तइरकर 21
21
पौलुसी येरुसलॆम डहरे ऎकना
1एकाबारी ऎम आर ती छिन्ड्रकम ती कोहाँ डोंगा नू अरगकम ख़ने, उजगोम कोस नू बरचकम, अरा दोसर उल्ला रोदोस अरा असले पतारा नू बरचकम। 2असते फोइनिकॆ चकभार काना ओन्टा कोहाँ डोंगा ख़क्खका ती ऎम अइय्या अरगकम ती उरखकम। 3एकाबारी कुप्रोस टापू ऎथ्रा ख़ने, अदिन ऎम डेब्बा अम्बकम ती सीरिया राजी केरकम ती तुरोस नू इत्तकम, एन्देरगेका असन कोहाँ डोंगा ही माल एत्त'अना रहचा। 4असन ऎम पत्त'ऊ आलारिन ख़क्खकम ती सात उल्ला गूटी आर गने रहचकम। आर नेम्हा बॊलतासी कड़हाब'अना ती पौलुसिन, “नीन येरुसलॆम अमके काला” एन्ने तिंगियर। 5अबड़ा उल्ला मुंज्रा ख़ने, ऎम असले कोहाँ डोंगा तरा किर्रिम बिच्चकम। ओर्मा पत्त'ऊ आलर तम्है मुक्कर अरा ख़द्दर गने एमन नगरे ती बहरी अंड़सताचर। असन ऎम पिंडी नू मूकलिदरकम ती गोहरारकम। 6तहाँ ऎम बिदा मंजकम ती कोहाँ डोंगा नू अरगकम अरा आर एड़पा किर्रियर।
7तहाँ ऎम डहरे ऎकतेम ऎकतेम तुरोस ती उरखकम ती प्तोलेमयिस नू अंड़सकम। असन ऎम पत्त'उरिन मोंजरा नंजकम ती आर ही गने उन्दुल रहचकम। 8दोसर उल्ला ऎम असले केरकम ती कैसरेया बरचकम, अरा सतियोर#21:8 कलीसिया गे मंडी ख़ट्टा गे चजरका सात आलर। (तइ 6:1-6) ती ओर्तोस दौ कत्था तिंगू फिलिप्पोसी एड़पा नू कोरचकम अरा आसी गने रहचकम।#तइ 6:5; 8:5 9आसी चार गोटंग डिंडा कुक्के ख़द्दर रहचर, आर धर्मेसी कत्थन मुन्द तिंगू रहचर। 10असन ऎम ढ़ॆर उल्ला र'अना बेड़ा नू हगाबोस नामे ओन्टा धर्मेसी कत्था तिंगुस यूदेया ती बरचस।#तइ 11:28 11आस एम्है गुसन बरचस ती पौलुसी कमरपटी आबोन होच्चस अरा तंग्है ख़ेड्डे ख़ेक्खा गुट्ठिन हॆंचस ती बाचस, “नेम्हा बॊलतस एन्ने ब'अदस का ई कमरपटी नॆख'आ हवे, आसिन येरुसलॆम नू यहूदी आलर एन्नेम हें'ओर ती नन-यहूदी आलर ही ख़ेक्खा नू सोंप'ओर।”
12एकाबारी ऎम इदन मेंजकम ख़ने, ऎम अरा असता आलर पौलुस ती गोहरारकम का येरुसलॆम अमा काला। 13लिकिन पौलुस बाचस, “नीम एन्देर नन्दर, चींख़ा चींख़ा एंग्है जियन ख़ोदख़दर? ऎन गा येरुसलॆम नू हॆंर'आ गे लेका मला, लिकिन उर्बा येसुसी चड्डे खे'आ गे हूँ सपड़ारका र'अदन।” 14ऎम आसी मनेन ताड़'आ पोलकम ख़ने, ऎम एन्ने बाचकम ती कलेकसे मंजकम का उर्बासी मने पूरा मनन नेकअन।
15इबड़ा उल्ला ही ख़ॊख़ा ऎम एम्है जिनिसन सपड़ाचकम ती येरुसलॆम काला गे उरखकम। 16अरा कैसरेया ती हूँ जोक्क पत्त'ऊ आलर एम्है गने केरर, अरा एमन कुप्रियोस टापू ता मनासॊन नामे ओन्टा पच्चा पत्त'ऊ आलस गुसन ओन्द्रर बरचर का ऎम आसी गुसन र'आ ओंगोम।
येरुसलॆम नू पौलुस
17एकाबारी ऎम येरुसलॆम अंड़सकम ख़ने, अइय्या ता पत्त'ऊ भइय्योर एंगन कोड़हे रिझ गने परघाचर। 18दोसर उल्ला पौलुस अरा ऎम याकॊबसिन भेंटार'आ गे केरकम, असन ओर्मा सेयान आलर रहचर। 19ख़ने आस आरिन मोंजरा नंजस ती एन्देर एन्देर नलख धर्मेस आसी दौ कत्था तेंगना नलख ती नन-यहूदी आलर नू नंजका रहचस, ओन्टा ओन्टा उर्मिन तिंगियस।
20अबड़र इदिन मेंजर ती धर्मेसी महबा नंजर। फेन आस ती बाचर, “अना भई, नीन ऎरदय का यहूदी आलर ती कैयो हजार आलर पत्ताचका र'अनर। आर ओर्मर मूसासी नॆग नू मूलख़का र'अनर। 21आर निंग्है पत्त नू मेंजकानर का नीन नन-यहूदी आलर नू र'ऊ यहूदी आलारिन मूसासी नॆग ती किर्रा काला गे सिखाब'अदय, अरा ब'अदय का निम्है ख़द्दर ही खतना नन्त'आ मला अरा चाल गुट्ठी ही लेक्खा अमा ऎका। 22होले नाम एन्देर नन्ना र'ई? आर मेनोर दिम का नीन इसन बरचका र'अदय। 23औंगे ऎम निंगन एन्देर ब'अदम अदिन नना। एम्है गुसन चार झन आलर र'अनर, आर किरया मोक्का र'अनर। 24आरिन हो'आ ती आर ही गने निंगन नॆत ही लेक्खा सुध नना अरा आर कुक्कू मुंडर'आ गे नीन ढिबा चि'आ लघ'आ। होले ओर्मर अख़'ओर का एका कत्था निंग्है पत्त नू बारकी र'ई, आद मानिम मल्ली, अरा नीन हूँ गा मूसासी नॆगन मनदय ती अदही लेक्खा ऎकदय।#गन 6:13-21 25लिकिन अबड़ा नन-यहूदी पत्त'ऊ आलर ही पत्त नू ऎम एन्ने चिताबुता नंजकम ती लिखचकम तइय्कम का मूर्ती गुट्ठी ही दाँड़े अरगका ओना-मॊख़ना ती अरा ख़ॆंस ती अरा घोघन पॆदख़का मेक्खो गुट्ठी ही अहड़ा ती अरा पेहरन ही सोतरा नलख ती तरकूटी र'ओर।”#तइ 15:29 26तहाँ पौलुस अबड़ा आलारिन होच्चस ती दोसर उल्ला आर ही गने चाल ही लेक्खा सुध मंजस। अरा सुध मन्ना ही उल्ला इकला पूर'ओ अरा अबड़ा ओर्मर गे दान अरगना इकला पूर'ओ एन्ने तेंगा गे आस धर्मेसी मन्दिर नू केरस।
धर्मेसी मन्दिर नू पौलुसी धरतारना
27इकला सात उल्ला पूरना रहचा ख़ने, आसिया ता जोक्क यहूदी आलर पौलुसिन धर्मेसी मन्दिर नू ईरियर ती उर्मी गोंहड़न ततकाचर ती आसिन धरचर। 28अरा चिच्चियारर, “अना इस्राऎल आलारो, एमा सहाड़ा नना! ईस आ आलस दिम, एकास नम्है आलारिन अरा मूसासी नॆग ही अरा ई अड्डा ही बिड़दो नू उर्मी आलारिन अरा उर्मी अड्डा नू सिखाब'अदस, अरा नन-यहूदी आलारिन हूँ आस धर्मेसी मन्दिर नू ओन्द्रस ती ई नेम्हा अड्डन सोतबोड़'आ नंजका र'अदस।” 29(एन्देरगेका अबड़र इदिन ती मुन्द इफेसुस ता त्रुफिमोसिन आसी गने नगरे नू ईरका रहचर। औंगे एन्ने बुझ्र'आ लगियर का पौलुस आसिन धर्मेसी मन्दिर नू ओन्द्रका र'अदस।)#तइ 20:4
30तहाँ गोट्टा नगरे नू चॊच-उक्कना मंजा केरा, अरा आलर बोंग जुमरर अरा पौलुसिन धरचर ती धर्मेसी मन्दिर ही बहरी घिडराचर ओन्द्रर। अरा लॆम मन्दिर ही बली मुच्चतारा। 31आर आसिन ल'आ पिटा बेद्दा लगियर ख़ने, रोमी फउद उर्बस गे अरो ख़क्खरा का गोट्टा येरुसलॆम नू चो'आ-ओक्का लगी। 32ख़ने आस लॆम जोक्क सैनारिन अरा सैनर ही मुद्धारिन होच्चस ती आर ही गुसन बोंगस ती बरचस। अरा आर फउद उर्बासिन अरा सैनारिन ईरियर ख़ने, पौलुसिन ल'अनन अम्बियर चिच्चर।
33ख़ने फउद उर्बस हेद्दे बरचस ती पौलुसिन हॆंचस, अरा दुई गोटा सिकड़ी ती हें'आ गे आनियस ती मेंजस, “ईस एका ओर्तस अरा ईस एन्देर नंजका र'अदस?” 34लिकिन गोंहड़ा नू आलर बारो-बरनिया ब'आ ब'आ चिच्चियार'आ हेलरर। चॊच-उक्कना मन्ना चड्डे आस डउल लगे मानी आबोन अख़'आ पोल्लस। औंगे पौलुसिन फउद गढ़िया नू हो'आ गे आनियस। 35एकाबारी आस सिड़ही गुसन अंड़सियस ख़ने, एन्ने मंजा का गोंहड़ा ही तुकना-बेकना ही मारे सैनर गे आसिन चॊद'अरकी हो'अना मंजा। 36एन्देरगेका आलर ही गोंहड़ा आसिन पिटा ख़च्चा ब'अरकी चिच्चियारनुम आसी ख़ॊख़ा नू रहचा।
गोंहड़ा ही मुन्दहारे पौलुसी ब'अना
37सैनर पौलुसिन फउद गढ़िया नू हू'ऊ रहचर ख़ने, पौलुस फउद उर्बासिन बाचस, “ऎन निंगन इन्द्रिइम ब'आ ओंग्दन का?” ख़ने आस बाचस, “एन्देर नीन युनानी भखा अख़दय का? 38नीन आ मिसर आलय मलदय का, एकास जोक्क उल्ला मुन्द हुलहुली नंजस ती चार हजार बलवा ननुरिन टोड़ंग तरा डगराचस होच्चस?” 39पौलुस बाचस, “मला, ऎन गा किलिकिया देस ही तरसोस नगरे ता यहूदी आलन हिकदन। अरा ऎन आ मुद्ध नगरे तरसोस ता र'ऊ आलन। ऎन निंगन गोहरारदन का नीन एंगन ई आलर गने कछनख्र'आ चि'आ।” 40फउद उर्बस कछनख्र'आ चिच्चस। ख़ने पौलुस सिड़ही नू इज्जस ती आलारिन ख़ेक्खन नुकचस ती कलेकसे र'आ गे बाचस। आर कलेकसे मंजर ख़ने, आस इब्रानी भखा ती ब'आ हेलरस।
Currently Selected:
तइरकर 21: KURUXBSI
Highlight
Share
Copy
Want to have your highlights saved across all your devices? Sign up or sign in
Kurux NT - पुना गच्छरना NT
Copyright © Bible Society of India, 2014.
Used by permission. All rights reserved worldwide.
Free Reading Plans and Devotionals related to तइरकर 21
BibleProject | Upside-Down Kingdom / Part 2 - Acts
Jesus in All of Acts - A Video Devotional
Reading the Bible in Historical Sequence Part 12
