नीम मेंजकर, ईसी पत्त नू नीम एन्‍देर सोचदर?” आर ओर्मर बाचर, “ईस गुन्‍हस हिकदस, ईसिन पिटना दिम मनो।”#लौव्य 24:16

65ख़ने जोक्‍कोर येसुसी म‍इय्‍याँ तुप्‍पा हेलरर, अरा आसी मुहिन डब'अरकी घुसियालियर, अरा ब'आलियर, “नीन धर्मेसी कत्‍था तिंगुस होले एमा गे तेंगा का निंगन नॆ लौच्‍चा?” अरा ख़ा‍पुर आसिन होच्‍चर ती थपड़ाचर।

पतरस येसुसिन बलदन ब'अना

(मत्ता 26:69-75; लूक 22:56-62; यॊ 18:15-18,25-27)

66पतरस बहरी चाली नू रहचस ख़ने कोहाँ नैगासी ओन्‍टा जॊंख़ पेल्‍लो असन बरचा। 67आद पतरसी चिच्‍ची अख़रनन ईरिया, अरा आसिन थिथवाँ ईरिया ती बाचा, “नीन हूँ गा नासरेत पद्दा ता आ येसुस गने रहचकय।”

68लिकिन आस नटचस ती बाचस, “ऎन बलदन, अरा ऎन मल बुझुरदन का नीन एन्‍देर ब'आलदी?” फिन आस बहरी बखड़े नू केरस। [ख़ने ख़ॆर चींख़िया।]

69आ जॊंख़ पेल्‍लो आसिन असन ऎररकी हेद्दे इज्‍जका आलारिन बाचा, “ईस हूँ आर ही ती ओर्तोस हिकदस।” 70लिकिन पतरस अउरिम बाचस, “ऎन आसिन बलदन।” अरा जोक्को बेड़ा ख़ॊख़ा असन इज्‍जका आलर अउरिम पतरसिन बाचर, “नीन मानिम अबड़ा आलर ती ओर्त हिकदय, एन्‍देरगेका निंग्‍है कत्‍था ती लग्‍गी का नीन गलिलेया जिला ता हिकदय।”

71ख़ने पतरस तंगन सरप'आ अरा किरिया मॊख़ा हेलरस, “ऎन आ आलासिन बलदन, नीम नॆखा पत्त नू ब'आलदर।”

72ख़ने लॆम दुई हॆल ख़ॆर चींख़िया। ख़ने पतरस गे येसुसी आ बाचका कत्‍था सुरता बरचा, “पारेंड़ मून्‍द ख़ॆर चींख़ना ही मुन्‍द नीन तीन हॆल एंगन बलदन ब'ओय।” ख़ने आस इदन सोच'अरकी चींख़ा हेलरस।

Currently Selected:

मरकुस 14: KURUXBSI

Highlight

Copy