त‍इरकर 22

1“अना भ‍ईरो अरा बंगारो, अक्कु एंग्‍है बहासन मेना।” 2आस आर ही गने इब्रानी भखा ती कछनख्रनन आर मेंजर ख़ने, आर कलेकसे मंजर। ख़ने पौलुस बाचस, 3“ऎन गा यहूदी आलन हिकदन। ऎन किलिकिया देस ता तरसोस नगरे नू कुन्‍द्रकन। अरा ई येरुसलॆम नगरे नू पर्दकन ती गमालिऎलसी ख़ेड्डमूली उक्‍कन ती नम्‍है पूरखर ही नॆग अरा चाल गुट्ठिन ठौका ठौका सिख्रकन। अरा धर्मेस गे एन्ने मूलख़का रहचकन, एकासे इन्ना नीम ओर्मर र'अदर।#त‍इ 5:34-39 4ऎन गा येसुसी डहरे नू ईकू आलारिन पिटा ख़च्‍चना गूटी सताबाचकन, अरा मॆतर अरा मुक्‍कर इरबारिन हॆंच हॆंच जेहेल नू सजताचकन। 5इबड़ा कत्‍था गे कोहाँ नैगस अरा सभा ही उर्मी सेयान आलर गोवाह र'अनर। ऎन आर ही ती दमसकोस ता यहूदी भइय्योर गे चिठी होच्‍चकन। ई डहरे नू ईकू आलारिन हें'ओन ती येरुसलॆम ओन्‍द्र'ओन ती दंडे चि'आ गे दमसकोस काला लिक्‍कन।#त‍इ 8:3; 26:9-11

6ऎन कानुम कानुम दमसकोस हेद्दे अंड़सकन ख़ने, एन्ने मंजा का लोहाड़ी बेड़ा नू आचका ही मेर्ख़ा ती एंग्‍है चरियो तरा ओन्‍टा कोहाँ बिल्‍ली बिल्‍चिया। 7अरा ऎन ख़ॆख़ेल नू खत्रकन केरकन अरा एन्ने सड़ा मेंजकन, ‘स‍उल, स‍उल, नीन एंगन एन्‍देरगे सताब'आलदय?’ 8ख़ने ऎन आनाकिर्ताचकन, ‘उर्बायो, नीन एका ओर्तय?’ आस एंगन बाचस, ‘ऎन नासरेत ता येसु हिकदन, नॆकन नीन सताब'आलदय।’ 9एंग्‍है संगे रहचका आलर बिल्‍लिन गा ईरियर, लिकिन एकास एंग्‍है गने कछनख्र'आ लगियस आसी ब'अनन मल मेंजर। 10ख़ने ऎन बाचकन, ‘उर्बायो, ऎन एन्‍देर ननोन?’ उर्बस एंगन बाचस, ‘चो'आ ती दमसकोस कला, अरा एन्‍देर निंगा नना गे उइरकी र'ई असन निंगन जम्मा तेंगतार'ओ कालो।’ 11आ बिल्‍ली ही लौकारना ती ऎन ऎरा पोल्‍कन, ख़ने ऎन एंग्‍है संगेर ही ख़ेक्खन ओदरकन ती दमसकोस बरचकन।

12तहाँ हनानिया नामे आलस एंगन ऎरा बरचस। आस मूसासी नॆगन भगती गने पॆस्र'ऊ आलस रहचस। आस असन र'ऊ उर्मी यहूदी आलर नू बॆस नामे आलस रहचस। 13अरा आस एंग्‍है हेद्दे इज्‍जस ती एंगन बाचस, ‘अना भ‍ई स‍उल, ऎरा हेलर'आ।’ आ बारिम ऎन आसिन ऎरा उंग्‍कन। 14फेन आस बाचस, ‘नम्‍है पूरखर ही धर्मेस निंगन इदगे ओकताचकादस का, नीन आसी मने आबोन अख़'ओय, अरा एकास धर्मेसी उजगो र'अस आसिन ऎरोय अरा आसी ब‍ई ती आसी कत्‍था मेनोय। 15एन्‍देरगेका नीन उर्मी आलर गे आसी गोवाह मनोय, एकदन नीन ईरकय अरा मेंजकय। 16अक्‍कु एन्‍देरगे दिरी नन्‍दय? चो'आ नॊड़र'आ, अरा आसी नामे ती गोहरारना ती निंग्‍है पाप गुट्ठिन नॊड़ा चि'आ।’

17ऎन येरुसलॆम किर्रकन ती धर्मेसी मन्दिर नू गोहरार'आ लिक्‍कन ख़ने, मोखरकन केरकन। 18अरा उर्बासिन ईरकन का आस एंगन बाचस, ‘चाँड़हे येरुसलॆम ती उरखा कला, एन्‍देरगेका आर एंग्‍है पत्त नू निंग्‍है गोवाह आबोन मल पत्त'ओर।’ 19ख़ने ऎन बाचकन, ‘अना उर्बायो, आर अख़नर का उर्मी गोड़हा एड़पा नू ऎन निंगन पत्त'ऊ आलारिन जेहेल नू सज'आ लिक्‍कन अरा लौत'आ लिक्‍कन। 20अरा निंग्‍है गोवाह स्‍तेफनोसिन पिटा लगियर ख़ने, ऎन हूँ असन रहचकन, अरा ई कत्‍था नू संगे मंजकन, अरा आसिन पिटू आलर ही किचरिन ख़ापा लिक्‍कन।’#त‍इ 7:58 21ख़ने आस एंगन बाचस, ‘कला, एन्‍देरगेका ऎन निंगन गेच्‍छा नू नन-यहूदी आलर गुसन त‍इय्योन।’”

रोमी आलस पौलुस

22आसी एन्ने ब'अना गूटी अबड़ा आलर आसहीन मेना लगियर। तहाँ जॊरसरिया चिच्चियारर ती बाचर, “एन्ने आलासिन ख़ॆख़ेल ती पिटा चि'आ, ईस गा उज्‍जना जॊगे मलकस।” 23आर चिच्चि‍यार'आ लगियर अरा किचरी गुट्ठिन हेबड़ा लगियर अरा धूली उढिय'आ लगियर ख़ने, 24फउद उर्बस आनियस, “ईसिन फउद गढ़िया नू हो'आ अरा कोर्रा लौ'आ ती जँच'आ, एंगा अख़ना र'ई का आलर एन्‍देर चड्डे ईसी बिड़दो नू एन्ने चिच्चि‍यार'आ लगनर।” 25सैनर आसिन कोर्रा लौ'आ गे हॆंचर ख़ने, पौलुस तंग्‍है हेद्दे इज्‍जका रहचस आ सैनर ही मुद्धासिन बाचस, “बिगर नेंवई नंजका ओन्‍टा रोमी आलासिन कोर्रा ती लौना नॆग ही लेक्‍खा हवे का?”

26एन्ने ब'अनन मेंजस ती सैनर ही मुद्धस फउद उर्बस गुसन केरस ती बाचस, “नीन एन्‍देर नना काला लगदय? ईस गा रोमी आलस हिकदस।” 27तहाँ फउद उर्बस पौलुस गुसन बरचस ती बाचस, “एंगन तेंगा, नीन रोमी आलय हिकदय का?” आस बाचस, “हाँ।” 28इदिन मेंजस ती फउद उर्बस बाचस, “ऎन रोमी मना गे नगदे रुपिया चिच्का रहचकन।” पौलुस बाचस, “ऎन गा कुन्द्रका तिम रोमी आलन हिकदन।” 29ख़ने आसिन जाँच ननू रहचर, आर लॆम तरकूटी मंजर केरर। अरा फउद उर्बस हूँ गा ईस रोमी आलस हिकदस अरा ऎन ईसिन खूटचकादन ब'अरकी इल्‍चियस केरस।

कोहाँ सभा ही मुन्‍दहारे पौलुस

30दोसर उल्‍ला फउद उर्बस यहूदी आलर एन्‍देरगे पौलुस म‍इय्याँ बदी ठेका बाचर, इदन ठौका ठौका अख़'आ बिद्दियस। औंगे आस आसी हॆंचकन कुल्‍लियस चिच्‍चस ती मुध नैगर अरा गोट्टा कोहाँ सभा ता आलारिन ख़ॊंड़र'आ गे आनियस। फिन आस पौलुसिन बहरी ओन्‍द्रस ती आर ही मुन्‍दहारे इजताचस।

Currently Selected:

त‍इरकर 22: KURUXBSI

Highlight

Copy