तइरकर 16
16
तीमोथियुस पौलुस गने काना
1इदही ख़ॊख़ा पौलुस अरा सीलास देरबॆ नगरे केरर, अरा असन ती लुसत्रा नगरे अंड़सियर। असन तीमोथियुस नामे ओन्टा पत्त'ऊ आलस रहचस। आसी अयंग यहूदी पत्त'ऊ आली रहचा अरा बंगस युनानी आलस रहचस। 2लुसत्रा अरा इकोनियोन ता पत्त'ऊ आलर आसी पत्त नू दौ तिंगियर। 3पौलुस तीमोथियुसिन तंग्है गने संगे मना गे मने नंजस। लिकिन आ चक नू र'ऊ उर्मी यहूदी आलर अख़नर का आसी बंगस युनानी रहचस। औंगे पौलुस आसिन होच्चस ती खतना नन्ताचस। 4आर नगरे नगरे कालरकी येरुसलॆम नू तइरकर अरा सेयान आलर तिगा बाचका कत्थन पॆस्र'आ गे पत्त'ऊ आलारिन तेंगा लगियर। 5औंगे कलीसिया गुट्ठी पत्त'अना नू बड़ियर मन्नुम केरा अरा अबड़र ही गनती बढरनुम काला लगिया।
त्रोआस नू पौलुसी देखार
6नेम्हा बॊलतस आरिन आसिया नू दौ कत्था तेंगा गे छेंकचस ती आर फ्रुगिया अरा गलातिया चकभार नू मन्नुम केरर। 7अरा आर मूसिया राजी ही हेद्दे अंड़सियर ती बितुनिया काला गे चिहुट नंजर। लिकिन येसुसी बॊलता आरिन काला मल चिच्चा। 8ख़ने आर मूसिया कट्टियर ती त्रोआस केरर। 9असन माख़ा पौलुस ओन्टा देखार ईरियस। ओर्त मकेदोनिया जिला ता आलस मुन्द इज्जस ती गोहरारस ती बाचस, “मकेदोनिया बर'अरकी एमन सहाड़ा नना।” 10पौलुसी ई देखार ईरका ख़ॊख़ा ऎम लॆम मकेदोनिया काला बिद्दकम। अरा ऎम बुझ्रकम का धर्मेस एमन आरिन दौ कत्था तेंगा गे मीख़कादस।
फिलिप्पी नू लुदिया पत्त'ऊ आली मन्ना
11फिन ऎम त्रोआस ती डोंगा अरिगकम ती उजगोम समोत्राकॆ टापू केरकम अरा दोसर उल्ला नियापुलिस बरचकम। 12अइय्या ती ऎम फिलिप्पी अंड़सकम, आद मकेदोनिया जिला ता मुध नगरे हवे। अरा आद रोमी आलर ही र'अना अड्डा हवे। ऎम आ नगरे नू जोक्क उल्ला रहचकम।
13ख़न्न ऎख़्रना उल्ला ऎम नगरे ही फाटक ती बहरी ख़ाड़ ही पिंडी नू गोहरारना अड्डा र'ई बाचकम ती केरकम। अरा ऎम असन उक्कम ती असन ख़ॊंड़रका जोक्क मुक्कर गने कछनख्र'आ हेलरकम। 14थुअतीरा नगरे ता लुदिया नामे ही बैजनी किचरी बीसू धर्मेसिन महबा ननू आली अदिन मेना लगिया। पौलुसी कत्थन मेना गे धर्मेस अदही जिया बलिन तिसगस। 15आद तंग्है गोट्टा एड़पातर गने नॊड़रा। ख़ने आद एमन गोहरार'आ, “नीम एंगन उर्बासी पत्त'ऊ आली बुझ्रदर होले, एंग्है गुसन गुचा ती र'आ।” अरा आद एमन बड़पेलहा ती होच्चा केरा।
जेहेल नू पौलुस दरा सीलास
16उन्दुल ऎम गोहरारना अड्डा काला लिक्कम ख़ने, एमा ओन्टा बिट्ठी ननू जॊंख़ पेल्लो भेंट मंजा। अदही मइय्याँ सगड़ी ऎरना ही ओन्टा बॊलता रहचा, अरा आद सगड़ी ऎरना ती तंग्है उर्बर गे नगदेम बग्गे ढिबा अर्ज'आ लगिया। 17आद पौलुसी अरा एम्है ख़ॊख़ा बरचा ती चिच्चियार'आ हेलरा, “इबड़ा आलर उर्मी ती कोहाँ धर्मेसी जॊंख़र हिकनर। ईर नीम एकासे नाड़र'आ ओंग्दर अदही पत्त नू तेंगनर।” 18आद नगदे उल्ला गूटी एन्नेम नना लगिया। लिकिन पौलुस गोसा मंजस अरा किर्रे ईरियस ती आ बॊलतन बाचस, “ऎन निंगन येसु मसीसी सवंग ती आनदन, इदही मइय्याँ ती उरखय कलय।” अरा आ बॊलता आ बारिम आद ती उरखा केरा।
19तहाँ आ बिट्ठी ननू जॊंख़ पेल्लो ही उर्बर इदन ईरियर ती अक्खर का तम्है अर्ज'अना ही असरा मुंज्रा केरा। ख़ने आर पौलुस अरा सीलासिन धरचर ती बजार नू नगरे ही अक्स'उर गुसन नतगियर ओन्द्रर। 20आर आरिन रोमी अक्स'उर गुसन होच्चर अरा बाचर, “ईर यहूदीर हिकनर अरा नम्है नगरे नू हुही चॊद'आ लगनर। 21अरा एन्ने चाल आबोन सिखाब'आ लगनर का एकदन नाम रोमी आलर गे अदिन नना गे अरा मन'आ गे मल्ला चीरका।”
22तहाँ गोंहड़ा पौलुस अरा सीलासी बिड़दो नू लौ'आ गे ख़ॊंड़रर। अरा रोमी अक्स'उर आर ही किचरिन चर्रियर ती ईचा गे अरा आरिन बेत ल'आ गे आनियर। 23बेत लौताचर ती आरिन जेहेल नू गुड़चर चिच्चर अरा दरोगासिन आरिन चिहुंक लगे ख़ापा गे आनियर। 24आस एन्ने पॆसका मेंजस ती आरिन जेहेल ही भितरी कुठली नू उइय्यस अरा आर ही ख़ेड्डेन कंक नू हॆंताचस चिच्चस।
25अधरात माख़ा नू पौलुस दरा सीलास गोहरारनुम धर्मेसिन भजन नना लगियर। अरा गुड़रकर आर ही भजनन मेना लगियर। 26अरा आचका ही ओन्टा कोहाँ ख़ॆख़ेल नुक्रना मंजा। ख़ने जेहेल एड़पा ही नेव गुट्ठी हूँ नुकुर ख़च्चिया, अरा लॆम उर्मी बली तिसग्रा केरा, अरा ओर्मा गुड़रकर ही बींड़ी कोल्लरा केरा। 27दरोगस एजरस ती चॊचस अरा जेहेल एड़पा ही बली गुट्ठिन तिसगरका ईरियस ती गुड़रका आलर बोंगर केरर बाचस ती आस तलवार ओथ्रस ती तंगन पिटा बिद्दियस। 28लिकिन पौलुस जॊरसरिया चिच्चियारस ती बाचस, “निंगन अमा नठाब'आ, एन्देरगेका ऎम ओर्मम इसानिम र'अदम।”
29ख़ने आस बिल्ली ओन्द्रताचस ती भितरी कोरचस, अरा इल्चका ती असरनुम पौलुस अरा सीलासी ख़ेडमूली खत्रस। 30अरा आरिन बहरी ओन्द्रस ती बाचस, “अना उर्बारो, नाड़र'आ गे एंगा एन्देर नन्ना र'ई?”
31आर बाचर, “नीन उर्बा येसुसिन पत्त'आ होले, नीन अरा निंग्है एड़पातर नाड़र'ओर।” 32अरा आर आसिन अरा आसी गोट्टा एड़पा आबारिन उर्बासी कत्था मेन्ताचर। 33आ माख़ा आ बारिम आस आरिन होच्चस ती आर ही खसरा गुट्ठिन नूड़ियस। अरा लॆम तान अरा तंग्है उर्मी एड़पातर नॊड़रर। 34तहाँ आस आरिन तंग्है एड़पा होच्चस ती आर गे मंडी चिच्चस। अरा आस तंग्है गोट्टा एड़पातर गने रिझ्रस, एन्देरगेका आर धर्मेसिन पत्ताचकाचर।
35बिज्जिया ख़ने रोमी अक्स'उर सैनारिन दरोगासिन तेंगा गे तइय्यर, “अबड़ा आलारिन अम्बा चि'आ।” 36ख़ने दरोगस ई कत्थन पौलुसिन तिंगियस, “रोमी अक्स'उर निमन अम्बा चि'आ गे आनका तइय्कानर। औंगे नीम उरखा ती कोड़ेम किर्रिम बि'आ।” 37लिकिन पौलुस सैनारिन बाचस, “ऎम रोमी आलम हिकदम, अन्नु हूँ आर एमन बिगर मेना ख़ॊजम आलर ही मुन्दहारे लौचर अरा जेहेल नू गुड़चर। अक्कु आर एमन कलेकसे ओथ्रनर। एन्ने मल्ला, लिकिन आरिम बर'ओर ती एमन बहरी ओथ्र'ओर।”
38सैनर ई कत्थन रोमी अक्स'उरिन तिंगियर। पौलुस अरा सीलास रोमी आलर हिकनर मेंजर ती आर इल्चियर केरर। 39औंगे आर बरचर ती आरिन छमा नॆचर अरा आरिन बहरी होच्चर ती बिन्ती नंजर का नगरे ती बहरी किर्रिम बि'आ। 40तहाँ आर जेहेल ती उरखर केरर। अरा लुदिया ही एड़पा केरर। असन पत्त'ऊ भइय्योरिन भेंट मंजर ती आरिन रिझ्रताचर। फिन आ नगरे ती किर्रिम बिच्चियर।
Currently Selected:
तइरकर 16: KURUXBSI
Highlight
Share
Copy
Want to have your highlights saved across all your devices? Sign up or sign in
Kurux NT - पुना गच्छरना NT
Copyright © Bible Society of India, 2014.
Used by permission. All rights reserved worldwide.
