लूकस 3
3
यॊहन नूड़रत'उस डहरे उजग'अदस
(मत्ता 3:1-12; मर 1:1-8; यॊ 1:19-28)
1कैसर तिबेरयुस रोम राजिन राजी नन्ना ही पन्द्रा बछर नू पोन्तियुस पिलातुस यूदेया जिला ही राजीख़ापू रहचस। आ बेड़ा हॆरॊदॆस अंटिपस गलिलेया जिला ही बॆलस रहचस। अरा आसी तंग्ड़िस फिलिप्पोस इतुरैया अरा त्राख़ॊनितिस जिला ही बॆलस रहचस। अरा लुसानियास अबिलॆनॆ जिला ही बॆलस रहचस। 2हन्नास अरा कैफस कोहाँ नैग रहचर। आ बेड़ा नू धर्मेसी कत्था टोड़ंग नू र'ऊ जकरियासी तंग्दस यॊहनस गे बरचा। 3ख़ने यॊहनस यरदन ख़ाड़ ही आ फड़ा ई फड़ा चक नू बरचस ती आलारिन तेंगा हेलरस, “जियन किर्त'आ अरा नॊड़र'आ होले धर्मेस निमन छमा ननोस।” 4धर्मेसी कत्था तिंगू यसायास यॊहनसी पत्त नू लिखचकाचस, एकासे का,
“ओर्तोस टोड़ंग नू चिच्चियारदस,
‘उर्बस गे डहरेन सपड़'आ,
आस गे डहरेन चत्र'आ।
5उर्मी ढोड़हा नीन्दतार'ओ कालो
अरा उर्मी परता अरा टुंगरी किइय्या नन्तार'ओ,
अरा टेड़हो डहरे उजगतार'ओ,
अरा गड्डी डिप्पा डहरे सम नन्तार'ओ।
6अरा उर्मी आलर धर्मेसी नाड़ना ही पत्त नू अख़'ओर।’”#यसा 40:3-5
7आलर गोंहड़ा गोंहड़ा यॊहनस गुसन नॊड़र'आ गे बर'आलियर। ख़ने आस आरिन ब'आलियस, “अना बिक्ख नेर्रे बेसे आलारो, पाप नन्नन बिगर अम्बका ती धर्मेसी बरना दंडे ती बोंगा गे निमन निकईम चेता बाचर का?#मत्ता 12:34; 23:33 8जियन किर्त'अना ही जॊगे नलख नना। नीम तम्है तम्है जिया नू एन्ने अमा सोच'आ हेलरा का ऎम अब्राहमसी बनस#3:8 धर्मेस अब्राहमस गे चिच्का गच्छरना ती यहूदी आलर सोचनर का आर धर्मेसी चुन्चका आलर हिकनर। ता हिकदम। ऎन निमन ब'अदन का धर्मेस इबड़ा पखना गुट्ठी ती अब्राहमस गे ख़द्द कम'आ ओंग्दस!#यॊ 8:33 9अक्कु धर्मेसी रायबड़ी लेक्खा टोंग'ए मन्न ही पादा नू अबड़न खंडरकी हेबड़ा गे खुतारकी र'ई। एका मन्न दौ ख़ंजपा मल ख़ंज'ई अबड़ा खंडरकी चिच्ची नू सजतार'ओ।”#मत्ता 7:19
10ख़ने आलर यॊहनसिन मेंजर, “होले दंडे ती बछर'आ गे एमा एन्देर नन्ना र'ई?” 11यॊहनस आनाकिर्ताचस, “निंग्है गुसन दुई गोटंग अत्तना र'ई होले, ओन्टा अत्तनन नॆखा गुसन मल्ला आस गे चि'आ। अरा निंग्है गुसन मंडी र'ई होले, अदन कीड़र गे चि'आ।” 12ऊज'उर#3:12 ईर हूँ यहूदी आलर हवे। ईर रोमी सामराट गे ऊज'ऊ नलख ननालियर। औंगे यहूदी आलर ईरिन तम्हा राजी ही बिड़दो ननुर एन्ने सोच'आलियर। हूँ आस गुसन नॊड़र'आ गे बरचर अरा मेंजर, “अना गुरु, एमा एन्देर नन्ना र'ई?”#लूक 7:29 13यॊहनस बाचस, “एका बग्गे निमा गे ऊज'आ गे आनरकी र'ई अदिन ती बग्गे अमके ऊज'आ।” 14जोक्क सैनर हूँ आसिन मेंजर, “एमा एन्देर नन्ना र'ई?” यॊहनस आरिन बाचस, “नॆखन हूँ ढेवाँ ढेवाँ नू ढिबा अमके हो'आ महले आलारिन अमके बझाब'आ। अरा नीम निम्है तनखानुम खतिर ननके।”
15ओर्मा आलर मसीसी बरना ही पाब ऎरालियर। अरा यॊहनसी पत्त नू ईर तम्है तम्है जिया नू सोच'आलियर का ईसिम गा मसीस मलदस। 16यॊहनस ओर्मारिन बाचस, “ऎन गा निमन अम्मु ती नॊड़रत'अदन, लिकिन एकास बर'ऊ र'अदस आस एंग्है ती कोड़हे सवंगिय र'अदस। ऎन ई जॊगे हूँ मलकन का आसी जूता गुट्ठी ही ऎपन हूँ कोल्ला ओंगोन का एकदन बिट्ठी ननू जॊंख़स लेका नन्दस। आस निमन नेम्हा बॊलतस अरा चिच्ची ती नॊड़'ओस। 17आस तंग्है केतेर ती गहुँन अरा चींख़न बेग'ओस। अरा आस तंग्है खलिन बॆस लगे एर्रोस। अरा आस गोट गहूँन तंग्है कुट्ठी नू उइय्योस, अरा चींख़न चिच्ची नू बस्सोस एकदा इकला हूँ मल तेभर'ओ।”
18ई लेक्खा यॊहनस सिखाब'अरकी आलारिन धर्मेस हेद्दे किर्रा गे चेताब'अते र'आलियस। आस आरिन दौ कत्था हूँ मेन्ताचस। 19यॊहनस सन्नी बॆल हॆरॊदॆस अंटिपसिन हूँ केप्पस। एन्देरगेका आस तंग्ड़िस फिलिप्पोस उज्जनुम उज्जनुम आसी मुक्का हॆरॊदिया आबोन उइय्यस, अरा आस बग्गे मलदौ नलख हूँ नंजकाचस। 20होले हॆरॊदॆस इबड़ा जम्मा ती कोड़हे ओन्टा मलदौ नलख नंजस का यॊहनसिन गुड़ताचस।#मत्ता 14:3,4; मर 6:17,18
येसुसी नॊड़रना
(मत्ता 3:13-17; मर 1:9-11)
21एकाबारी बग्गे आलर नॊड़रर मुंज्रर, अदही ख़ॊख़ा येसुस हूँ नॊड़रस। अरा आस बिन्ती ननालियस ख़ने मेर्ख़ा तिसग्रा केरा, 22अरा नेम्हा बॊलतस मॆद ही रूपे नू पेरवाँ लेक्खा येसुस मइय्याँ इत्तियस। अरा मेर्ख़ा ती एन्ने ब'अना मेन्द्रा, “नीन एंग्है चोन्हा ख़द्दय हिकदय, ऎन निंग्है ती बग्गे खुसमारदन।”#उत्प 22:2; भज 2:7; यसा 42:1; मत्ता 3:17; मर 1:11; लूक 9:35
येसुसी पीढ़ी
(मत्ता 1:1-17)
23येसुस तान दौ कत्था मेन्त'आ हेलरस ख़ने, आस तीस बछर ही केम रहचस।
येसुस बुझ्र'आलियस का आस यॊसॆफसी तंग्दस।
यॊसॆफस ऎलीसी तंग्दस।
24ऎलीस मत्तातसी तंग्दस,
मत्तातस लेवीसी तंग्दस,
लेवीस मेलख़ीसी तंग्दस,
मेलख़ीस यन्नासी तंग्दस,
यन्नास यॊसॆफसी तंग्दस।
25यॊसॆफस मत्तातियासी तंग्दस,
मत्तातियास आमॊसी तंग्दस,
आमॊस नाहूमसी तंग्दस,
नाहूमस हेसलीसी तंग्दस,
हेसलीस नंगैसी तंग्दस।
26नंगैस मातसी तंग्दस,
मातस मत्तातियासी तंग्दस,
मत्तातियास सेमेयिनसी तंग्दस,
सेमेयिनस यॊसॆख़सिन तंग्दस,
यॊसॆख़स यॊदासी तंग्दस।
27यॊदास यॊअननसी तंग्दस,
यॊअननस रॆसासी तंग्दस,
रॆसास जोरोबाबेलसी तंग्दस,
जोरोबाबेलस सलातिऎलसी तंग्दस,
सलातिऎलस नॆरीसी तंग्दस।
28नॆरीस मेलख़ीसी तंग्दस,
मेलख़ीस अद्दीसी तंग्दस,
अद्दीस कॊसामसी तंग्दस,
कॊसामस एलमदामसी तंग्दस,
एलमदामस ऎरसी तंग्दस।
29ऎरस यॆसूसी तंग्दस,
यॆसूस एलियेसेरसी तंग्दस,
एलियेसेरस यॊरीमसी तंग्दस,
यॊरीमस मत्तातसी तंग्दस,
मत्तातस लेवीसी तंग्दस।
30लेवीस सुमेयॊनसी तंग्दस,
सुमेयॊनस यूदासी तंग्दस,
यूदास यॊसॆफसी तंग्दस,
यॊसॆफस यॊनामसी तंग्दस,
यॊनामस एलियाकीमसी तंग्दस।
31एलियाकीमस मेलेयासी तंग्दस,
मेलेयास मेन्नासी तंग्दस,
मेन्नास मत्तातासी तंग्दस,
मत्तातास नातामसी तंग्दस,
नातामस दाऊदसी तंग्दस।
32दाऊदस येसैसी तंग्दस,
येसैस यॊबॆदसी तंग्दस,
यॊबॆदस बोआसी तंग्दस,
बोआस सलासी तंग्दस,
सलास#3:32 सलमॊनस हूँ ब'अनर। नास्सॊनसी तंग्दस।
33नास्सॊनस अमिनदाबसी तंग्दस,
अमिनदाबस अदमीनसी तंग्दस,
अदमीनस अरनीसी तंग्दस,
अरनीस#3:33 जोक्को ख़ेक्खा ता लिख्रका पच्चा पुथी गुट्ठी नू अमिनदाबस आरामसी तंग्दस एन्ने लिख्रकी र'ई, अरनीस अरा आरामस ओन्टे नामे दिम हवे। 1इति 2:9-10 हेसरॊमसी तंग्दस,
हेसरॊमस फारेसी तंग्दस,
फारेस यहूदासी तंग्दस।
34यहूदा याकॊबसी तंग्दस,
याकॊबस इसाकसी तंग्दस,
इसाकस अब्राहमसी तंग्दस,
अब्राहमस तेरासी तंग्दस,
तेरास नाख़ॊरसी तंग्दस।
35नाख़ॊरस सेरूख़सी तंग्दस,
सेरूख़स रेगूसी तंग्दस,
रेगूस फेलेकसी तंग्दस,
फेलेकस एबेरसी तंग्दस,
एबेरस सलासी तंग्दस।
36सलास कायनामसी तंग्दस,
कायनामस अर्फकसादसी तंग्दस,
अर्फकसादस सॆमसी तंग्दस,
सॆमस नूहसी तंग्दस,
नूहस लामेख़सी तंग्दस।
37लामेख़स मतूसलासी तंग्दस,
मतूसलास हेनॊख़सी तंग्दस,
हेनॊख़स यारेदसी तंग्दस,
यारेदस मलेलेयॆलसी तंग्दस,
मलेलेयॆलस कायनामसी तंग्दस।
38कायनामस एनॊसी तंग्दस,
एनॊस सॆतसी तंग्दस,
सॆतस आदमसी तंग्दस,
आदमस धर्मेस ती गढ़्रका रहचस।
Currently Selected:
लूकस 3: KURUXBSI
Highlight
Share
Copy
Want to have your highlights saved across all your devices? Sign up or sign in
Kurux NT - पुना गच्छरना NT
Copyright © Bible Society of India, 2014.
Used by permission. All rights reserved worldwide.
