मत्तायोस 10
10
येसुस बारो तइरकारिन दौ कत्था तेंगा गे तइय्दस
(मर 3:13-19; 6:7-13; लूक 6:12-16; 9:1-6)
1तहाँ येसुस तंग्है बारो चेलारिन मीख़ियस ती आर गे मलदौ बॊलता गुट्ठिन ओथ्र'आ गे अरा उर्मी रकम ही रोगेन दरा पयहा गुट्ठिन कोड़े नन्ना ही आकुस चिच्चस। 2बारो तइरकर ही नामे एन्ने र'ई:
मुन्द ता सिमॊन, नॆ पतरस बारदस
अरा आसी भइय्योस अन्द्रेयस
अरा जेबदयुसी तंग्दस याकॊब
अरा आसी भइय्योस यॊहन
3अरा फिलिप्पोस
अरा बरतोलोमैस
अरा मालगुजारी ऊज'ऊ मत्तायोस
अरा तॊमस
अरा हलफैसी तंग्दस याकॊब
अरा तद्दैस
4अरा यहूदीर ही छछिन्द सैना ता सिमॊन
अरा यूदस इसकारियॊत, एकास ख़ॊख़ा येसुसिन धरताचस।
5येसुस इबड़ा बारो तइरकारिन पॆसस ती तइय्यस, “नन-यहूदीर गुसन अमा कला अरा समारिया ता आलर ही नगरे नू अमके कोर'आ। 6लिकिन इस्राऎल आलर गुसन कालके एकार एबस्रका भेंडो लेक्खा र'अनर। 7कानुम कानुम ‘धर्मेस आलर ही उज्जना नू राजी नन्ना बेड़ा हेद्दे अड़सा ख़च्चिकी र'ई’ एन्ने दौ कत्थन मेन्त'आ कुद्दा।#लूक 10:4-12 8अरा रोगियारिन उजग'आ अरा केचकारिन उज्जत'आ अरा खसरा रोगियारिन कोड़े नना अरा आलर ती नाद गुट्ठिन ओथ्र'आ। नीम एंग्है ती इबड़ा सवंगन सिथिया ख़क्खकादर, नीम हूँ आलारिन सिथियम ती संगरा नना। 9नीम गोच्छा नू सोना महले चाँदी महले रुपा ही ढिबा अमके हो'आ। 10अरा झोला महले ऎंड़ किचरी महले जुता गुट्ठी महले सोट्टा अमके हो'आ। इदगे का बनीहार गे तंग्है ओन्ना-मॊख़ना ख़क्ख्रना र'ई।#1कोरि 9:14; 1तीमो 5:18
11एकअम नगरे महले पद्दा नू कोर'ओर, होले अइय्या जॊगे आलासिन बेद्द ऎरा, अरा निम्है उरखना गूटी आसी एड़पानुम र'अके। 12एड़पा कोर'ओ बारी आ एड़पा गे बरकत चि'अके। 13अरा आ एड़पा जॊगे र'ओ होले निम्है बरकत अदही मइय्याँ मनो। लिकिन आ एड़पा जॊगे मल र'ओ होले निम्है बरकत निम्है गुसन किर्रो क'ओ। 14अरा एकअम ओर्तर निमन मल परघ'ओर महले निम्है कत्थन मल मेनोर होले नीम आ एड़पा महले आ नगरे ती उरखो बारिम निम्है ख़ेड्डे ता रीड़ोन ख़ेत्तके#10:14 निम्है कत्थन माल इंझ्रना चड्डे धर्मेस तरती आर गे ख़क्ख्रना दंडे ही ईद आर गे निम्है चेताब'अना मनो। चि'अके।#तइ 13:51 15ऎन निमन मानिमन ब'अदन, ‘रायबड़ी उल्ला नू सोदोम#10:15 सोदोम नगरे नू रहचका आलर बग्गे पाप नंजकाचर ख़ने धर्मेस ई नगरे आबोन चिच्ची अरा लाही ती नास नंजस। अरा गोमोरा नगरे ता आलर ख़क्खना दंडे ती ई नगरे ता आलर ही ख़क्खना दंडे बग्गे मलदौ मनो।’#मत्ता 11:24; उत्प 19:24-28
सस्ती ही पत्त चेताब'अना
(मर 13:9-13; 9:41; लूक 21:12-17; 12:2-9,51-53; 14:26,27)
16ऎरा! कला, ऎन निमन भेंडो लेक्खा भुसुड़ गुट्ठी ही मझी नू तइय्दन। औंगे नेर्रे गुट्ठी लेक्खा लूरगर अरा पेरवाँ गुट्ठी लेक्खा लुदऊ मना।#लूक 10:3 17लिकिन आलर ती चिहुंक र'अके। नीम एंग्है गने चॊख़र'उर र'अना चड्डे आर निमन कोहाँ सभा गुट्ठी नू चि'ओर अरा तम्है गोड़हा एड़पा नू कोर्रा ती ल'ओर। 18अरा नीम राजीखापुर अरा बॆलर ही मुन्दहारे इजतार'ओर। लिकिन ईद आर गे अरा नन-यहूदीर गे एंग्है पत्त नू तेंगा गे निमा मोका हवे। 19इकला निमन हें'ओर नीम अमके घोख'आ का ऎम एकासे तेंगोम महले एन्देर ब'ओम। लिकिन निमन एन्देर ब'अना र'ई अदिन आ बारिम तेंगतार'ओ कालो। 20एन्देरगेका ईद ब'ऊ नीम मलदर, निम्है बंगासी बॊलतस निम्है ती ब'ओस।#मर 13:9-11; लूक 12:11,12; 21:12-15
21आलर तम्है भइय्योर अरा बहिनोरिन नट'ओर अरा पिटर'ओर, अरा अयंग-बंग तम्है ख़द्द-ख़र्रारिन एन्नेम ननोर। अरा ख़द्द-ख़र्रर तम्है अयंग-बंगर ही बिड़दो चो'अरकी पिटत'ओर।#मर 13:12; लूक 21:16 22नगदे आलर निमन बिड़दो ननोर एन्देरगेका नीम एंग्है गने चॊंख़्रकर। लिकिन नॆ तम्है उज्जना ही मुंज्रना गूटी सह'ओर, आरिम जनमजुग ही दंडे ती बछर'ओर।#मत्ता 24:9,13; मर 13:13; लूक 21:17 23निमन ओन्टा पद्दा नू खिलपत नन्नर होले नन्ना पद्दा बोंके कालके। ऎन निमन मानिमन ब'अदन, ऎन मनवा ख़द्दासी बरना गूटी इस्राऎल राजी नू दौ कत्था तेंगा कुद्दना मल मुंज्रकी र'ओ।
24चेलस तंग्है गुरुस ती कोहाँ मलदस अरा जॊंख़स तंग्है उर्बस ती कोहाँ मलदस।#लूक 6:40; यॊ 13:16; 15:20 25चेलस गे तंग्है गुरुस लेक्खा अरा जॊंख़स तंग्है उर्बस लेक्खा मन्ना दिम कोड़हे र'ई। आर एड़पा उर्बस एंगन बॆलजेबूल#10:25 सैतान ही नन्ना नामे बॆलजेबूल। बाचकानर होले, आसी एड़पातारिन एन्देर मल ब'ओर।#मत्ता 9:34; 12:24; मर 3:22; लूक 11:15
26औंगे नीम आर गे आमा एल्चा। एन्देरगेका एन्ने एन्द्रा हूँ मल्ला कुलुरका का मल चलख़तार'ओ अरा एन्ने एन्द्रा हूँ मल्ला नूख़्रका का मल ऎरतार'ओ।#मर 4:22; लूक 8:17 27ऎन अक्कुन ऊख़ा नू एकदन बाचका र'अदन अदन नीम बिल्ली नू तेंके, अरा नीम एकदन कुड़िया गुट्ठी ही भितरी कलेकसे मेंजकादर अदिन ओर्मर ही ऎरना नू चिच्चियारनुम मेन्ताके। 28अरा कयन पिटनर अरा जियन गा पिटा पोल्नर आर ती अमा एल्चा, लिकिन एकास कयन दरा जियन नरक नू पिटा ओंग्दस आसिन एल्चा। 29एन्देर ऎनोटा ढिबा ती ऎंड़ गोटंग चोरो मल बीसर'ई का? अन्नु हूँ निम्है बंगासी बिगर मने ही ओन्टा हूँ ख़ॆख़ेल नू मल खत्र'ई। 30निम्है कुक्कुन ता चुट्टी हूँ उर्मी गनरकी र'ई। 31औंगे अमा एल्चा, धर्मेस निमन मल मॊधर'ओस, नीम ढ़ॆर चोरो ती बग्गे मूल्ली ही र'अदर।
32औंगे नॆ एंगन आलर ही मुन्दहारे अख़दन ब'अदस, आसिन ऎन हूँ मेर्ख़ा नू र'ऊ एंग्है बंगासी मुन्दहारे आस एंग्है आलस ब'ओन। 33लिकिन नॆ एंगन आलर ही मुन्दहारे बलदन ब'अदस, आसिन ऎन हूँ मेर्ख़ा नू र'ऊ एंग्है बंगासी मुन्दहारे आस एंग्है आलस मलदस ब'ओन।#2तीमो 2:12 34नीम अमके सोच'आ का ऎन ख़ॆख़ेल नू कोड़े ओन्द्रकन ती बरचकादन। ऎन कोड़े मला लिकिन बगड़'आ गे बरचकादन।
35ऎन आलासिन तम्बस ती
अरा तंग्दन तंग्यो ती
अरा सेड़ोन तंग्सास ती हिगड़'आ गे बरचकन।
36ओर्त आलासी बैरिर तंग्है कुटुमर दिम मनोर।#मीका 7:6
37नॆ अयंग मलता बंगासिन एंग्है ती कोड़हे चोन्हा नन्दस आस एंग्है जॊगे मल्दस। अरा एकास तंग्दासिन मलता तंग्दन एंग्है ती कोड़हे चोन्हा नन्दस आस एंग्है जॊगे मल्दस। 38अरा एकअम ओर्तस तंग्है क्रुसन#10:38 इय्या क्रुस ही माने ‘मसीसी चड्डे तंग्है मने ती खिलपत सहना अरा लज्जे मॊख़रना खे'आ गे हूँ’। चेड़'अरकी एंग्हा चड्डे सस्ती सार'आ गे मने मल नन्दस आस एंग्है मना गे जॊगे मल्दस।#मत्ता 16:24; मर 8:34; लूक 9:23 39एकास तंग्है उज्जनन तंग्गा गे उज्जा बेद्ददस आस धर्मेस गने जनमजुग ही उज्जनन एबस'ओस, लिकिन एकास एंग्है चड्डे तंग्है उज्जनन चि'अदस आस धर्मेस गने जनमजुग ही उज्जनन ख़क्खोस।#मत्ता 16:25; मर 8:35; लूक 9:24; 17:33; यॊ 12:25 40एकास निमन इंझ्रदस आस एंगन इंझ्रदस अरा एंगन इंझ्र'उस एंग्है तइय्युस एंग्है बंगासिन इंझ्रदस।#लूक 9:48; 10:16; यॊ 13:20; मर 9:37 41एकास धर्मेसी कत्था तिंगुसिन धर्मेसी कत्था तिंगुस ब'अरकी आसिन इंझ्रदस, आस धर्मेसी कत्था तिंगुर ही लेक्खा मूल्लीन ख़क्खोस। अरा एकास उजगो आलासिन उजगो आलस ब'अरकी आसिन इंझ्रदस आस उजगो आलस लेक्खा मूल्लीन ख़क्खोस। 42नीकईम इबड़ा सन्नी मधेर ती नॆख'आनिम आस चेलस ब'अरकी ओन डुबहा कीरना अम्मु हूँ ओन्त'ओस होले, मानिम ऎन निमन ब'अदन आस एकन्ने नू हूँ तंग्है मूल्लीन मल एबस'ओस।”
Currently Selected:
मत्तायोस 10: KURUXBSI
Highlight
Share
Copy
Want to have your highlights saved across all your devices? Sign up or sign in
Kurux NT - पुना गच्छरना NT
Copyright © Bible Society of India, 2014.
Used by permission. All rights reserved worldwide.
