मत्तायोस 9

येसुस लकवा बेमरहासिन कोड़े नन्दस

(मर 2:1-12; लूक 5:17-26)

1इदही ख़ॊखा येसुस डोंगा नू अर्गियस ती समुदर ही आ पक्‍खे तंग्‍है नगरे केरस। 2आ बेड़ा नू जोक्‍क आलर ओर्त लकवा बेमरहासिन खटी नू बिड्रका रांगे येसुस गुसन ओन्‍द्रर। आर ही पत्त'अनन ईरयस ती येसुस लकवा बेमरहासिन बाचस, “अना ख़द्द, डिढ नना, निंग्‍है पाप गुट्ठी छमा नन्‍तार'ई।”

3लिकिन जोक्‍क यहूदी नॆग सिखाब'उर ताम ताम नू कछनख्रर, “ई आलस गा धर्मेसी निंदा नन्‍दस।”

4आर ही ई सोचनन अक्‍खस ती येसुस आरिन बाचस, “नीम एन्‍देरगे निम्‍है जिया नू मलदौ सुगुम सोचदर? 5‘निंग्‍है पाप गुट्ठी छमा नन्‍तार'ई’ एन्ने ब'अना ‘चो'आ अरा कुद्दा ‍नुंगा’ एन्ने ब'अना ती सेब्‍बा हवे। एन्‍देरगेका आलर कोड़े मन्नन ऎरा ओंग्‍नर, लिकिन पाप छमा मन्नन ऎरा पोलनर। 6लिकिन ऎन ई आलासिन कोड़े नन्ना ती निमन ऎद'ओन का मनवा ख़द्दन एंगा गे आलर ही पाप गुट्ठिन छमा नना गे हूँ ख़ॆख़ेल नू आकुस र'ई।” ख़ने आस लकवा बेमरहासिन आनियस, “ऎन निंगन ब'अदन, चो'आ, निंग्‍है खटिन चेड़'अरकी एड़पा कला।” 7ख़ने आस चॊचस ती तंग्‍है एड़पा केरस। 8इदिन ईरयर ती आलर इल्‍चियर केरर अरा धर्मेसी ओहमा नना हेलरर एकास आलर गे एन्ने आकुस चिच्कादस।

येसुस मत्तायोसिन मॆख़दस

(मर 2:13-17; लूक 5:27-32)

9येसुस असले ती उरखस ख़ने, मत्तायोस नामे ओर्त आलासिन मालगुजारी ऊज'‍ऊ एड़पा नू उक्‍का ईरियस ती आसिन बाचस, “एंग्‍है गने गुचा।” ख़ने आस चॊचस ती आसी गने गुड़ियारस।

10ख़ॊख़ा येसुस मत्तायोसी एड़पा नू मंडी ओना गे उक्‍कियस। बग्‍गे मालगुजारी ऊज‍'उर अरा पपहर#9:10 इय्या पपहर माने ‘नॆकन फरिसीर ख़ाँड़नर’। बरचर अरा येसुस अरा आसी चेलर गने ओक्‍करकी ओना लगियर। 11अरा फरिसीर इदिन ईरयर ती आसी चेलारिन मेंजर, “निम्‍है गुरुस मालगुजारी ऊज‍'उर अरा पपहर गने एन्‍देरगे ओन्‍दस?”#लूक 15:1,2

12लिकिन येसुस इदिन मेंजस ती आरिन बाचस, “कोड़े दौ आलर गे बैधासी चाड़ मल्‍ला, लिकिन बेमरहर गे र'ई। 13लिकिन कला ती सिख्र'आ का ‘ऎन सोग्‍गेन बेद्ददन दाँड़ेन मल्‍ला’ एन्ने ई ब'अना ही एन्‍देर माने मनी। ऎन नॆ तमन उजगो सोचनर आर गे म‍ला नॆ तमन पपहा बुझुरनर आरिन एड़'आ बरचका र'अदन।”#मत्ता 12:7; हो 6:6

उपास ही पत्त नू मेन्ना

(मर 2:18-22; लूक 5:33-39)

14उन्‍दुल यॊहनसी चेलर येसुस गुसन बरचर ती मेंजर, “ऎम अरा फरिसीर उपास नन्‍दम, लिकिन निंग्‍है चेलर एन्‍देरगे उपास मल नन्‍नर?”

15येसुस आरिन बाचस, “एका गूटी बेंजा जॊंख़स बरतियर गने र'अदस, आर एकासे खोबरार'ओर? लिकिन बेंजा जॊंख़स आर ती होतारना बेड़ा बर'ओ, आ उल्‍ला आर उपास ननोर। 16अरा नॆ हूँ पुना किचरी ही खंडन एटेरका पच्चा किचरी नू मल सट'ई तुन'ई। अन्ने आस नन्‍दस होले, टस्‍का पच्चा किचरिन चर्रो चि'ओ, अरा एटेरकन कोहाँ ननो चि'ओ। 17नॆ हूँ पुना अंगुर रासी आबोन चपटा ही पच्चा कुड़वा नू मल निन्‍ददस उइय्‍दस। अन्ने नन्‍दस होले, बिचका अंगुर रासी चपटा ही कुड़वन पलको चि'ओ। अंगुर रासी अरा चपटा ही कुड़वा दुयो नठार'ओ कालो। औंगे पुना अंगुर रासी आबोन चपटा ही पुना कुड़वा नू निन्‍ददस उइय्‍दस। एन्ने ननोस होले अंगुर रासी अरा चपटा ही कुड़वा दुयो मल नठार'ओ।”#9:17 येसुस तंग्‍है सिखाब'अना आर ही उपास नन्‍ना लेक्‍खा आर ही चाल गने जॊगे मलकी, अन्ने ऎद'आ गे इदन बाचस।

केचका ख़द्दो अरा रोगे आली

(मर 5:21-43; लूक 8:40-56)

18येसुस आर गने इबड़ा कत्‍थन कच्‍छनख्रना बारिम रहचस ख़ने ओर्त गोड़हा एड़पा ही मुद्धस बरचस ती येसुसिन ऒड़ लग्‍गियस ती बाचस, “एंग्‍दा अक्‍कुनिम किच्‍चकी र'ई। नीन बरा ती अदही म‍इय्‍याँ ख़ेक्खा उइय्या, होले आद उज्‍जो।” 19तहाँ येसुस चॊचस ती तंग्‍है चेलर गने आसी गने केरस।

20आ बारी बारा बछर ती ख़ॆंस काना रोगे ती लिंड़िरका ओन्‍टा आली येसुसी ख़ॊख़ा तरती बरचा ती आसी किचरी अंचरन ऎंवसड़ा। 21एन्‍देरगेका आद तंग्‍है जिया ती बाचकी रहचा, “ऎन आसी किचरी गंडन लेका ऎंवसड़'ओन, अन्नु हूँ कोड़े मनोन।” 22येसुस ख़ॊख़ा तरा बिड़द्रस ती अदिन ईरयस ती बाचस, “अनय ख़द्द जिया नू डिढ ननय, नीन एंगन पत्ताचकी, औंगे नीन उजगारदी।” आ बारिम आद कोड़े मंज ख़च्‍चिया।

23फिन येसुस आ मुद्धासी एड़पा अंड़सियस। आ बारी बंसरी ऊर'ऊ आलारिन अरा बग्‍गे आलर ही अउवारनन ईरयस 24अरा आरिन बाचस, “गुच्‍छर'आ, कुकोय मल्‍ला केचका, ख़न्‍द्र'आली।” ख़ने आर आसिन अलखा हेलरर। 25आलारिन बहरी ओथ्रका ख़ॊख़ा येसुस भितरी कोरचस ती कुकोय ही ख़ेक्खन धरचस ती चॊदस, ख़ने आद चॊचा ती इज्‍जा। 26ई कत्‍था ही हला आ हल्‍का ही कोंड़ा कोंड़ा बींड़रा केरा।

येसुस अन्धहा अरा कोन्‍दासिन कोड़े नन्‍दस

27येसुस असलेक ती केरस ख़ने, ईरिब अन्धहा आलर एन्ने गोहरारनुम आसी ख़ॊख़ा बर'आलियर, “अना दाऊदसी ख़द्दायो! एमन सोग्‍गे ऎरा।” 28आस एड़पा अंड़सियस ख़ने, अबड़ा अन्धहा आलर आसी गुसन बरचर। ख़ने येसुस आरिन मेंजस, “एन्‍देर? नीम पत्त'अदर का ऎन इदिन नना ओंग्‍दन?” आर बाचर, “हाँ उर्बायो।” 29ख़ने येसुस आर ही ख़न्नन ऎंवसड़स ती बाचस, “निम्‍है पत्त'अना लेक्‍खा निमा गे मनन नेक‍अन।” 30तहाँ आर ही ख़न्न चलख़रा केरा अरा आर ऎरा उंग्‍गियर। अरा येसुस आरिन बर्जाचस ती बाचस, “चिहुंक र'अके, इदिन नॆकन हूँ अमके तेंगा।” 31लिकिन आर केरर ती आ गोट्टा चक नू येसुसी दौ नलखन तेंगा कुद्दियर।

32आर बहरी उरखम लगियर ख़ने, जोक्‍क आलर नाद रस्‍सका ओर्त कोन्‍दा आलासिन येसुसी गुसन ओन्‍द्रर। 33औंगे येसुस नादन ओथ्रस। ख़ने आ कोन्‍दस कच्‍छनख्र'आ हेलरस। ख़ने गोंहड़ा अनचकरा केरा अरा बाचा, “इस्राऎल नू इकला हूँ एन्ने अकबक नलख मल्‍ला मंजका।” 34लिकिन फरिसीर बाचर “ईस गा नाद ही मुद्धासी सहाड़ा ती नाद गुट्ठिन ओथ्रदस।”#मत्ता 10:25; 12:24; मर 3:22; लूक 11:15

बनीहार ही चाड़

35इदही ख़ॊख़ा येसुस आ चक ता उर्मी नगरे नगरे अरा पद्दा पद्दा कुद्दनुम आर ही गोड़हा एड़पा नू सिखाब'अनुम धर्मेसी राजी ही दौ कत्‍था मेन्‍त'आनुम कुद्दा लगियस। अरा जम्मा रकम ही पयहा अरा रोगेन कोड़े नंजस।#मत्ता 4:23; मर 1:39; लूक 4:44 36येसुस गोंहड़न ईरयस ख़ने आस गे आर ही मइय्याँ सोग्‍गे लग्‍गिया, एन्‍देरगेका आर ख़ापुर मलका भेंडो लेक्‍खा भिड़कारका अरा बींड्रका रहचर।#गन 27:17; 1बॆल 22:17; 2इति 18:16; यहेज 34:5; मर 6:34 37येसुस तंग्‍है चेलारिन बाचस, “ख़ोयना गा बग्‍गे र'ई, लिकिन बनीहार जुक्‍किम र'अनर, 38इदगे तंग्‍है ख़ोयना गे बनीहार आलारिन त‍इय्या गे ख़ोयत'ऊ उर्बासिन गोहरार'आ।”#लूक 10:2

Currently Selected:

मत्तायोस 9: KURUXBSI

Highlight

Copy